ಸೆಬಿ ನಿಯಮ ಉಲ್ಲಂಘಿಸಿದ ಕಂಪನಿಗಳಿಗೆ ದಂಡ ಸಂಭವ ಹೊಸದಿಲ್ಲಿ: ಟಾಟಾ ಪವರ್‌, ಒಎನ್‌ಜಿಸಿ, ಗೇಲ್‌ ಸೇರಿದಂತೆ ಎನ್‌ಎಸ್‌ಇ ಪಟ್ಟಿಯಲ್ಲಿರುವ 56 ಕಂಪನಿಗಳಲ್ಲಿ ಒಬ್ಬ ನಿರ್ದೇಶಕಿಯೂ ಇಲ್ಲ! ಈ ನಿಟ್ಟಿನಲ್ಲಿ ಭಾರತೀಯ ಷೇರು ಮಾರುಕಟ್ಟೆ ನಿಯಂತ್ರಣ ಮಂಡಳಿಯ(ಸೆಬಿ) ನಿಯಮವನ್ನು ಜಾರಿಗೊಳಿಸುವಲ್ಲಿ ಪ್ರತಿಷ್ಠಿತ ಪ್ರಮುಖ ಕಂಪನಿಗಳೇ ವಿಫಲವಾಗಿವೆ. ಇದು 'ಫ್ರೈಮ್‌ ಡೇಟಾಬೇಸ್‌ 'ಸಂಸ್ಥೆಯ ವರದಿಯಲ್ಲಿ ಬಯಲಾಗಿದೆ. ಸೆಬಿ ನಿಯಮದ ಪ್ರಕಾರ ಕಂಪನಿಗಳ ಆಡಳಿತ ಮಂಡಳಿಯಲ್ಲಿ ಕಡ್ಡಾಯವಾಗಿ ಕನಿಷ್ಠ ಒಬ್ಬ ನಿರ್ದೇಶಕಿಯಾದರೂ ಇರಬೇಕು. 2015ರ ಏ.1ರಿಂದ ಅನ್ವಯವಾಗುವಂತೆ ಒಬ್ಬ ನಿರ್ದೇಶಕಿಗಾದರೂ ಆಡಳಿತ ಮಂಡಳಿಯಲ್ಲಿ ಅವಕಾಶ ನೀಡುವಂತೆ ಕಂಪನಿಗಳಿಗೆ ಸೆಬಿ ನಿರ್ದೇಶನ ನೀಡಿತ್ತು. ಆಡಳಿತ ಮಂಡಳಿಗಳಲ್ಲಿ ಪುರುಷರ ಪ್ರಾಬಲ್ಯ ಕಡಿಮೆ ಮಾಡಿ, ಮಹಿಳೆಯರಿಗೆ ಅವಕಾಶ ಕಲ್ಪಿಸುವ ಉದ್ದೇಶದಿಂದ ಈ ನಿಯಮವನ್ನು ಜಾರಿಗೆ ತರಲಾಗಿತ್ತು. ಆದರೆ ಸಾರ್ವಜನಿಕ ವಲಯದ(ಪಿಎಸ್‌ಯು) ಕಂಪನಿಗಳು, ಸಾರ್ವಜನಿಕ ವಲಯದ ಬ್ಯಾಂಕ್‌ಗಳು(ಪಿಎಸ್‌ಬಿ) ಸೇರಿದಂತೆ ಪ್ರಮುಖ ಕಂಪನಿಗಳ ಆಡಳಿತ ಮಂಡಳಿಗಳಲ್ಲಿ ನಿರ್ದೇಶಕಿಯರು ಇಲ್ಲ. ಬಿಇಎಂಎಲ್‌, ಬಿಪಿಸಿಎಲ್‌, ಹಿಂದೂಸ್ಥಾನ್‌ ಆರ್ಗಾನಿಕ್‌ ಕೆಮಿಕಲ್ಸ್‌, ಎಚ್‌ಎಂಟಿ, ಐಒಸಿ, ಎಂಎಂಟಿಸಿ, ನ್ಯಾಷನಲ್‌ ಫರ್ಟಿಲೈಸರ್ಸ್, ಪವರ್‌ ಫೈನಾನ್ಸ್‌ ಕಾರ್ಪೊರೆಷನ್‌, ಸಿಂಡಿಕೇಟ್‌ ಬ್ಯಾಂಕ್‌, ರೂರಲ್‌ ಎಲೆಕ್ಟ್ರಿಫಿಕೇಷನ್‌ ಕಾರ್ಪೊರೇಷನ್‌, ಓರಿಯಂಟಲ್‌ ಬ್ಯಾಂಕ್‌ ಆಫ್‌ ಕಾಮರ್ಸ್‌, ಸ್ಟೇಟ್‌ ಟ್ರೇಡಿಂಗ್‌ ಕಾರ್ಪೊರೇಷನ್‌, ಮದ್ರಾಸ್‌ ಫರ್ಟಿಲೈಸರ್ಸ್ ಸೇರಿದಂತೆ ಸಾರ್ವಜನಿಕ ವಲಯದ ಘಟಕಗಳು ಸೆಬಿ ನಿರ್ದೇಶನ ಪಾಲಿಸಿಲ್ಲ. ಅಲ್ಲದೇ, ಲ್ಯಾಂಕೊ ಇನ್‌ಫ್ರಾಟೆಕ್‌, ಡಿಬಿ ಕಾರ್ಪೊರೇಷನ್‌, ವಲೇಚ ಎಂಜಿನಿಯರಿಂಗ್‌, ಸರ್ವಲಕ್ಷ್ಮಿ ಪೇಪರ್‌, ಸಲೋರಾ ಇಂಟರ್‌ನ್ಯಾಷನಲ್‌ ಸೇರಿಂದಂತೆ ಕೆಲವು ಖಾಸಗಿ ಕಂಪನಿಗಳೂ ಸೆಬಿ ಆದೇಶ ಅನುಸರಿಸಿಲ್ಲ. ==== ಕನಿಷ್ಠ 50 ಸಾವಿರ ರೂ. ದಂಡ ನಿರ್ದೇಶಕಿಯರ ಕಡ್ಡಾಯ ನೇಮಕಕ್ಕೆ ಸಂಬಂಧಿಸಿದ ನಿಯಮವನ್ನು 2014ರ ಫೆಬ್ರವರಿಯಲ್ಲಿ ಸೆಬಿ ಪ್ರಕಟಿಸಿತು. ನಿಯಮ ಜಾರಿಗೆ ಅದೇ ವರ್ಷದ ಅಕ್ಟೋಬರ್‌ 1ನ್ನು ಕಡೆಯ ದಿನವಾಗಿ ನಿಗದಿಪಡಿಸಿತ್ತು. ನಂತರ ಗಡುವನ್ನು ನಂತರದ 6 ತಿಂಗಳಿಗೆ ವಿಸ್ತರಿಸಲಾಯಿತು. 2015ರ ಏ.1ರಿಂದ ನಿಯಮ ಜಾರಿಗೆ ಬಂದಿದ್ದು ಎನ್‌ಎಸ್‌ಇ ಪಟ್ಟಿಯಲ್ಲಿನ ಅನೇಕ ಕಂಪನಿಗಳು ಆಡಳಿತ ಮಂಡಳಿಯಲ್ಲಿ ಮಹಿಳೆಯರನ್ನು ನಿರ್ದೇಶಕಿಯಾಗಿ ನೇಮಕ ಮಾಡಿಕೊಂಡಿವೆ. ಇವರಲ್ಲಿ ಬಹುತೇಕರು ಕಂಪನಿ ಒಡೆಯನ ಕುಟುಂಬಕ್ಕೆ ಸೇರಿದ ಮಹಿಳೆಯರೇ ಇದ್ದಾರೆ. ಅಂದಹಾಗೇ, ನಿಯಮ ಪಾಲಿಸದ ಕಂಪನಿಗಳಿಗೆ ಕನಿಷ್ಠ 50 ಸಾವಿರ ರೂ. ದಂಡ ವಿಧಿಸಲು ಅವಕಾಶವಿದೆ. ಅಲ್ಲದೇ ಎಚ್ಚರಿಕೆಯನ್ನೂ ಸೆಬಿ ನೀಡುತ್ತದೆ. ಮುಂದಿನ 6 ತಿಂಗಳಲ್ಲೂ ನಿಯಮ ಜಾರಿಗೊಳಿಸದಿದ್ದರೆ, ದಂಡವನ್ನು ಹೆಚ್ಚು ಮಾಡುತ್ತಾ ಹೋಗುತ್ತದೆ.
↧
56 ಕಂಪನಿಗಳಲ್ಲಿ ಮಹಿಳೆಗಿಲ್ಲ ಮಣೆ
↧