ಜಾಹೀರಾತಿಗೆ ಜನರ ಆಕ್ರೋಶ; ಸಾರಿ ಕೇಳಿದ ಅಮೆಜಾನ್

ಹೊಸದಿಲ್ಲಿ: ಬೆಂಗಳೂರಿನೆಲ್ಲೆಡೆ ಹಾಕಿರುವ 'ಭಾರತೀಯರು ಸಹಾಯ ಮಾಡಲು ಇಷ್ಟಪಡುತ್ತಾರೆ,' (We Indians love to help) ಎಂಬ ಜಾಹೀರಾತಿಗೆ ಸಾಮಾಜಿಕ ಜಾಲತಾಣದಲ್ಲಿ ಎಲ್ಲೆಡೆಯಿಂದ ತೀವ್ರ ವಿರೋಧ ವ್ಯಕ್ತವಾದ ಹಿನ್ನೆಲೆಯಲ್ಲಿ ಇ-ವಾಣಿಜ್ಯ ಕಂಪನಿ ಅಮೇಜಾನ್.ಇನ್ ಕ್ಷಮೆಯಾಚಿಸಿದೆ.

ಜಾಹೀರಾತಿನಲ್ಲಿ ಕೇರಳ ರಾಜ್ಯ ಸಾರಿಗೆ ಸಂಸ್ಥೆಯೊಂದರ ಬಸ್‌ವೊಂದನ್ನು ಕೆಲವರು ತಳ್ಳುತ್ತಿರುವ ಚಿತ್ರ ಹಾಕಲಾಗಿತ್ತು. ಸಾರ್ವಜನಿಕರು ಈ ಜಾಹೀರಾತಿಗೆ ತಕ್ಷಣವೇ ಪ್ರತಿಕ್ರಿಯಿಸಿದ್ದು, ರಾಜ್ಯ ಸಾರಿಗೆ ಸಂಸ್ಥೆಗೆ ಅವಮಾನ ಮಾಡಿದ್ದಾಗಿ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಅಮೆಜಾನ್ ಕೆಎಸ್‌ಆರ್‌ಟಿಸಿಯನ್ನು ಅಪಹಾಸ್ಯ ಮಾಡಿದ್ದಕ್ಕೆ ನಾಗರಿಕರು ಒಮ್ಮತವಾಗಿ ವಿರೋಧಿಸಿದ್ದಾರೆ. ಅದರಲ್ಲಿಯೂ ಕೇರಳಿಗರು 'ನಮ್ಮ ವ್ಯವಸ್ಥೆಯನ್ನು ಟೀಕಿಸಲು ನಾವಿದ್ದೇವೆ. ಅದಕ್ಕೆ ದೇಶದ ಹೊರಗಿನವರ ಅಗತ್ಯವಿಲ್ಲ,' ಎಂದು ಸಿಡಿದಿದ್ದಾರೆ.

ಈ ಜಾಹೀರಾತಿಗೆ ಎಲ್ಲೆಡೆಯಿಂದ ತೀವ್ರ ವಿರೋಧ ವ್ಯಕ್ತವಾದ ಹಿನ್ನೆಲೆಯಲ್ಲಿ ಕಂಪನಿ ಹೋರ್ಡಿಂಗ್ ಅನ್ನು ತೆಗೆದು ಹಾಕಿ, ಕ್ಷಮೆಯಾಚಿಸಿದೆ.