ಕಾರ್ಮಿಕ ಸಚಿವ ಬಂಡಾರು ದತ್ತಾತ್ರೇಯ ನೇತೃತ್ವದಲ್ಲಿ ಕಾರ್ಮಿಕ ಒಕ್ಕೂಟಗಳ ಪ್ರತಿನಿಧಿಗಳ ಜತೆಗೆ ವ್ಯಾಪಕ ಸಮಾಲೋಚನೆಯ ಬಳಿಕ ಈ ನಿರ್ಧಾರ ತೆಗೆದುಕೊಳ್ಳಲಾಯಿತು ಎಂದು ಕಾರ್ಮಿಕ ಸಚಿವಾಲಯದ ಪ್ರಕಟಣೆ ತಿಳಿಸಿದೆ.
ಗೃಹ ನಿರ್ಮಾಣ ಸೇರಿದಂತೆ ಕೆಲವು ಉದ್ದೇಶಗಳಿಗೆ ಪಿಎಫ್‌ನಲ್ಲಿರುವ ಪೂರ್ತಿ ಹಣವನ್ನು ಬಡ್ಡಿ ಸಮೇತ ಹಿಂಪಡೆಯಲು ಉದ್ಯೋಗಿಗಳಿಗೆ ಅವಕಾಶ ಕಲ್ಪಿಸಲು ಸರಕಾರ ತೀರ್ಮಾನಿಸಿದೆ. ಉದ್ಯೋಗಿ ಸ್ವತಃ ಅಥವಾ ಕುಟುಂಬದ ಸದಸ್ಯರು ಕ್ಷಯ, ಕುಷ್ಠರೋಗ, ಪಾರ್ಶ್ವವಾಯು, ಕ್ಯಾನ್ಸರ್‌ನಿಂದ ಬಳಲುತ್ತಿದ್ದರೆ ಅಥವಾ ಹೃದಯದ ಶಸ್ತ್ರ ಚಿಕಿತ್ಸೆಯ ಸಂದರ್ಭದಲ್ಲಿ ಕೂಡ ಭವಿಷ್ಯನಿಧಿಯ ಸಂಪೂರ್ಣ ಹಣವನ್ನು ಹಿಂತೆಗೆದುಕೊಳ್ಳಬಹುದು. ಮಕ್ಕಳ ವಿವಾಹ, ವೈದ್ಯಕೀಯ, ಮಕ್ಕಳ ಎಂಜಿನಿಯರಿಂಗ್, ದಂತ ವೈದ್ಯಕೀಯ ಮುಂತಾದ ವೃತ್ತಿಪರ ಶಿಕ್ಷಣಕ್ಕೂ ಪಡೆಯಬಹುದು.
ಈ ಪರಿಷ್ಕೃತ ನಿಯಮಾವಳಿಗಳು ಆ.1ರಿಂದ ಜಾರಿಯಾಗಲಿವೆ ಎಂದು ಪ್ರಕಟಣೆ ತಿಳಿಸಿದೆ. ಕಳೆದ ಫೆಬ್ರವರಿ 10ರಂದು ಕಾರ್ಮಿಕ ಇಲಾಖೆ ಹೊರಡಿಸಿದ್ದ ನಿಯಮಗಳ ಪ್ರಕಾರ, ಉದ್ಯೋಗಿಯೊಬ್ಬ ಉದ್ಯೋಗ ಕಳೆದುಕೊಂಡು ಎರಡು ತಿಂಗಳ ನಂತರ ಶೇ.100ರಷ್ಟು ಪಿಎಫ್ ಹಣ ಹಿಂತೆಗೆದುಕೊಳ್ಳಲು ತೊಡಕು ಉಂಟಾಗಿತ್ತು. ಉದ್ಯೋಗಿ ಭವಿಷ್ಯನಿಧಿಯಲ್ಲಿರುವ ತನ್ನ ಪಾಲಿನ ಉಳಿತಾಯ ಮತ್ತು ಅದರ ಬಡ್ಡಿಯನ್ನು ಮಾತ್ರ ಹಿಂಪಡೆಯಬಹುದು. ಉಳಿದ ಮೊತ್ತವನ್ನು 58 ವರ್ಷದ ಬಳಿಕ ಪಡೆಯಬಹುದು. ಅದಕ್ಕೆ ಬಡ್ಡಿಯೂ ಸಿಗಲಿದೆ ಎಂದು ಆಗ ವಿವರಿಸಲಾಗಿತ್ತು.
ಬೆಂಗಳೂರು: ಇಪಿಎಫ್‌ನ ಪೂರ್ತಿ ಹಣವನ್ನು 58 ವರ್ಷಕ್ಕೆ ಮುನ್ನ ಹಿಂಪಡೆಯಲು ವಿಧಿಸಿದ್ದ ನಿರ್ಬಂಧಗಳನ್ನು ಮೂರು ತಿಂಗಳು ಮುಂದೂಡಲಾಗಿದೆ.