ಎಕನಾಮಿಕ್‌ ಟೈಮ್ಸ್‌ ಕೋಲ್ಕೊತಾ ವಾಷಿಂಗ್ಟನ್‌ ಸೇಬು ಎಂದರೆ ಎಲ್ಲರಿಗೂ ಇಷ್ಟ. ಅದರ ಬಣ್ಣ, ರುಚಿಗೆ ಮರುಳಾಗದವರು ಯಾರು? ಆದರೆ, ಅದರ ದರ ಸದ್ಯದಲ್ಲೇ ಶೇ.25ರಷ್ಟು ಜಿಗಿಯುವ ಸಾಧ್ಯತೆಗಳಿವೆ. ಉತ್ಪಾದನೆ ಕಡಿಮೆಯಾಗಿ ವಾಷಿಂಗ್ಟನ್‌ ಸೇಬಿನ ದರಗಳು ಅಮೆರಿಕದಲ್ಲಿ ಈಗಾಗಲೇ ಶೇ.15ರಷ್ಟು ಹೆಚ್ಚಳವಾಗಿವೆ. ಸೇಬಿನ ಆಮದು ಸುಂಕ ಶೇ.50ರಷ್ಟಿದ್ದು, ಭಾರತದಲ್ಲಿ ದರಗಳು ಶೇ.25ರಷ್ಟು ಏರಿಕೆಯಾಗಲಿವೆ ಎಂದು ಅಂದಾಜಿಸಲಾಗಿದೆ. ಅಲ್ಲದೇ ಅಮೆರಿಕದ ರಫ್ತು ಇಳಿಕೆಯಾಗಲಿದ್ದು, ದರಗಳು ಇನ್ನಷ್ಟು ಹೆಚ್ಚಳವಾಗುವ ಅವಕಾಶಗಳೂ ಇವೆ. ''ಈ ಸೇಬಿನ ಪ್ರಸಕ್ತ ಇಳುವರಿ ಅವಧಿಯು 2015ರ ಆಗಸ್ಟ್‌ನಿಂದ ಆರಂಭವಾಗಿದೆ. ಇಳುವರಿಯಲ್ಲಿ ಭಾರಿ ಕುಸಿತ ಉಂಟಾಗಿದೆ. 2014ನೇ ವರ್ಷಕ್ಕೆ ಹೋಲಿಸಿದರೆ ಉತ್ಪಾದನೆಯು 1.40 ಕೋಟಿ ಬಾಕ್ಸ್‌ಗಳಿಂದ(ಪ್ರತಿ ಬಾಕ್ಸ್‌ನಲ್ಲಿ 20 ಕೆ.ಜಿ) 1.16 ಕೋಟಿಗೆ ಇಳಿಕೆಯಾಗಿದೆ. ಕಳೆದ ವರ್ಷ ಅಮೆರಿಕದಿಂದ ಭಾರತಕ್ಕೆ 55 ಲಕ್ಷ ಬಾಕ್ಸ್‌ಗಳು ರಫ್ತಾಗಿದ್ದವು. ಆದರೆ ಈ ವರ್ಷ ಅದರ ಅರ್ಧದಷ್ಟು ಮಾತ್ರ ರಫ್ತಾಗಿವೆ,'' ಎಂದು ವಾಷಿಂಗ್ಟನ್‌ ಆ್ಯಪಲ್‌ ಕಮಿಷನ್‌ನ ಅಧ್ಯಕ್ಷ ಟೋಡ್‌ ಫ್ರೈಹೋವರ್‌ ಹೇಳಿದ್ದಾರೆ. ಮೆಕ್ಸಿಕೊ ಮತ್ತು ಕೆನಡಾ ಬಿಟ್ಟರೆ ವಾಷಿಂಗ್ಟನ್‌ ಸೇಬುಗಳಿಗೆ ಭಾರತವು ಮೂರನೇ ದೊಡ್ಡ ಮಾರುಕಟ್ಟೆಯಾಗಿದೆ.
↧
ವಾಷಿಂಗ್ಟನ್‌ ಸೇಬು ಇನ್ನಷ್ಟು ದುಬಾರಿ
↧