ವಾಷಿಂಗ್ಟನ್‌: ''ಹಣದುಬ್ಬರ ಇಳಿಕೆಯು ಇದೇ ರೀತಿ ಮುಂದುವರಿದು, ಮುಂಗಾರು ಮಳೆ ಉತ್ತಮವಾಗಿದ್ದ ಪಕ್ಷದಲ್ಲಿ ಮುಂದಿನ ದಿನಗಳಲ್ಲಿ ಬಡ್ಡಿ ದರದಲ್ಲಿ ಇನ್ನಷ್ಟು ಇಳಿಕೆ ಮಾಡಲಾಗುವುದು,'' ಎಂದು ಭಾರತೀಯ ರಿಸವ್‌ರ್‍ ಬ್ಯಾಂಕ್‌ ಗವರ್ನರ್‌ ರಘುರಾಮ್‌ ರಾಜನ್‌ ಹೇಳಿದ್ದಾರೆ. ''ಹಣದುಬ್ಬರ ಕುರಿತು ನಾವು ಗಮನ ಹರಿಸಿದ್ದೇವೆ. ಅದು ಮುಂದಿನ ದಿನಗಳಲ್ಲಿ ಮತ್ತೆ ಕುಸಿದರೆ, ಬಡ್ಡಿ ದರ ಇಳಿಕೆಗೆ ಇನ್ನೊಂದು ಸಂದರ್ಭ ಸೃಷ್ಟಿಯಾಗುತ್ತದೆ,'' ಎಂದು ಹೇಳಿದರು. ವಿಶ್ವ ಬ್ಯಾಂಕ್‌ ಮತ್ತು ಐಎಂಎಫ್‌ ಸಭೆಯಲ್ಲಿ ಪಾಲ್ಗೊಳ್ಳುವ ಸಲುವಾಗಿ ವಾಷಿಂಗ್ಟನ್‌ಗೆ ಬಂದಿರುವ ರಾಜನ್‌ ಅವರು, 'ವಾಲ್‌ ಸ್ಟ್ರೀಟ್‌ ಜರ್ನಲ್‌'ಗೆ ಸಂದರ್ಶನ ನೀಡಿದ್ದಾರೆ. ''ಉತ್ತಮ ಮುಂಗಾರಿನ ಲಕ್ಷಣಗಳು ಸದ್ಯಕ್ಕೆ ಕಾಣಿಸುತ್ತಿವೆ. ಭಾರತದಂಥ ದೇಶದಲ್ಲಿ ಮುಂಗಾರು ಮತ್ತು ಆಹಾರ ಪದಾರ್ಥಗಳಿಗೆ ನಂಟಿದೆ. ಜಾಗತಿಕ ಪ್ರಭಾವದಿಂದ ಕೆಲವು ದೇಶಗಳು ತತ್ತರಿಸಿದ್ದರೂ, ಎಲ್ಲವನ್ನೂ ನಿಭಾಯಿಸುವ ಶಕ್ತಿ ಭಾರತದ ಅರ್ಥ ವ್ಯವಸ್ಥೆಗೆ ಇದೆ,'' ಎಂದೂ ಅವರು ಅಭಿಪ್ರಾಯಪಟ್ಟರು. ಬಡ್ಡಿ ಕಡಿತಕ್ಕೆ ಒತ್ತಾಯ: ಕಳೆದ ತಿಂಗಳಷ್ಟೆ ಆರ್‌ಬಿಐ ಶೇ.0.25ರಷ್ಟು ಬಡ್ಡಿ ದರ ಇಳಿಕೆ ಮಾಡಿದ್ದು ಅದೀಗ ಶೇ.6.5 ತಲುಪಿದೆ. ಇದು ಕಳೆದ 5 ವರ್ಷಗಳಲ್ಲಿಯೇ ಕನಿಷ್ಠ ಮಟ್ಟದ್ದಾಗಿದೆ. 2015ರ ಜನವರಿಯಿಂದ ಈಚೆಗೆ ಒಟ್ಟಾರೆ ಶೇ.1.5ರಷ್ಟು ಬಡ್ಡಿ ದರವನ್ನು ಆರ್‌ಬಿಐ ಕಡಿತ ಮಾಡಿದೆ. ಹೂಡಿಕೆಯನ್ನು ಉತ್ತೇಜಿಸಲು ಆರ್‌ಬಿಐ ಮತ್ತಷ್ಟು ಬಡ್ಡಿ ದರ ಕಡಿತ ಮಾಡಬೇಕು ಎಂದು ಉದ್ಯಮ ವಲಯ ಅಪೇಕ್ಷಿಸಿದೆ. ಆರ್‌ಬಿಐ ಬಡ್ಡಿ ದರ ಕಡಿತದ ಲಾಭವನ್ನು ಕೆಲವು ಬ್ಯಾಂಕ್‌ಗಳು ಗ್ರಾಹಕರಿಗೆ ತಲುಪಿಸಿವೆ. ಗೃಹ ಮತ್ತು ವಾಹನ ಸಾಲಗಳ ಬಡ್ಡಿ ದರ ಇಳಿಸಲು ದಾರಿ ಮಾಡಿಕೊಟ್ಟಿದೆ. ಮತ್ತೊಂದು ಕಡೆ, ಇದೇ ಸೂತ್ರದನ್ವಯ ಕೇಂದ್ರ ಸರಕಾರವು ಸಣ್ಣ ಉಳಿತಾಯ ಯೋಜನೆಯ ಬಡ್ಡಿ ದರವನ್ನೂ ಕಡಿಮೆ ಮಾಡಿದೆ.
↧
ಇನ್ನಷ್ಟು ಬಡ್ಡಿ ದರ ಇಳಿಕೆ: ಆರ್‌ಬಿಐ
↧