ಸಿ.ಪಿ. ಯೋಗೇಶ್ವರ್‌ ಅವರಿಗೆ ಸೈನಿಕ ಚಿತ್ರ ಸಾಕಷ್ಟು ಹೆಸರು ತಂದುಕೊಟ್ಟಿತ್ತು. 2002ರಲ್ಲಿ ತೆರೆಕಂಡ ಈ ಚಿತ್ರದಲ್ಲಿ ಸಾಕ್ಷಿ ಶಿವಾನಂದ್‌ ನಾಯಕಿಯಾಗಿ ನಟಿಸಿದ್ದರು. ಇದಾದ ನಂತರ ಯೋಗೇಶ್ವರ್‌ ರಾಜಕೀಯದತ್ತ ಮುಖ ಮಾಡಿದ್ದರು. ಚಿತ್ರರಂಗದಿಂದ ದೂರ ಉಳಿದುಬಿಟ್ಟಿದ್ದರು. ಈಗ ಮತ್ತೆ ಸೈನಿಕನ ನೆನಪು ಅವರನ್ನು ಕಾಡುತ್ತಿರಬೇಕು. ಆದ್ದರಿಂದಲೇ ಮುಂದುವರಿದ ಭಾಗ ಮಾಡಲು ಮುಂದಾಗಿದ್ದಾರೆ. ನಟನೆಯತ್ತ ತಿರುಗಿದ್ದಾರೆ. ಚಿತ್ರದಲ್ಲಿ ಮುಖ್ಯ ಪಾತ್ರದಲ್ಲಿ ಅವರೇ ನಟಿಸಲಿದ್ದಾರೆ. ಈಗಾಗಲೇ ಚಿತ್ರದ ತಯಾರಿ ನಡೆಸಿದ್ದಾರೆ. ಇತ್ತೀಚೆಗೆ ನಡೆದ ಘಟನೆಯನ್ನು ಆಧರಿಸಿ ಸಿನಿಮಾ ಮಾಡಲಾಗುವುದಂತೆ.
ಮತ್ತೆ ಅವರು ಚಿತ್ರರಂಗಕ್ಕೆ ಮರಳುತ್ತಿರುವುದಕ್ಕೆ ಕಾರಣ ಇದುವರೆಗೂ ದೇಶದ ಸೈನಿಕರನ್ನು ಕುರಿತ ಸಂಪೂರ್ಣ ವಿವರದ ಚಿತ್ರ ಯಾರೂ ಮಾಡಿಲ್ಲ ಎನ್ನುವುದು. ಇತ್ತೀಚೆಗೆ ಪದೇ ಪದೇ ಸೈನಿಕರ ಸ್ಥಿತಿಗತಿ ಮತ್ತು ಸಾವು-ನೋವು ಹೆಚ್ಚು ಸುದ್ದಿಯಾಗುತ್ತಿದೆ. ಇದು ಅವರನ್ನು ಪುನಃ ಸೈನಿಕ ಸಿನಿಮಾ ಮಾಡುವಂತೆ ಪ್ರಚೋದಿಸಿದೆ. ಚಿತ್ರವನ್ನು ಮಿಲಿಟರಿ ಕ್ಯಾಂಪ್‌ನಲ್ಲಿ ಚಿತ್ರೀಕರಿಸಲು ಯೋಚಿಸಿದ್ದಾರೆ ಯೋಗೇಶ್ವರ್‌. ಇದಕ್ಕಾಗಿ ರಕ್ಷಣಾ ಸಚಿವರಿಂದ ಅನುಮತಿ ಪಡೆಯಲು ನಿರ್ಧರಿಸಿದ್ದಾರೆ.
ತಮ್ಮದೇ ಒಂದು ತಂಡವನ್ನು ಕಟ್ಟಿಕೊಂಡು ಚಿತ್ರದ ಪೂರ್ವಭಾವಿ ಸಿದ್ಧತೆಯನ್ನು ನಡೆಸಿರುವ ಅವರು ಉಳಿದ ಸಂಗತಿಗಳನ್ನು ಗುಟ್ಟಾಗಿಯೇ ಇಟ್ಟಿದ್ದಾರೆ.
ಬಣ್ಣದ ಲೋಕದಿಂದ ರಾಜಕೀಯಕ್ಕೆ ಕಾಲಿಟ್ಟ ಸಿ.ಪಿ. ಯೋಗೇಶ್ವರ್‌ ಈಗ ಮತ್ತೆ ಬೆಳ್ಳೆತೆರೆಯತ್ತ ಮುಖ ಮಾಡಿದ್ದಾರೆ. ಅದು ಕೂಡ ತಮ್ಮ ಅಭಿನಯದ ಸೈನಿಕ ಚಿತ್ರದ ಎರಡನೇ ಭಾಗ ಮಾಡುವ ಮೂಲಕ ಚಿತ್ರರಂಗಕ್ಕೆ ಮತ್ತೆ ಕಾಲಿಡಲಿದ್ದಾರೆ.