ಜುನಾಗಢ್‌ ಜಿಲ್ಲೆಯ ಬೊರ್ವಾವ್‌ ಗ್ರಾಮದ ರಮೇಶ್‌ ಸುವಾಗಿಯಾ (38) ಗುರುವಾರ ಬಂದರೆ ಸಾಕು ಎನ್ನುತ್ತಿದ್ದಾರೆ. ಆ ದಿನ ಮುಖಕ್ಕೆ ಮಸಿ ಬಳಿದುಕೊಂಡು ಕತ್ತೆ ಮೇಲೆ ಕೂತು ಭಿಕ್ಷೆ ಬೇಡುವ ಅವಕಾಶ ಎದುರು ನೋಡುತ್ತಿರುವ ಪೈಕಿ ಇವರೂ ಒಬ್ಬರು. ಈ ಪಟ್ಟಿ ದೊಡ್ಡದಿರುವ ಕಾರಣ ಹಲವಾರು ಮಂದಿ ವೇಟಿಂಗ್‌ ಲಿಸ್ಟ್‌ನಲ್ಲಿದ್ದಾರಂತೆ.
ಗ್ರಾಮದಲ್ಲಿ ಗುರುವಾರ ದುಲೇತಿ ಹಬ್ಬದ ವೇಳೆ 'ರಂಗ್‌' ಆಚರಣೆ ನಡೆಯಲಿದೆ. ಉತ್ತರಾಧಿಕಾರಿ ಅಂದರೆ ಗಂಡು ಮಕ್ಕಳು ಹುಟ್ಟಿದ ಖುಷಿಗೆ ಗ್ರಾಮದ ಗಂಡಸರು ಈ ರೀತಿ ಕತ್ತೆ ಮೇಲೆ ಮೆರವಣಿಗೆ ಹೋಗುವ ರೂಢಿ ಬಹಳ ಹಿಂದಿನಿಂದಲೂ ನಡೆದುಕೊಂಡುಬಂದಿದೆ.
ಮೊದಲಿಗೆ ಪಕ್ಷಿಗಳಿಗೆ ಆಹಾರ ಉಣಿಸಲು ಈ ರೀತಿ ಹಣ ಸಂಗ್ರಹಿಸುವ ಆಚರಣೆ ರೂಢಿಯಲ್ಲಿತ್ತು. ನಂತರದ ದಿನಗಲ್ಲಿ ಗಂಡು ಮಕ್ಕಳ ಜನನಕ್ಕೂ ಈ ರೀತಿ ಮೆರವಣಿಗೆ ನಡೆಯುವ ಪದ್ಧತಿ ಜಾರಿಯಲ್ಲಿದೆ.
ಗಂಡು ಮಗು ಹುಟ್ಟಿದರೆ, ಮಸಿ ಬಳಿದುಕೊಂಡು ಕತ್ತೆ ಮೇಲೆ ಮೆರವಣಿಗೆ ಹೋಗಿ ಭಿಕ್ಷೆ ಬೇಡುವುದಾಗಿ ಹರಕೆ ಹೊರುವ ಗಂಡಸರ ಸಂಖ್ಯೆಯೂ ಹೆಚ್ಚಿದೆ.
'ಇಬ್ಬರು ಹೆಣ್ಣು ಮಕ್ಕಳಿದ್ದಾರೆ. ಗಂಡು ಮಗು ಜನಿಸಿದರೆ ಈ ಪದ್ಧತಿ ಪಾಲಿಸುವುದಾಗಿ ಹೇಳಿಕೊಂಡಿದ್ದೆ. ಕಳೆದ ವರ್ಷ ಪತ್ನಿ ಮಗನಿಗೆ ಜನ್ಮ ನೀಡಿದ್ದಾಳೆ. ಹಾಗಾಗಿ ಈ ವರ್ಷ ಕತ್ತೆ ಮೆರವಣಿಗೆ ಮಾಡುತ್ತಿದ್ದಾನೆ,'ಎನ್ನುತ್ತಾರೆ ರಮೇಶ್‌.
'ಬದಲಾದ ಕಾಲಮಾನದಲ್ಲಿ, ಹೆಣ್ಣು ಮಗು ಜನಿಸಿದರೆ 'ರಂಗ್‌'ಆಚರಿಸುವಂತೆ ಮಕ್ಕಳಿಲ್ಲದ ದಂಪತಿಗಳಿಗೆ ಸಲಹೆ ನೀಡಲಾಗುತ್ತಿದೆ,'ಎಂದು ಸರಪಂಚ್‌ ಪ್ರವೀಣ್‌ ವಾಡಿ ಹೇಳಿದ್ದಾರೆ.
ಅಹಮದಾಬಾದ್‌: ಮುಖಕ್ಕೆ ಮಸಿ ಬಳಿದು, ಚಪ್ಪಲಿ ಹಾರ ಹಾಕಿ, ಕತ್ತೆ ಮೇಲೆ ಮೆರವಣಿಗೆ ಮಾಡುತ್ತಿದ್ದಾರೆ ಎಂದರೆ, ಆತ ಮಾಡಬಾರದ ಕೆಲಸ ಮಾಡಿದ್ದಾನೆ ಎಂದೇ ಅರ್ಥ. ಆದರೆ, ಗುಜರಾತ್‌ನ ಹಳ್ಳಿಯಲ್ಲಿ ಮಾತ್ರ ಇಂಥ ಮೆರವಣಿಗೆಗೂ ಭಾರಿ ಡಿಮ್ಯಾಂಡ್‌ ಇದೆಯಂತೆ.