ಶ್ರೀನಗರದಲ್ಲಿ ಹಾರಿದ ಪಾಕ್ ಧ್ವಜ

ಶ್ರೀನಗರ: ಪಾಕಿಸ್ತಾನ ದಿನವಾದ ಬುಧವಾರ ಶ್ರೀನಗರದ ನಾನಾ ಕಡೆ ಪಾಕಿಸ್ತಾನದ ಬಾವುಟಗಳು ರಾರಾಜಿಸಿದವು. ಕಾಶ್ಮೀರದ ಪ್ರತ್ಯೇಕತಾವಾದಿ ನಾಯಕಿ ಆಸಿಯಾ ಅಂದ್ರಾಬಿ ನಾಯಕತ್ವದ ದುಖ್ತರನ್ - ಎ - ಮಿಲ್ಲತ್ (ಡಿಇಎಂ) ಸಂಘಟನೆಯ ಕಾರ್ಯಕರ್ತರು ಈ ಕೃತ್ಯ ಎಸಗಿದ್ದಾರೆ. ಶ್ರೀನಗರದ ಲಾಲ್ ಚೌಕ್ ಸೇರಿದಂತೆ ಹಲವು ಕಡೆಗಳಲ್ಲಿ ಡಿಇಎಂ ಕಾರ್ಯಕರ್ತರು ಧ್ವಜ ಹಾರಿಸಿದ್ದರು ಎಂದು ಪೊಲೀಸ್ ಅಧಿಕಾರಿಗಳು ಮಾಹಿತಿ ನೀಡಿದ್ದು,

ಡೌನ್‌ಟೌನ್ ಮತ್ತು ಸಿವಿಲ್ ಲೈನ್ಸ್ ಪ್ರದೇಶಗಳಲ್ಲೂ ಪಾಕ್ ಧ್ವಜ ಹಾರಿಸಲಾಗಿದೆ ಎಂದು ತಿಳಿಸಿದ್ದಾರೆ. ವಿಷಯ ತಿಳಿಯುತ್ತಿದ್ದಂತೆ ಶ್ರೀನಗರ ಪೊಲೀಸರು, ಧ್ವಜಗಳನ್ನು ತೆರವುಗೊಳಿಸಿದ್ದಾರೆ. ಪ್ರತಿ ವರ್ಷ ಪಾಕಿಸ್ತಾನ ದಿನ'ವಾದ ಮಾರ್ಚ್ 23 ಹಾಗೂ ಪಾಕಿಸ್ತಾನದ ಸ್ವಾತಂತ್ರ್ಯ ದಿನ ಆಗಸ್ಟ್ 14ರಂದು ಡಿಇಎಂ ಕಾರ್ಯಕರ್ತರು ಪಾಕಿಸ್ತಾನದ ಧ್ವಜ ಹಾರಿಸುತ್ತಲೇ ಇದ್ದಾರೆ. ಕಳೆದ ವರ್ಷ ಡಿಇಎಂ ನಾಯಕಿ ಆಸಿಯಾ ಅಂದ್ರಾಬಿ ವಿರುದ್ಧ ಕಾನೂನು ಬಾಹಿರ ಚಟುವಟಿಕೆಗಳ ನಿಯಂತ್ರಣ ಕಾಯಿದೆಯಡಿ ಪ್ರಕರಣ ದಾಖಲಿಸಲಾಗಿತ್ತು.