ಈವರೆಗೂ ಡಬ್ಬಿಂಗ್ ಪರ ಮತ್ತು ವಿರೋಧದ ಹೋರಾಟ ಕೇವಲ ಚರ್ಚೆಗೆ ಸೀಮಿತವಾಗಿತ್ತು. ಅದು ಈಗ ಕಾರ್ಯರೂಪಕ್ಕೂ ಬಂದಿದೆ. ರಾಮ್‌ಗೋಪಾಲ್ ವರ್ಮಾ ನಿರ್ದೇಶನದ ತೆಲುಗಿನ 'ಐಸ್‌ಕ್ರೀಮ್ ಪಾರ್ಟ್-1'ಸಿನಿಮಾ ಕನ್ನಡಕ್ಕೆ ಡಬ್ ಆಗಿದೆ. 'ಐಸ್ ಫ್ರೂಟ್' ಹೆಸರಿನಲ್ಲಿ ಈ ಚಿತ್ರವನ್ನು ಯೂ ಟ್ಯೂಬ್‌ನಲ್ಲಿ ರಿಲೀಸ್ ಮಾಡಿದ್ದು, ಡಬ್ಬಿಂಗ್ ಪರ ಮತ್ತು ವಿರೋಧದ ಹೋರಾಟಕ್ಕೆ ಮತ್ತೆ ಜೀವ ಬಂದಿದೆ.
ವಾಲ್ಗೋ ವಿಡಿಯೋ ಹೆಸರಿನ ಸಂಸ್ಥೆಯು ಗುರುವಾರ (ಮಾರ್ಚ್ 17) 'ಐಸ್ ಫ್ರೂಟ್' ಡಬ್ಬಿಂಗ್ ಚಿತ್ರವನ್ನು ಯೂ ಟ್ಯೂಬ್‌ನಲ್ಲಿ ರಿಲೀಸ್ ಮಾಡಿದೆ. ಅದಾದ ಕೆಲವೇ ಗಂಟೆಗಳಲ್ಲಿ ಈ ಕುರಿತು ಪರ ಮತ್ತು ವಿರೋಧ ಅಭಿಪ್ರಾಯ ವ್ಯಕ್ತವಾಗಿದೆ.
ಯೂ ಟ್ಯೂಬ್‌ನಲ್ಲಿ ಡಬ್ಬಿಂಗ್ ಸಿನಿಮಾ ಬಿಡುಗಡೆ ಆಗಿದ್ದನ್ನು ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿಯ ಅಧ್ಯಕ್ಷ ಕೃಷ್ಣೇಗೌಡ ಸ್ವಾಗತಿಸಿದ್ದಾರೆ. ಇದೊಂದು ಒಳ್ಳೆಯ ಬೆಳವಣಿಗೆ ಅಂದಿದ್ದಾರೆ.
'ನಾನು ಕೂಡ ಈಗಾಗಲೇ ಮೂರು ಚಿತ್ರಗಳನ್ನು ಕನ್ನಡಕ್ಕೆ ಡಬ್ ಮಾಡಿ, ಸೆನ್ಸಾರ್‌ಗೆ ಕಳುಹಿಸಿದ್ದೇವೆ. ಸೆನ್ಸಾರ್ ಮಂಡಳಿಯ ಅಧಿಕಾರಿಗಳು ವಿಳಂಬ ಮಾಡುತ್ತಿದ್ದಾರೆ. ಅವರು ಸಕಾರಾತ್ಮಕವಾಗಿ ಸ್ಪಂದಿಸುತ್ತಾರೆ ಅನ್ನುವ ನಂಬಿಕೆ ನಮಗಿನ್ನೂ ಇದೆ. ಸೆನ್ಸಾರ್ ಮಾಡಲಿಲ್ಲ ಅಂದರೆ, ಬುಧವಾರ ಹೈಕೋರ್ಟ್ ಮೆಟ್ಟಿಲು ಏರುತ್ತೇವೆ' ಅಂತಾರೆ ಕೃಷ್ಣೇಗೌಡ.
ಈಗಾಗಲೇ ಡಬ್ಬಿಂಗ್ ವಾಣಿಜ್ಯ ಮಂಡಳಿಗೆ 130ಕ್ಕೂ ಹೆಚ್ಚು ಸದಸ್ಯರು ಹೆಸರು ನೋಂದಾಯಿಸಿದ್ದಾರಂತೆ. ಅವರೆಲ್ಲರೂ ಡಬ್ಬಿಂಗ್ ಸಿನಿಮಾ ಮಾಡಲು ಮುಂದಾಗಿದ್ದಾರೆ ಅನ್ನುವುದು ಡಬ್ಬಿಂಗ್ ವಾಣಿಜ್ಯ ಮಂಡಳಿಯ ಅಧ್ಯಕ್ಷರ ಮಾತು. 'ಸದ್ಯ ಪ್ರಯೋಗ ಎನ್ನುವಂತೆ ಮೂರು ಚಿತ್ರಗಳನ್ನು ಡಬ್ ಮಾಡಿ, ರಿಲೀಸ್ ಮಾಡುತ್ತೇವೆ. ನಂತರ ಇತರ ಚಿತ್ರಗಳ ಕಾರ‌್ಯವನ್ನು ಕೈಗೆತ್ತಿಕೊಳ್ಳುತ್ತೇವೆ' ಅಂತಾರೆ.
ಡಬ್ಬಿಂಗ ಪರ ಕಾನೂನಾತ್ಮಕವಾಗಿ ಹೋರಾಟ ಮಾಡುತ್ತಾ ಬಂದಿರುವ ಬನವಾಸಿ ಬಳಗದ ಆನಂದ್ ಜಿ ಕೂಡ ಈ ಬೆಳವಣಿಗೆಯನ್ನು ಸ್ವಾಗತಿಸಿದ್ದಾರೆ. 'ಇದು ಆಯ್ಕೆ ಸ್ವಾಂತಂತ್ರ್ಯಕ್ಕೆ ದಕ್ಕಿದ ಸಣ್ಣ ಜಯ. ಯೂ ಟ್ಯೂಬ್‌ನಲ್ಲಿ ಮಾತ್ರವಲ್ಲ ಥಿಯೇಟರ್‌ನಲ್ಲೂ ಡಬ್ಬಿಂಗ್ ಚಿತ್ರಗಳು ರಿಲೀಸ್ ಆಗಬೇಕು. ನೋಡುಗನಿಗೆ ತಾನು ಬಯಸಿದ ಸಿನಿಮಾ ಸಿಗುವಂತಾಗಬೇಕು. ಮುಂದೆ ದೊಡ್ಡ ಮಟ್ಟದಲ್ಲಿ ಗೆಲ್ಲುತ್ತೇವೆ ಅನ್ನುವ ವಿಶ್ವಾಸ ನಮ್ಮದು' ಅಂತಾರೆ.
'ಯೂ ಟ್ಯೂಬ್‌ನಲ್ಲಿ ಬಿಡುಗಡೆಯಾಗಿರುವ ವಿಷಯ ನಮಗೇನೂ ಗೊತ್ತಿಲ್ಲ. ತಿಳಿದುಕೊಂಡು ಪ್ರತಿಕ್ರಿಯಿಸುತ್ತೇನೆ. ಅಲ್ಲದೇ ಡಬ್ಬಿಂಗ್ ವಿಚಾರದ ಬಗ್ಗೆ ಚರ್ಚೆ ಆಗಬೇಕಿದೆ' ಅಂತಾರೆ ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿಯ ಅಧ್ಯಕ್ಷ ಸಾ.ರಾ.ಗೋವಿಂದ್.
'ನಾನೂ ಕೂಡ ಆ ಸಿನಿಮಾ ನೋಡಿದೆ. ಡಬ್ಬಿಂಗ್ ಸಿನಿಮಾ ಬಂದರೆ, ಕನ್ನಡ ಭಾಷೆಯನ್ನು ಹೇಗೆಲ್ಲ ಕೊಲೆ ಮಾಡುತ್ತಾರೆ ಅನ್ನುವುದಕ್ಕೆ ಉತ್ತಮ ನಿದರ್ಶನವಿದು. ಡಬ್ಬಿಂಗ್ ವಿಷಯ ಬಂದಾಗ ನಾನು ಪ್ರತಿ ಬಾರಿ ಹೇಳುತ್ತಿದ್ದೆ, ಡಬ್ಬಿಂಗ್ ಅನ್ನುವುದು ಕಲಾಕೃತಿಯನ್ನು ವಿಕೃತಿ ಮಾಡುವ ಕೆಲಸ ಅಂತ. ಐಸ್ ಫ್ರೂಟ್ ಸಿನಿಮಾದಲ್ಲಿನ ಭಾಷೆ ನೋಡಿದರೆ, ಅದು ನಿಜವಾಗಿದೆ. ಡಬ್ಬಿಂಗ್ ಸಿನಿಮಾಗಳು ಯೂ ಟ್ಯೂಬ್‌ನಲ್ಲಿ ರಿಲೀಸ್ ಆಗಿದ್ದು, ಇದು ಮೊದಲೇನೂ ಅಲ್ಲ. ಈಗಾಗಲೇ ಹಿತ್ತಲ ಬಾಗಿಲಿನಿಂದ ಹಲವು ಚಿತ್ರಗಳನ್ನು ಡಬ್ ಮಾಡಿದ್ದಾರೆ. ಭಾಷೆಯನ್ನು ಹಾಳುಗೆಡೆಸಿದ್ದಾರೆ. ನೋಡುಗರೂ ಅದೇ ರೀತಿಯಲ್ಲೇ ಅಂತಹ ಚಿತ್ರಗಳನ್ನು ತಿರಸ್ಕರಿಸಿದ್ದಾರೆ. ಡಬ್ಬಿಂಗ್ ಅನ್ನುವುದು ಕನ್ನಡದ ಮೇಲೆ ಆಗುತ್ತಿರುವ ಅತ್ಯಾಚಾರ' ಅಂತಾರೆ ನಿರ್ದೇಶಕ ಬಿ.ಸುರೇಶ.
ಈ ಹಿಂದೆ ಲವಲವಿಕೆ ಕೂಡ ಡಬ್ಬಿಂಗ್ ಕುರಿತಾಗಿ ಸಂವಾದ ಏರ್ಪಡಿಸಿತ್ತು. ರವಿಚಂದ್ರನ್, ಶ್ರುತಿ, ಕೃಷ್ಣೇಗೌಡ, ಆನಂದ್, ಲಕ್ಷ್ಮೀ ಹೆಗಡೆ ಸೇರಿದಂತೆ ಪರ ಮತ್ತು ವಿರೋಧಿ ಹೋರಾಟಗಾರರು ಈ ಸಂವಾದಲ್ಲಿ ಪಾಲ್ಗೊಂಡಿದ್ದರು. 'ಡಬ್ಬಿಂಗ್ ಪ್ರೇಕ್ಷಕರ ಆಯ್ಕೆ. ಅದನ್ನು ಅವರೇ ತೀರ್ಮಾನಿಸಲಿ' ಅನ್ನುವ ಒಮ್ಮತದ ಮಾತೂ ಆವಾಗ ಕೇಳಿ ಬಂದಿತ್ತು. ಸದ್ಯ ರಿಲೀಸ್ ಆಗಿರುವ ಚಿತ್ರವನ್ನು ನೋಡುಗರು ಹೇಗೆ ಸ್ವೀಕರಿಸುತ್ತಾರೆ ಅನ್ನುವ ಕುತೂಹಲವಂತೂ ಮೂಡಿದೆ.
-----
ಡಬ್ಬಿಂಗ್ ಅನ್ನುವುದು ಕಲಾಕೃತಿಯನ್ನು ವಿಕೃತಿ ಮಾಡುವ ಕೆಲಸ. ಹಿಂಬಾಗಿಲಿನಿಂದ ಇಂಥ ಚಿತ್ರಗಳು ಬಿಡುಗಡೆ ಆಗುತ್ತಿದ್ದು, ಭಾಷೆಯನ್ನು ಹಾಳುಗೆಡುವುತ್ತಿದೆ.
* ಬಿ. ನಾಗೇಶ್, ನಿರ್ದೆಶನ.
ನನ್ನ ಡಬ್ಬಿಂಗ್ ಚಿತ್ರಗಳು ಸೆನ್ಸಾರ್ ಮುಂದಿವೆ. ಅಲ್ಲಿನ ಅಧಿಕಾರಿಗಳು ತಡ ಮಾಡುತ್ತಿದ್ದಾರೆ. ಇನ್ನೂ ವಿಳಂಬ ಮಾಡಿದರೆ ಹೈಕೋರ್ಟ್‌ಗೆ ಹೋಗುತ್ತೇನೆ.
* ಕೃಷ್ಣೇಗೌಡ, ಡಬ್ಬಿಂಗ್ ವಾಣಿಜ್ಯಮಂಡಳಿ ಅಧ್ಯಕ್ಷ.
ಡಬ್ಬಿಂಗ್ ಚಿತ್ರ ಯೂಟ್ಯೂಬ್‌ನಲ್ಲಿ ಬಿಡುಗಡೆ ಆಗಿದೆಯಾ? ನಾನು ಅದನ್ನು ವೀಕ್ಷಿಸಿ ಪ್ರತಿಕ್ರಿಸುತ್ತೇನೆ.
* ಸಾ.ರಾ. ಗೋವಿಂದ್, ಅಧ್ಯಕ್ಷ, ಚಲನಚಿತ್ರ ಮಂಡಳಿ.
* ಶರಣು ಹುಲ್ಲೂರು