ಏಕ ಶ್ರೇಣಿ ಏಕ ಪಿಂಚಣಿ ಯೋಜನೆ ವಿಷಯದಲ್ಲಿ ಪ್ರತಿಭಟನಾನಿರತ ನಿವೃತ್ತ ಯೋಧರು ಪದಕ ವಾಪ್ಸಿ ಪ್ರತಿಭಟನೆಯ ಬೆದರಿಕೆ ಹಾಕಿರುವ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿದ ಪರಿಕರ್, ''ಮಾಜಿ ಯೋಧರ ಗರಿಷ್ಠ ಬೇಡಿಕೆಯಾದ ಏಕ ಶ್ರೇಣಿ ಏಕ ಪಿಂಚಣಿ ಯೋಜನೆ ಜಾರಿಗೆ ಅಧಿಸೂಚನೆ ಹೊರಡಿಸಲಾಗಿದೆ. ವಿಆರ್‌ಎಸ್ ಕುರಿತ ಗೊಂದಲವನ್ನೂ ಪರಿಹರಿಸಿದ್ದೇವೆ. ಇನ್ನುಳಿದ ಸಮಸ್ಯೆಗಳ ಬಗ್ಗೆ ಗಮನ ಹರಿಸಲು ನ್ಯಾಯಸಮಿತಿಯನ್ನು ರಚಿಸಲಾಗುತ್ತದೆ. ಆದರೆ, ಈ ಹಂತದಲ್ಲಿ ಅಧಿಸೂಚನೆಯನ್ನು ಧಿಕ್ಕರಿಸಿ ಪ್ರತಿಭಟನೆಗಿಳಿಯುವುದು ತರವಲ್ಲ. ಬಹುತೇಕ ಎಲ್ಲ ಬೇಡಿಕೆಗಳನ್ನು ಮಾನವೀಯ ನೆಲೆಯಲ್ಲಿ ಒಪ್ಪಿಕೊಂಡ ನಂತರ ಹೊಸಹೊಸ ಬೇಡಿಕೆಗಳನ್ನು ಮಂಡಿಸುತ್ತಾ ಸಾಗುವುದು ಸರಿಯಲ್ಲ,'' ಎಂದರು.
ಇದೇ ವೇಳೆ ಮಾತನಾಡಿದ ವಾಯುಸೇನೆಯ ಮುಖ್ಯಸ್ಥ ಅರೂಪ್ ರಹಾ, ಯೋಜನೆ ವಿಷಯದಲ್ಲಿ ಸರಕಾರ ನಿರ್ದೇಶನಗಳನ್ನು ನೀಡಿದೆ. ಎಲ್ಲರೂ ಇದನ್ನು ಒಪ್ಪಿಕೊಳ್ಳಬೇಕು ಎಂದಿದ್ದಾರೆ.
ಶನಿವಾರ ಕೇಂದ್ರ ಸರಕಾರ ಏಕ ಶ್ರೇಣಿ, ಏಕ ಪಿಂಚಣಿ ಯೋಜನೆಯನ್ನು ಅಧಿಕೃತವಾಗಿ ಘೋಷಿಸಿತ್ತು. ಇದು ದೇಶದ 24 ಲಕ್ಷ ಮಾಜಿ ಸೈನಿಕರಿಗೆ ಹಾಗೂ 6 ಲಕ್ಷ ಹುತಾತ್ಮರ ಪತ್ನಿಯರಿಗೆ ಅನ್ವಯವಾಗುತ್ತದೆ.
ಹೊಸದಿಲ್ಲಿ: ''ಪ್ರಜಾಪ್ರಭುತ್ವದಲ್ಲಿ ಬೇಡಿಕೆ ಇಡಲು ಎಲ್ಲರಿಗೂ ಅವಕಾಶವಿದೆ. ಹಾಗೆಂದು ಎಲ್ಲ ಬೇಡಿಕೆಗಳನ್ನೂ ಈಡೇರಿಸಲಾಗುವುದಿಲ್ಲ,'' ಎಂದು ರಕ್ಷಣಾ ಸಚಿವ ಮನೋಹರ್ ಪರಿಕರ್ ಸೋಮವಾರ ಹೇಳಿದ್ದಾರೆ.