ಟಾಲಿವುಡ್‌ನ ಹಿರಿಯ ನಟ ಜಗಪತಿ ಬಾಬು ತಮ್ಮನ್ನು ಭಿನ್ನ ಪಾತ್ರಗಳಿಗೆ ಒಡ್ಡಿಕೊಳ್ಳುತ್ತಿದ್ದಾರೆ. ಅವರೀಗ ವಿಶಿಷ್ಟ ಪಾತ್ರವೊಂದರ ಮೂಲಕ ಮಲಯಾಳಂ ಚಿತ್ರಜಗತ್ತನ್ನು ಪ್ರವೇಶಿಸುತ್ತಿದ್ದಾರೆ! ಮೋಹನ್‌ಲಾಲ್ ಅಭಿನಯದ 'ಪುಲಿ ಮುರುಗನ್' ಚಿತ್ರದಲ್ಲಿ ಜಗಪತಿ ಬಾಬು ಖಳಪಾತ್ರದಲ್ಲಿ ನಟಿಸುವುದು ಖಾತ್ರಿಯಾಗಿದೆ. ಬಾಲಕೃಷ್ಣ ಹೀರೋ ಆಗಿ ನಟಿಸಿದ್ದ 'ಲೆಜೆಂಡ್' ತೆಲುಗು ಸಿನಿಮಾ ಜಗಪತಿ ಬಾಬು ವೃತ್ತಿಬದುಕಿಗೆ ದೊಡ್ಡ ತಿರುವು ನೀಡಿತು. ಇದಾದ ನಂತರ ಅವರು ಟಾಲಿವುಡ್‌ನ ಸ್ಟಾರ್ ಹೀರೋಗಳ ಚಿತ್ರಗಳ ಖಳನಾಗಿ ಘರ್ಜಿಸತೊಡಗಿದರು. ಖಳನಾಗಿ ಮಾತ್ರವಲ್ಲ, ಅಪ್ಪನ ಪಾತ್ರಗಳು ಕೂಡ ಅವರಿಗೆ ಹೆಸರು ತಂದುಕೊಟ್ಟವು. ಇತ್ತೀಚೆಗೆ ಅವರು ಪ್ರಮುಖ ಪಾತ್ರವೊಂದರಲ್ಲಿ ಕಾಣಿಸಿಕೊಂಡಿದ್ದ 'ನನ್ನಕು ಪ್ರೇಮತೋ' ತೆಲುಗು ಸಿನಿಮಾ ಕೇರಳದಲ್ಲಿ ಉತ್ತಮ ಪ್ರದರ್ಶನ ಕಂಡಿತ್ತು. ಇದರಿಂದ ಪ್ರೇರಿತರಾಗಿರುವ ಮಾಲಿವುಡ್ ನಿರ್ಮಾಪಕರು ತಮ್ಮ ಸಿನಿಮಾಗಳ ಮಹತ್ವದ ಪಾತ್ರಗಳಿಗೆ ಜಗಪತಿ ಬಾಬುರನ್ನು ಕರೆಯುತ್ತಿದ್ದಾರೆ. ಈ ಯಾದಿಯಲ್ಲಿ 'ಪುಲಿ ಮುರುಗನ್' ಅವರಿಗೆ ಮೊದಲ ಸಿನಿಮಾ. ವೈಶಾಖ್ ನಿರ್ದೇಶನದ ಚಿತ್ರದಲ್ಲಿ ಅವರು ಖಳನಾಗಿ ವಿಜೃಂಭಿಸಲಿದ್ದಾರೆ.