ಆನೆಯ ರೌದ್ರಾವತಾರಕ್ಕೆ ವಾಹನಗಳು ಪುಡಿ

ಪಾಲಕ್ಕಾಡ್: ಸಾಕಾನೆಯೊಂದು ಇದ್ದಕ್ಕಿದ್ದಂತೆ ಮದವೇರಿದ ಮದ್ದಾನೆಯಂತೆ ದಾಳಿ ನಡೆಸಿ ಜನರನ್ನು ಭೀತಿಗೊಳಿಸಿದ ಘಟನೆ ಕೇರಳದ ಪಾಲಕ್ಕಾಡ್‌ನಲ್ಲಿ ನಡೆದಿದೆ.

ಮಾವುತ ಬೆನ್ನ ಮೇಲಿದ್ದಾಗಲ್ಲೇ, ಗಜರಾಯ ತೋರಿದ ರೌದ್ರಾವತಾರಕ್ಕೆ ರಸ್ತೆಯ ಇಕ್ಕೆಲಗಳಲ್ಲಿ ಸಾಲಾಗಿ ನಿಲ್ಲಿಸಿದ್ದ 25ಕ್ಕೂ ಹೆಚ್ಚು ವಾಹನಗಳು ಜಖಂಗೊಂಡಿವೆ. ಪಾಲಕ್ಕಾಡ್‌ನ ರಸ್ತೆಯೊಂದರಲ್ಲಿ ಶಾಂತವಾಗಿಯೇ ಬರುತ್ತಿದ್ದ ಆನೆಗೆ ಅದೇನಾಯಿತೋ ಏನೋ ಇದ್ದಕ್ಕಿದ್ದಂತೆ ತಾಳ್ಮೆ ಕಳೆದುಕೊಂಡು ತನ್ನ ಸೊಂಡಿಲು ಬೀಸಿ ಬೈಕ್, ಆಟೊ ರಿಕ್ಷಾಗಳನ್ನು ಪುಡಿಗಟ್ಟಿಸಿತು. ಇದರಿಂದ ಸ್ಥಳದಲ್ಲಿ ಕೆಲಹೊತ್ತು ಆತಂಕದ ವಾತಾವರಣ ನಿರ್ಮಾಣಗೊಂಡಿತ್ತು. ಜನ ದಿಕ್ಕಾಪಾಲಾಗಿ ಓಡತೋಡಗಿದರು. ಅದೃಷ್ಟವಶಾತ್ ಜೀವಹಾನಿ ಸಂಭವಿಸಿಲ್ಲ.

ಮಾವುತ ಆನೆಯನ್ನು ಹತೋಟಿಗೆ ತರಲು ಹರಸಾಹಸ ಪಟ್ಟರೂ ಪ್ರಯೋಜನವಾಗಲಿಲ್ಲ. ನಂತರ ಅದೇ ಶಾಂತವಾಯಿತು ಎಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದ್ದಾರೆ. ಆನೆ ಒಮ್ಮೆಲೆ ಈ ರೀತಿ ಉಗ್ರಾವತಾರ ತಾಳಲು ಕಾರಣವೇನೆಂಬುದು ತಿಳಿದುಬಂದಿಲ್ಲ .