ಅತಿಂದ್ರೀಯ ಶಕ್ತಿ ಸಂಪನ್ನರಾದ ನಮ್ಮ ಋಷಿಗಳು ತಾರಾ ಗ್ರಹಗಳಾದ ಸಪ್ತ ಗ್ರಹಗಳನ್ನು ಈ ದಿನದ ಸೂರ್ಯೋದಯದಿಂದ ಮರು ದಿನದ ಸೂರ್ಯೋದವರೆಗಿನ ಒಟ್ಟು ಕಾಲಕ್ಕೆ ಒಂದೊಂದು ಹೋರಾಗೆ ಒಂದೊಂದು ಗ್ರಹದಂತೆ ಹೋರಾಧಿಪತಿಗಳಾಗಿ ಮಾಡಿರುತ್ತಾರೆ. ಪ್ರಥಮ ವಾರವಾದ ಭಾನುವಾರದಿಂದ ಪ್ರಥಮ ಗ್ರಹವಾದ ಸೂರ್ಯ ಹೋರಾವು ಸೂರ್ಯೋದಯದ ನಂತರ ಪ್ರಾರಂಭವಾಗುತ್ತದೆ. ಇದಕ್ಕೆ ಸಂಬಂಧಿಸಿದಂತೆ ಸೂತ್ರವೊಂದನ್ನು ರೂಪಿಸಲಾಗಿದೆ.
'ಅರ್ಕ ಶುಕ್ರ ಬುಧ:ಚಂದ್ರೋ ಮಂದೋ ಜಿವ ಧರಾಸುತಃ (ರವಿ, ಶುಕ್ರ, ಬುಧ, ಚಂದ್ರ, ಶನಿ, ಗುರು, ಕುಜ)
ದಿನದ 24 ಗಂಟೆಗಳಿಗೆ ಈ 7 ಹೋರಾಗಳನ್ನು ಕ್ರಮವಾಗಿ ಹಂಚಲಾಗಿದೆ. ಮರು ದಿನವೂ ಹಾಗೆಯೇ ಕ್ರಮವಾಗಿ ಮುಂದಕ್ಕೆ ಸಾಗುತ್ತದೆ.
ಉಪಯೋಗ:
ಶುಭ ಹೋರಗಳಾದ ಪೂರ್ಣ ಚಂದ್ರ, ಬುಧ, ಗುರು, ಶುಕ್ರ, ಹೋರಾಗಳಲ್ಲಿ ಎಲ್ಲ ಶುಭ ಕಾರ್ಯಗಳನ್ನೂ ಮಾಡಬಹುದು.
ಈ ಹೋರಾಗಳನ್ನು ಧನ ಸಂಪತ್ತನ್ನು ತಿಳಿಯಲು ಉಪಯೋಗಿಸುತ್ತಾರೆ. ಇದಕ್ಕೆ ಸಂಪತ್ ಹೋರಾ ಎಂದೂ ಕರೆಯುತ್ತಾರೆ.
ರಾಶಿ ಚಕ್ರದಲ್ಲಿ ಹೋರಾ:
ಪ್ರತಿ ರಾಶಿಯನ್ನು ಎರಡು ಸಮ ಭಾಗಗಳನ್ನಾಗಿ ಮಾಡಿದಾಗ ಒಂದೊಂದು ಭಾಗವೂ 15 ಡಿಗ್ರಿ ಹೊಂದುತ್ತದೆ. ಒಂದೊಂದು ಭಾಗವೂ ಒಂದೊಂದು ಹೋರಾವಾಗಿ ಒಂದು ರಾಶಿಗೆ 2 ಹೋರಾಗಳಾಗುತ್ತವೆ. ಮೊದಲನೆ ಹೋರಾಗೆ ಸೂರ್ಯನು ಹಾಗೂ ಎರಡನೇ ಹೋರಾಗೆ ಚಂದ್ರನು ಹೋರಾದಿಪತಿಯಾಗುತ್ತಾನೆ. ಹಾಗೆಯೇ ಸಮ ರಾಶಿಯಲ್ಲಿ ಮೊದಲನೆ ಹೋರಾಗೆ ಚಂದ್ರನೂ ಹಾಗೂ ಎರಡನೇ ಹೋರಾಗೆ ಸೂರ್ಯನು ಹೋರಾಧಿಪತಿಯಾಗುತ್ತಾರೆ.
ಅಕ್ಷ ಭ್ರಮಣೆಯಿಂದ ಈ ಭೂಮಿಯ ಮೇಲೆ ಹಗಲು ಮತ್ತು ರಾತ್ರಿ ಉಂಟಾಗುತ್ತವೆ. ಪಥ ಪರಿಭ್ರಮಣೆಯಿಂದ ಈ ಭೂಮಿಯ ಮೇಲೆ ಋತುಗಳು ಮತ್ತು ವರ್ಷಗಳು ಉಂಟಾಗುತ್ತವೆ. ಒಂದು ದಿನದಲ್ಲಿ ಉಂಟಾಗುವ ಹಗಲು ರಾತ್ರಿಗಳಿಗೆ 'ಅಹೋ ರಾತ್ರಿ' ಎಂದು ಕರೆಯುತ್ತಾರೆ. ಈ ಸಂಸ್ಕೃತ ಪದದ ಮೊದಲ ಅಕ್ಷರ 'ಅ' ಹಾಗೂ ಕೊನೆಯ ಅಕ್ಷರ 'ತ್ರ'ವನ್ನು ಬಿಟ್ಟರೆ ಮಧ್ಯದಲ್ಲಿ ಉಳಿದ ಪದ 'ಹೋರಾ' ಎಂದು. ಹೋರಾದಿಂದಲೇ Hour' ಎಂಬ ಇಂಗ್ಲಿಷ್ ಪದ ಹುಟ್ಟಿಕೊಂಡಿತು. ಆದ್ದರಿಂದ ಯಾವುದೇ ಹೋರಾದಲ್ಲಿ ಜನಿಸಿದ ಮಗುವಿನ ಜಾತಕಕ್ಕೆ ಹೊರಾಸ್ಕೋಪ್ ಎಂಬ ಹೆಸರು ಬಂದಿತು.