ಮೀರ್‌ಪುರ: ಆತಿಥೇಯ ಬಾಂಗ್ಲಾದೇಶ ವಿರುದ್ಧ 3 ವಿಕೆಟ್‌ಗಳ ರೋಚಕ ಗೆಲುವು ಪಡೆದ ವೆಸ್ಟ್ ಇಂಡೀಸ್ ತಂಡ, ಇಲ್ಲಿ ನಡೆಯುತ್ತಿರುವ ಐಸಿಸಿ 19 ವರ್ಷದೊಳಗಿನವರ ಏಕದಿನ ವಿಶ್ವಕಪ್‌ನಲ್ಲಿ ಫೈನಲ್ ತಲುಪಿದೆ.
ಇದರೊಂದಿಗೆ ಭಾನುವಾರ ನಡೆಯಲಿರುವ ಫೈನಲ್ ಪಂದ್ಯದಲ್ಲಿ ವೆಸ್ಟ್ ಇಂಡೀಸ್ ಪಡೆ, ಮೂರು ಬಾರಿಯ ಚಾಂಪಿಯನ್ ಬಲಿಷ್ಠ ಭಾರತ ತಂಡದ ವಿರುದ್ಧ ಪ್ರಶಸ್ತಿಗಾಗಿ ಪೈಪೋಟಿ ನಡೆಸಲಿದೆ.
ಮೀರ್‌ಪುರದ ಶೇರ್ ಬಾಂಗ್ಲಾ ಅಂತಾರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ಗುರುವಾರ ನಡೆದ 2ನೇ ಸೆಮಿಫೈನಲ್ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡ ಬಾಂಗ್ಲಾದೇಶ, 50 ಓವರ್‌ಗಳಲ್ಲಿ ತನ್ನೆಲ್ಲಾ ವಿಕೆಟ್ ಕಳೆದುಕೊಂಡು 226 ರನ್‌ಗಳ ಸಾಧಾರಣ ಮೊತ್ತ ಕಲೆಹಾಕಿತು.
ಬಾಂಗ್ಲಾ ಪರ ಜೊಯ್ರಾಸ್ ಶೇಕ್ (35), ನಾಯಕ ಮೆಹೆದಿ ಹಸನ್ ಮಿರ್ಜಾ (60) ಹಾಗೂ ಮೊಹಮ್ಮದ್ ಸೈಫುದ್ದೀನ್ (36) ಜವಾಬ್ದಾರಿಯುತ ಬ್ಯಾಟಿಂಗ್ ನಡೆಸಿದರು. ವಿಂಡೀಸ್‌ನ ಕೀಮೊ ಪಾಲ್ (20ಕ್ಕೆ 3), ಶೆಮರ್ ಕೆ ಹೋಲ್ಡರ್ (36ಕ್ಕೆ 2) ಹಾಗೂ ಶಾಮರ್ ಸ್ಪ್ರಿಂಗರ್ (36ಕ್ಕೆ 2) ವಿಕೆಟ್ ಪಡೆದು ಯಶಸ್ವಿ ಬೌಲರ್‌ಗಳೆನಿಸಿದರು.
ಬಳಿಕ ಗುರಿ ಬೆನ್ನತ್ತಿದ ವೆಸ್ಟ್ ಇಂಡೀಸ್ ತಂಡ, ಇನ್ನೂ 8 ಎಸೆತಗಳು ಬಾಕಿ ಇರುವಂತೆಯೇ 7 ವಿಕೆಟ್ ನಷ್ಟದಲ್ಲಿ 230 ರನ್ ಗಳಿಸಿ ಜಯದ ಸಿಹಿಯುಂಡಿತು. 2004ರಲ್ಲಿ ಬಾಂಗ್ಲಾದಲ್ಲಿ ನಡೆದ ಕಿರಿಯರ ವಿಶ್ವಕಪ್ ಟೂರ್ನಿಯಲ್ಲಿ ಫೈನಲ್ ತಲುಪಿದ್ದ ವಿಂಡೀಸ್, ಇದೀಗ ಮತ್ತದೇ ನೆಲದಲ್ಲಿ ಪ್ರಶಸ್ತಿ ಸುತ್ತಿಗೇರಿದ ಸಾಧನೆ ಮಾಡಿದೆ.
ವಿಂಡೀಸ್ ಪರ ಆಲ್‌ರೌಂಡ್ ಪ್ರದರ್ಶನ ನೀಡಿದ ಶಾಮರ್ ಸ್ಪ್ರಿಂಗರ್ ಮೊದಲಿಗೆ 2 ವಿಕೆಟ್ ಪಡೆದರಲ್ಲದೆ, ಬಳಿಕ ಬ್ಯಾಟಿಂಗ್‌ನಲ್ಲಿ ಅಜೇಯ 62 ರನ್ ಗಳಿಸುವ ಮೂಲಕ ತಂಡವನ್ನು ಗೆಲುವಿನ ದಡ ಮುಟ್ಟಿಸಿದರು. ಉಳಿದಂತೆ ಶಿಮ್ರೊನ್ ಹೆಟ್ಮೆಯರ್ (60) ಹಾಗೂ ಗಿಡ್ರೊನ್ ಪೊಪ್ (38) ತಂಡಕ್ಕೆ ಭರ್ಜರಿ ಆರಂಭ ಒದಗಿಸಿ ಜಯದ ಹಾದಿಯನ್ನು ಸುಗಮವನ್ನಾಗಿಸಿದರು. ಬಾಂಗ್ಲಾ ಪರ ಹೋರಾಟ ಪ್ರದರ್ಶಿಸಿದ ಸಹೇಲ್ ಅಹ್ಮದ್ 37ಕ್ಕೆ 3 ವಿಕೆಟ್ ಪಡೆದರು.
ಸಂಕ್ಷಿಪ್ತ ಸ್ಕೋರ್
ಬಾಂಗ್ಲಾದೇಶ: 50 ಓವರ್‌ಗಳಲ್ಲಿ 226 (ಮೆಹೆದಿ ಹಸನ್ 60, ಸೈಫುದ್ದೀನ್ 36; ಕೀಮೊ ಪಾಲ್ 20ಕ್ಕೆ 3, ಸ್ಪ್ರಿಂಗರ್ 36ಕ್ಕೆ 2, ಹೋಲ್ಡರ್ 36ಕ್ಕೆ 2)
ವೆಸ್ಟ್ ಇಂಡೀಸ್: 48.4 ಓವರ್‌ಗಳಲ್ಲಿ 7 ವಿಕೆಟ್‌ಗೆ 230 (ಸ್ಪ್ರಿಂಗರ್ ಅಜೇಯ 62, ಹೆಟ್ಮೆಯರ್ 60; ಸಹೇಲ್ ಅಹ್ಮದ್ 37ಕ್ಕೆ 3, ಸೈಫುದ್ದೀನ್ 46ಕ್ಕೆ 2, ಮೆಹದಿ ಹಸನ್ 57ಕ್ಕೆ 2)
ಐಸಿಸಿ ಕಿರಿಯರ ವಿಶ್ವಕಪ್ ಟೂರ್ನಿ ಸೆಮೀಸ್‌ನಲ್ಲಿ ಆತಿಥೇಯ ಬಾಂಗ್ಲಾಗೆ ನಿರಾಸೆ