ಬಿಗ್‌ಬಾಸ್ ರಿಯಾಲಿಟಿ ಷೋನಲ್ಲಿ ಭಾಗವಹಿಸಿ ಮನೆಮಾತಾಗಿರುವ ಗೌತಮಿ ಗೌಡ, ಇದೀಗ ಎಸ್. ನಾರಾಯಣ್ ನಿರ್ದೇಶನದ ವೆಂಕಟ್ ನಾಯಕನಾಗಿ ನಟಿಸುತ್ತಿರುವ ಡಿಕ್ಟೇಟರ್ ಚಿತ್ರದಲ್ಲಿ ನಾಯಕಿಯಾಗಿ ನಟಿಸುವುದು ಖಚಿತವಾಗಿದೆ. ಚಿ.ಸೌ. ಸಾವಿತ್ರಿ ಸೀರಿಯಲ್‌ನಲ್ಲಿ ನಟಿಸಿದ್ದ ಗೌತಮಿ, ಬಿಗ್ ಬಾಸ್ ರಿಯಾಲಿಟಿ ಷೋನಿಂದ ಇತ್ತೀಚೆಗಷ್ಟೇ ಎಲಿಮಿನೇಟ್ ಆಗಿದ್ದರು. ಅವರು ಅಲ್ಲಿಂದ ಹೊರಬರುತ್ತಿದ್ದಂತೆ ವೆಂಕಟ್ ಜೊತೆ ನಟಿಸಲು ಎಸ್. ನಾರಾಯಣ್ ಆಫರ್ ಕೊಟ್ಟಿದ್ದಾರೆ.
ಈ ಬಗ್ಗೆ ಗೌತಮಿ ಅವರನ್ನು ಕೇಳಿದಾಗ, 'ಎಸ್. ನಾರಾಯಣ್ ಸರ್ ಅಂತಹ ಬಿಗ್ ಡೈರೆಕ್ಟರ್ ಜೊತೆ ಕೆಲಸ ಮಾಡುವುದಕ್ಕೆ ಅವಕಾಶ ಸಿಕ್ಕಿರುವುದು ನನಗೆ ಖುಷಿ ತಂದಿದೆ. ಸ್ಟೋರಿ ಕೇಳುತ್ತಿದ್ದೇನೆ. ಎಲ್ಲವೂ ಮಾತುಕತೆ ಹಂತದಲ್ಲಿದೆ. ದೊಡ್ಡ ನಿರ್ದೇಶಕರ ಬ್ಯಾನರ್‌ನಲ್ಲಿ ನಟಿಸುವುದೆಂದರೆ ಯಾರಿಗಾದರೂ ಸಂತಸ ತರುವ ವಿಷಯವೆ' ಎಂದರು.
ವೆಂಕಟ್ ಜೊತೆ ನಟಿಸುವುದಕ್ಕೆ ಭಯ ಏನಾದರೂ ಆಗಬಹುದಾ ಎಂಬ ಪ್ರಶ್ನೆಗೆ 'ಅವರ ಜೊತೆ ನಟಿಸುವುದಕ್ಕೆ ಭಯ ಏಕೆ? ಅವರು ಬಿಗ್ ಬಾಸ್‌ನಲ್ಲಿ ಇದ್ದ ಎಪಿಸೋಡ್‌ಗಳನ್ನು ನೋಡಿದ್ದೇನೆ. ಅವರು ಒಳ್ಳೆಯ ಮನುಷ್ಯ' ಎಂದರು ಗೌತಮಿ.
ಗೌತಮಿ ಈಗಾಗಲೇ ಮುತ್ತಿನ ಪಲ್ಲಕ್ಕಿ ಹಾಗೂ ಮಾತುಕತೆ ಚಿತ್ರದಲ್ಲಿ ನಟಿಸಿದ್ದಾರೆ. ವೆಂಕಟ್ ಜೊತೆ ನಟಿಸುತ್ತಿರುವುದು ಮೂರನೇ ಸಿನಿಮಾ. ಇನ್ನು ಮುಂದೆಯೂ ಧಾರಾವಾಹಿಯಲ್ಲಿ ನಟಿಸುತ್ತೀರಾ? 'ಧಾರಾವಾಹಿಗಳಲ್ಲಿ ನಟಿಸುವುದು ಇನ್ನು ಮುಂದೆ ಡೌಟು. ನನಗೆ ಸಿನಿಮಾರಂಗದಲ್ಲಿ ಮುಂದುವರಿಯಬೇಕು ಎಂಬ ಆಸೆ ಇದೆ. ಅದಕ್ಕಾಗಿ ಸಿನಿಮಾ ರಂಗದ ಕಡೆ ಹೆಚ್ಚು ಗಮನ ಕೊಟ್ಟಿದ್ದೇನೆ. ರಿಯಾಲಿಟಿ ಷೋಗಳಲ್ಲಿ ಗುರುತಿಸಿಕೊಳ್ಳುವುದಕ್ಕೆ ಯಾವುದೇ ಪ್ರಾಬ್ಲಂ ಇಲ್ಲ' ಎಂದರು ಗೌತಮಿ.
ಹೊಳೆ ನರಸೀಪುರದವರಾದ ಗೌತಮಿ, ಬೆಂಗಳೂರಿನಲ್ಲಿ ಶಿಕ್ಷಣ ಮುಗಿಸಿ ಇಲ್ಲಿಯೇ ವೃತ್ತಿ ಜೀವನ ಕಂಡುಕೊಂಡಿದ್ದಾರೆ. ಬಿಗ್‌ಬಾಸ್ ರಿಯಾಲಿಟಿ ಷೋನಲ್ಲಿ ಭಾಗವಹಿಸಿದ ನಂತರ ಅವರ ಜನಪ್ರಿಯತೆ ಹೆಚ್ಚಾಗಿದೆ ಎಂಬುದನ್ನು ಅವರು ಒಪ್ಪಿಕೊಳ್ಳುತ್ತಾರೆ.
- ಎಚ್. ಮಹೇಶ್