ನೂಯಿ ಅವರು ದೊಡ್ಡ ಮೊತ್ತದ ಹಣವನ್ನು ಈ ಬಿ-ಸ್ಕೂಲ್‌ಗೆ ದಾನವಾಗಿ ನೀಡಿದ್ದು, ಮೊತ್ತವನ್ನು ಬಹಿರಂಗಪಡಿಸಿಲ್ಲ. ಆದರೆ, ಹಳೆ ವಿದ್ಯಾರ್ಥಿಗಳು ನೀಡಿದ ದೇಣಿಗೆಯಲ್ಲಿ ನೂಯಿ ಅವರ ಕೊಡುಗೆ ಹೆಚ್ಚಿನ ಮೊತ್ತದ್ದಾಗಿದೆ ಎಂದು ಯೇಲ್ ಹೇಳಿದೆ.
ಪ್ರತಿಷ್ಠಿತ ಈ ಬಿ-ಸ್ಕೂಲ್‌ಗೆ ದೊಡ್ಡ ಮೊತ್ತದ ಕೊಡುಗೆ ನೀಡಿದ ಮೊದಲ ಮಹಿಳೆ ಎನ್ನುವ ಹೆಗ್ಗಳಿಕೆ ನೂಯಿ ಅವರಿಗೆ ಸಂದಿದೆ. ಈ ಸ್ಕೂಲ್‌ನಲ್ಲಿ ಅವರು 1980ರಲ್ಲಿ ಪದವಿ ಪಡೆದಿದ್ದರು. ತಮ್ಮ ಕೊಡುಗೆ ಬಗ್ಗೆ ಪ್ರತಿಕ್ರಿಯಿಸಿರುವ ಅವರು, ''ಯೇಲ್ ನನಗೆ ನಾಯಕತ್ವದ ಮೂಲ ತತ್ತ್ವಗಳನ್ನು ಅರ್ಥ ಮಾಡಿಕೊಳ್ಳುವುದನ್ನು ಹೇಳಿಕೊಟ್ಟಿದೆ. ಈ ಶಾಲೆಯಿಂದ ನಾನು ಪಡೆದಿರುವುದು ದೊಡ್ಡದು. ವ್ಯವಹಾರ ಮತ್ತು ಸಮಾಜದ ನಡುವೆ ಸಮತೋಲನ ಸಾಧಿಸುವುದನ್ನು ಇಲ್ಲಿ ಕಲಿತಿದ್ದೇನೆ,'' ಎಂದಿದ್ದಾರೆ.
''ವ್ಯವಹಾರದ ವಿಷಯಗಳು ಕೇವಲ ವ್ಯವಹಾರವಾಗಿ ಉಳಿಯುವುದಿಲ್ಲ. ನಾನು ನೀಡಿರುವ ದತ್ತಿ ಹಣವು ಮುಂದಿನ ಪೀಳಿಗೆಯ ನಾಯಕರ ಸೃಷ್ಟಿಗೆ ಪೂರಕವಾಗಲಿ ಎಂದು ಆಶಿಸುತ್ತೇನೆ. ಹೊಸ ನಾಯಕರಿಂದ ಯಶಸ್ವಿ ಕಂಪನಿಗಳು ನಾಳೆ ಹುಟ್ಟುವಂತಾಗಬೇಕು,'' ಎಂದು ನೂಯಿ ಅಭಿಪ್ರಾಯಪಟ್ಟಿದ್ದಾರೆ.
ನೂಯಿ ಅವರಂತೆ ಅನೇಕ ಭಾರತೀಯರು ಅಮೆರಿಕದ ವಿವಿಗಳಿಗೆ ಈ ಹಿಂದೆ ಕೊಡುಗೆಗಳನ್ನು ನೀಡಿದ್ದಾರೆ. ಅಲ್ಲದೇ ಕಳೆದ ಅಕ್ಟೋಬರ್‌ನಲ್ಲಷ್ಟೆ ನೂಯಿ ಸಹೋದರಿ ಮತ್ತು ಗ್ರ್ಯಾಮಿ ನಾಮನಿರ್ದೇಶಿತ ಸಂಗೀತಗಾರ್ತಿ ಚಂದ್ರಿಕಾ ಟಂಟನ್ ಮತ್ತು ಅವರ ಪತಿ ರಂಜನ್ ಅವರು 10 ಕೋಟಿ ಡಾಲರ್‌ಗಳನ್ನು ನ್ಯೂಯಾರ್ಕ್ ವಿವಿಯ ಸ್ಕೂಲ್ ಆಫ್ ಎಂಜಿನಿಯರಿಂಗ್‌ಗೆ ಕೊಡುಗೆಯಾಗಿ ನೀಡಿದ್ದರು. ಜಗತ್ತಿನ ಪ್ರಭಾವಿ ಮಹಿಳೆಯರ ಪಟ್ಟಿಯಲ್ಲಿ ನೂಯಿ ಅವರು ನಿರಂತರವಾಗಿ ಜಾಗ ಪಡೆಯುತ್ತಿದ್ದು, ಈಗ ಉದಾರತೆ ಮೂಲಕ ಸುದ್ದಿಯಾಗಿದ್ದಾರೆ.
2010ರಲ್ಲಿ ಹಾರ್ವರ್ಡ್ ಬ್ಯುಸಿನೆಸ್ ಸ್ಕೂಲ್‌ಗೆ ಟಾಟಾ ಕಂಪನಿಯು 5 ಕೋಟಿ ಡಾಲರ್‌ಗಳನ್ನು ಕೊಡುಗೆಯಾಗಿ ನೀಡಿತ್ತು.
ನ್ಯೂಯಾರ್ಕ್ : ಅಮೆರಿಕದ ಯೇಲ್ ಸ್ಕೂಲ್ ಆಫ್ ಮ್ಯಾನೇಜ್‌ಮೆಂಟ್‌ನ 'ಅತ್ಯಂತ ಉದಾರಶೀಲ ಗ್ರಾಜ್ಯುಯೇಟ್' ಎಂಬ ಗೌರವಕ್ಕೆ ಪೆಪ್ಸಿಕೊ ಕಂಪನಿಯ ಸಿಇಒ ಇಂದ್ರಾ ನೂಯಿ ಪಾತ್ರರಾಗಿದ್ದಾರೆ.