ಹೊಸದಿಲ್ಲಿ: ನಿಗದಿತ ಸಮಯಕ್ಕೆ ವೀಸಾ ಸಿಗದ ಕಾರಣ ಜರ್ಮನಿಯಲ್ಲಿ ನಡೆಯಲಿರುವ ಕೆಮಿಸ್ಟ್ರಿ ಕಪ್‌ ಬಾಕ್ಸಿಂಗ್‌ ಟೂರ್ನಿಯಲ್ಲಿ ಪಾಲ್ಗೊಳ್ಳುವ ಅವಕಾಶವನ್ನು ಭಾರತೀಯ ಬಾಕ್ಸರ್‌ಗಳು ಕಳೆದುಕೊಂಡಿದ್ದಾರೆ. ಆದರೆ ಶೀಘ್ರದಲ್ಲೇ ಇದೇ ರೀತಿಯ ಮತ್ತೊಂದು ಟೂರ್ನಿಯಲ್ಲಿ ಭಾಗವಹಿಸಲು ಭಾರತೀಯ ಬಾಕ್ಸರ್‌ಗಳನ್ನು ಕಳುಹಿಸಲಾಗುವುದು ಎಂದು ಭಾರತೀಯ ಬಾಕ್ಸಿಂಗ್‌ ಸಂಸ್ಥೆ ಭಾನುವಾರ ಭರವಸೆ ನೀಡಿದೆ. ಇಬ್ಬರು ಏಷ್ಯನ್‌ ಯೂತ್‌ನ ಪದಕ ವಿಜೇತರು ಸೇರಿದಂತೆ 10 ಸದಸ್ಯರ ಹೊಸ ಭರವಸೆಯ ತಂಡ 44ನೇ ಆವೃತ್ತಿಯ ಟೂರ್ನಿಯಲ್ಲಿ ಪಾಲ್ಗೊಳ್ಳಲು ಭಾನುವಾರ ರಾತ್ರಿ ಜರ್ಮನಿಯ ಹಾಲೆಗೆ ಪ್ರಯಾಣ ಬೆಳೆಸಬೇಕಿತ್ತು. ಆದರೆ ನಿಗದಿತ ಸಮಯಕ್ಕೆ ವೀಸಾ ದೊರೆಯದ ಕಾರಣ ಪ್ರಯಾಣದ ಕನಸು ಭಗ್ನಗೊಂಡಿದೆ. 'ಈವರೆಗೆ ವೀಸಾ ದೊರೆತಿಲ್ಲ. ಏಕೆಂದರೆ ಷೇಂಗಾನ್‌ಗೆ ವೀಸಾ ಪಡೆಯಲು ವಿಳಂಬವಾಗಿ ಅರ್ಜಿ ಸಲ್ಲಿಸಲಾಗಿತ್ತು. ಹೊಸದಿಲ್ಲಿಯಿಂದಲೇ ಕೇಂದ್ರೀಕೃತ ವೀಸಾ ಪ್ರಕ್ರಿಯೆಯನ್ನು ನಡೆಸಲಾಗಿತ್ತು,ಆದರೆ ವೀಸಾ ದೊರೆತ್ತಿಲ್ಲ' ಎಂದು ಭಾರತೀಯ ಬಾಕ್ಸಿಂಗ್‌ ಸಂಸ್ಥೆಯ ಅಧ್ಯಕ್ಷ ಅಜಯ್‌ ಸಿಂಗ್‌ ತಿಳಿಸಿದ್ದಾರೆ.
ಇದೇ ವೇಳೆ ''ರಾಷ್ಟ್ರೀಯ ರಾಜಧಾನಿಯಿಂದ ಭಾನುವಾರ ಎಲ್ಲಾ ಬಾಕ್ಸರ್‌ಗಳು ತವರಿಗೆ ಹಿಂದಿರುಗಿದ್ದಾರೆ. ಶೀಘ್ರದಲ್ಲಿ ಮತ್ತೊಂದು ಟೂರ್ನಿಗೆ ಕಳುಹಿಸುವ ವ್ಯವಸ್ಥೆ ಕಲ್ಪಿಸಲಾಗುವುದು,'' ಎಂದು ಅವರು ಹೇಳಿದ್ದಾರೆ. ಏಷ್ಯನ್‌ ಯೂತ್‌ ಬೆಳ್ಳಿ ಪದಕ ವಿಜೇತ ಅಂಕುಶ್‌ ದಹಿಯಾ (60ಕೆಜಿ) ಮತ್ತು ರೆಯಲ್‌ ಪುರಿ (81ಕೆಜಿ) ಸೇರಿದಂತೆ 10 ಸದಸ್ಯರನ್ನು ಭಾರತ ತಂಡ ಒಳಗೊಂಡಿತ್ತು. ಕೆಮಿಸ್ಟ್ರಿ ಕಪ್‌ ಇದೇ 13ರಿಂದ 18ರವರೆಗೆ ಜರುಗಲಿದೆ.
↧
ವೀಸಾ ಸಿಗದ ಭಾರತ ತಂಡ ಟೂರ್ನಿಗೆ ಅಲಭ್ಯ
↧