ಅಹಲ್ಯಾಗೆ ಈ ಕೆಲಸ ಕಬ್ಬಿಣದ ಕಡಲೆಯಲ್ಲ..!

​* ಚನ್ನಮಾದೇಗೌಡ ಪಾಂಡವಪುರ

ಜೀವನದಲ್ಲಿ ದಿಢೀರನೇ ಎದುರಾಗುವ ಸಂಕಷ್ಟಗಳಿಗೆ ಹೆದರಿ ಬೆನ್ನು ತೋರುವವರೇ ಹೆಚ್ಚು. ಆದರೆ, ಬಂದದ್ದನ್ನು ಸ್ವೀಕರಿಸಿದ ಗಟ್ಟಿಗಿತ್ತಿಯ ಬದುಕಿನ ಯಶೋಗಾಥೆಯಿದು.

ಈಕೆ ಕೈಯಲ್ಲಿ ಸುತ್ತಿಗೆ ಹಿಡಿದು ನಿಂತರೆ ಕಬ್ಬಿಣ ಹೇಳಿದಂತೆ ಕೇಳುತ್ತದೆ. ಮನೆಗೆ ಅಗತ್ಯವಿರುವ ಕಬ್ಬಿಣದ ಬಾಗಿಲು, ಕಿಟಕಿ, ಗ್ರಿಲ್ಸ್‌, ವೆಲ್ಡಿಂಗ್‌, ಸ್ಟೌ, ಸಂಪು ಮುಚ್ಚಳ ಸೇರಿದಂತೆ ಹತ್ತು ಹಲವು ಬಗೆಯ ಕಬ್ಬಿಣದ ಕೆಲಸ ಮಾಡುವ ಕಲೆ ಈಕೆಗೆ ಕರತಲಾಮಲಕ.

ಪಾಂಡವಪುರ ತಾಲೂಕಿನ ಹರಳಹಳ್ಳಿ ಗ್ರಾಮದ ಆರ್‌.ಕೃಷ್ಣಮೂರ್ತಿ ಅವರ ಮೂರನೇ ಪುತ್ರಿ ಅಹಲ್ಯಾ (ದೇವಿಕಾ) ಇಡೀ ಕುಟುಂಬವನ್ನು ಕುಲುಮೆ ನಡೆಸಿಕೊಂಡೇ ನಿರ್ವಹಿಸುತ್ತಿದ್ದಾಳೆ. ಪಾಂಡವಪುರ ಪಟ್ಟಣದಲ್ಲಿ ವೆಲ್ಡಿಂಗ್‌ ಶಾಪ್‌ವೊಂದನ್ನು ಇಟ್ಟುಕೊಂಡು ಕಬ್ಬಿಣದ ಕೆಲಸ ಮಾಡಿಕೊಂಡು ಅದರಿಂದ ಬರುವಂತಹ ಹಣದಿಂದ ಕುಟುಂಬವನ್ನು ಸಾಕುತ್ತಿದ್ದಾಳೆ ಅಹಲ್ಯಾ.

ಅಹಲ್ಯಾ ತಂದೆ ಆರ್‌.ಕೃಷ್ಣಮೂರ್ತಿ ಕೃಷ್ಣ ಎಂಜಿನಿಯರಿಂಗ್‌ ವರ್ಕ್ಸ್‌ ಆ್ಯಂಡ್‌ ವೆಲ್ಡಿಂಗ್‌ ಶಾಪ್‌ ಇಟ್ಟುಕೊಂಡು ಪತ್ನಿ ಇಂದ್ರ ಹಾಗೂ ನಾಲ್ಕು ಹೆಣ್ಣುಮಕ್ಕಳಾದ ಪದ್ಮಾವತಿ, ಶೀಲಾವತಿ, ದೇವಿಕಾ(ಅಹಲ್ಯಾ) ಅವರನ್ನೊಳಗೊಂಡ ತುಂಬು ಸಂಸಾರದ ಹೊಣೆ ಹೊತ್ತಿದ್ದರು. ಕಳೆದ 7 ವರ್ಷದ ಹಿಂದೆ ಹಠಾತ್‌ ಆಗಿ ಕೃಷ್ಣಮೂರ್ತಿ ಅನಾರೋಗ್ಯಕ್ಕೆ ತುತ್ತಾಗಿ ಹಾಸಿಗೆ ಹಿಡಿಯುತ್ತಾರೆ. ಆಗಲೇ 8ನೇ ತರಗತಿ ಓದುತ್ತಿದ್ದ ಅಹಲ್ಯಾ ದಿಟ್ಟತನದಿಂದ ತಂದೆ ವೃತ್ತಿಗಿಳಿದು ಸಂಸಾರದ ನೊಗ ಹೊತ್ತಳು. ಗಂಡುಮಕ್ಕಳಿಲ್ಲದೇ ಕಂಗಾಲಾಗಿದ್ದ ಕುಟುಂಬಕ್ಕೆ ಆಸರೆಯಾಗಿ ನಿಂತಳು.

ತಂದೆ ಕೃಷ್ಣಮೂರ್ತಿ ಆರೋಗ್ಯವಾಗಿದ್ದಾಗ ಹಿರಿಯ ಪುತ್ರಿ ಪದ್ಮಾವತಿಗೆ ಮಾತ್ರ ವಿವಾಹ ಮಾಡಿದ್ದಾರೆ. ನಂತರ ಕೆಲಸದ ಒತ್ತಡ ಹೆಚ್ಚಿ 9ನೇ ತರಗತಿಗೆ ಶಿಕ್ಷಣ ನಿಲ್ಲಿಸಿದ ಅಹಲ್ಯಾ ಕಬ್ಬಿಣದ ಕೆಲಸ ಮಾಡಿಕೊಂಡೇ ಕುಟುಂಬವನ್ನೇ ಪೊರೆಯುತ್ತಿದ್ದಾರೆ. ದಿನಕ್ಕೆ ಸುಮಾರು 500-600 ರೂ. ತನಕ ಸಂಪಾದನೆ ಮಾಡುತ್ತಾರೆ. ಅಕ್ಕನ ಮದುವೆಗೆ ಹಣ ಸಂಗ್ರಹಿಸುತ್ತಿದ್ದಾರೆ. ತಂಗಿಯನ್ನು ಐಟಿಐ ಓದಿಸುತ್ತಿದ್ದಾಳೆ. ಈಚೆಗೆ ತಾಯಿ ಇಂದ್ರಮ್ಮ ಅವರೂ ಹಾಸಿಗೆ ಹಿಡಿದಿದ್ದಾರೆ.

ನನ್ನ ತಂದೆ ಅವರು ವೆಲ್ಡಿಂಗ್‌ ಶಾಪ್‌ ನಡೆಸುತ್ತಿದ್ದಾಗ ಅತ್ತ ಮುಖ ಹಾಕುತ್ತಿರಲಿಲ್ಲ. ಆದರೆ, ಅವರು ಅನಾರೋಗ್ಯಕ್ಕೆ ತುತ್ತಾದಾಗ ದಿಕ್ಕು ಕಾಣದಂತಾಯಿತು. ಈ ವೇಳೆ ನಮ್ಮ ತಾಯಿ, ಅಕ್ಕ-ತಂಗಿಯರಿಗೆ ಧೈರ್ಯ ಹೇಳಿಕೊಂಡು ನಾನೇ ವೆಲ್ಡಿಂಗ್‌ ಕೆಲಸ ಕಲಿತೆ. ಮೊದಲು ಎಲ್ಲರೂ ನನ್ನ ಸಾಮರ್ಥ್ಯವನ್ನು ಶಂಕಿಸುತ್ತಿದ್ದರು. ಆದರೆ, ಈಗ ಇದೇ ಕೆಲಸ ಮಾಡಿಕೊಂಡೇ ಕುಟುಂಬ ನಿರ್ವಹಿಸುತ್ತಿದ್ದೇನೆ.

-ದೇವಿಕ(ಅಹಲ್ಯಾ)

ಅಹಲ್ಯಾ ನಿತ್ಯ ಕಷ್ಟಪಟ್ಟು ದುಡಿಯುತ್ತಾರೆ, ಅವರ ತಂದೆ ಅನಾರೋಗ್ಯಕ್ಕೆ ಒಳಗಾದ ನಂತರ ಆ ಸಂಸಾರದ ಜವಾಬ್ದಾರಿ ಹೊತ್ತುಕೊಂಡು ನಿಭಾಯಿಸುತ್ತಿದ್ದಾಳೆ. ಇಂತಹ ಹುಡುಗಿ ಇತರರಿಗೆ ಮಾದರಿ.

-

ಎಂಡಿವೈ07ಪಿಎನ್‌ಡಿ1ಸಿ

ಪಾಂಡವಪುರ ಪಟ್ಟಣದಲ್ಲಿನ ವೆಲ್ಡಿಂಗ್‌ ಶಾಪ್‌ನಲ್ಲಿ ಅಹಲ್ಯಾ ವೆಲ್ಡಿಂಗ್‌ ಮಾಡುತ್ತಿರುವುದು.

ಎಂಡಿವೈ07ಪಿಎನ್‌ಡಿ2ಸಿ

ಪಾಂಡವಪುರ ಪಟ್ಟಣದಲ್ಲಿನ ಅಹಲ್ಯಾ ವೆಲ್ಡಿಂಗ್‌ ಶಾಪ್‌ನಲ್ಲಿ ಸುತ್ತಿಗೆ ಹಿಡಿದು ಕಬ್ಬಿಣವನ್ನು ಬಾಗಿಸುತ್ತಿರುವುದು.

ಎಂಡಿವೈ07ಪಿಎನ್‌ಡಿ3ಸಿ

ಅಹಲ್ಯಾ, ಪಾಂಡವಪುರ.