ಟಿಪ್ಪು ಮದ್ದಿನ ಮನೆ ಸ್ಥಳಾಂತರ ಸ್ಥಳಕ್ಕೆ ಸಂಸದ ಭೇಟಿ

ಶ್ರೀರಂಗಪಟ್ಟಣ: ಬೆಂಗಳೂರು-ಮೈಸೂರು ಜೋಡಿ ರೈಲು ಮಾರ್ಗಕ್ಕೆ ಅಡ್ಡಿಯಾಗಿದ್ದ ಟಿಪ್ಪು ಆಡಳಿತ ಕಾಲದ ಮದ್ದಿನ ಮನೆ ಸ್ಥಳಾಂತರ ಸ್ಥಳಕ್ಕೆ ಮೈಸೂರು ಹಾಗೂ ಕೊಡಗು ಸಂಸದ ಪ್ರತಾಪ್‌ ಸಿಂಹ ಮಂಗಳವಾರ ಭೇಟಿ ನೀಡಿ ಪರಿಶೀಲನೆ ನಡೆಸಿದರು.

ನಂತರ ಮಾತನಾಡಿದ ಅವರು, 900 ಮೆಟ್ರಿಕ್‌ ಟನ್‌ ತೂಕದ ಸ್ಮಾರಕವೊಂದನ್ನು ಅದು ಹೇಗಿದೆಯೋ ಹಾಗೆ ಯಂತ್ರಗಳ ಸಹಾಯದಿಂದ ಸ್ಥಳಾಂತರ ಮಾಡುತ್ತಿರುವುದು ಭಾರತದಲ್ಲಿ ಮೊಟ್ಟ ಮೊದಲು. ಇದೊಂದು ಅವಿಸ್ಮರಣೀಯವಾದ ಪ್ರಯತ್ನ, ಮುಂದಿನ ದಿನಗಳಲ್ಲಿ ಪುರಾತನ ಕಾಲದ ಸ್ಮಾರಕಗಳನ್ನು ಇದೇ ಮಾದರಿಯಲ್ಲಿ ಉಳಿಸಿಕೊಳ್ಳಬಹುದು ಎಂಬುದನ್ನು ಈ ಯೋಜನೆ ಸಾಕ್ಷೀಕರಿಸಿದೆ. ಭಾರತೀಯ ರೈಲ್ವೆ ಇಲಾಖೆ ಅಧಿಕಾರಿಗಳು ಅಮೇರಿಕಾದ ತಂತ್ರಜ್ಞರ ಜತೆಯಲ್ಲಿ ಮದ್ದಿನ ಮನೆ ಸ್ಥಳಾಂತರಕ್ಕೆ ಅವಿರತ ಶ್ರಮಿಸುತ್ತಿದ್ದಾರೆ ಎಂದರು.

ಜೋಡಿ ರೈಲು ಮಾರ್ಗಕ್ಕೆ ಅಡ್ಡಿಯಾಗಿದ್ದ ಮದ್ದಿನ ಮನೆ ಸ್ಥಳಾಂತರ ಬೆನ್ನಲ್ಲೇ ಬಾಕಿ ಉಳಿದಿದ್ದ ಕಾಮಗಾರಿ ಮುಗಿಯಲಿದ್ದು, ಶೀಘ್ರ ಜೋಡಿ ರೈಲು ಮಾರ್ಗವನ್ನು ಸಾರ್ವಜನಿಕ ಸೇವೆಗೆ ಒದಗಿಸಲಾಗುವುದು. ಹೆದ್ದಾರಿಯಲ್ಲಿ ವಾಹನ ದಟ್ಟಣೆ ನಿಯಂತ್ರಣಕ್ಕೆ ಈ ಯೋಜನೆ ಅತ್ಯಗತ್ಯವಾಗಿತ್ತು ಎಂದು ಹೇಳಿದರು.

ರೈಲ್ವೆ ಇಲಾಖೆ ಡೆಪ್ಯೂಟಿ ಮ್ಯಾನೇಜರ್‌ ರವಿಚಂದ್ರನ್‌ ಮಾತನಾಡಿ, ಯುನಿಫೈಡ್‌ ಜಾಕಿಂಗ್‌ ಯಂತ್ರದ ಸಹಾಯದಿಂದ ಸ್ಮಾರಕವನ್ನು ಸ್ಥಳಾಂತರ ಮಾಡಲಾಗುತ್ತಿದೆ. ಮೊದಲ ದಿನ 30 ಮೀಟರ್‌ ದೂರ ಸ್ಮಾರಕವನ್ನು ಮುಂದಕ್ಕೆ ನೂಕಲಾಗಿತ್ತು. ಎರಡನೆ ದಿನ 20 ಮೀಟರ್‌ ದೂರ ನೂಕಲಾಗಿದೆ. ಇನ್ನು ಮೂರು ದಿನದಲ್ಲಿ 100 ಮೀಟರ್‌ ದೂರಕ್ಕೆ ಸ್ಮಾರಕವನ್ನು ಸ್ಥಳಾಂತರ ಮಾಡಲಾಗುವುದು ಎಂದು ತಿಳಿಸಿದರು.