ಬಣ್ಣ ಬಿದ್ದ ನೋಟು ಸ್ವೀಕರಿಸದಂತೆ ಆರ್‌ಬಿಐ ನಿರ್ದೇಶನ

ಹೊಸದಿಲ್ಲಿ: ಹೋಳಿ ಹಬ್ಬ ಬರುತ್ತಿದೆ... ಈ ಸಂದರ್ಭದಲ್ಲಿ ನಿಮ್ಮದೇ ನೋಟುಗಳನ್ನು ಮುಟ್ಟುವುದಾದರೂ ಎರಡು ಸಲ ಯೋಚಿಸಿ! ಹೋಳಿ ಆಚರಿಸುವ ಸಂದರ್ಭದಲ್ಲಿ 500 ರೂ. ಹಾಗೂ 2,000 ರೂ. ನೋಟುಗಳಿಗೆ ಬಣ್ಣ ಬಿದ್ದರೇ, ನಿಮ್ಮ ನೋಟುಗಳು ಅಮಾನ್ಯಗೊಳ್ಳುವ ಸಾಧ್ಯತೆಗಳಿವೆ.

ಹೋಳಿ ಹಿನ್ನೆಲೆಯಲ್ಲಿ ಭಾರತೀಯ ರಿಸರ್ವ್‌ ಬ್ಯಾಂಕ್‌(ಆರ್‌ಬಿಐ), ಬಣ್ಣ ಬಿದ್ದ ನೋಟುಗಳನ್ನು ಸ್ವೀಕರಿಸದಂತೆ ಬ್ಯಾಂಕ್‌ಗಳಿಗೆ ಸೂಚಿಸಿದೆ. ಈ ಸಂಗತಿಯನ್ನು ಸೂಕ್ಷ್ಮವಾಗಿ ಗಮನಿಸುವುದಾದರೆ, ''ಹಬ್ಬದ ದಿನ ನಗದು ಬದಲಿಗೆ ಡಿಜಿಟಲ್‌ ವ್ಯವಹಾರಗಳನ್ನು ನಡೆಸಿ,'' ಎಂದು ಮೋದಿ ಸರಕಾರವು ಪ್ರೇರಣೆ ನೀಡಿದಂತಿದೆ.

ಹೋಳಿ ಸಂದರ್ಭದಲ್ಲಿ ಬಣ್ಣದ ಆಟವಾಡುವಾಗ ಎಚ್ಚರಿಕೆವಹಿಸಬೇಕು. ಜೇಬಿನಲ್ಲಿ ಹೊಸ ನೋಟುಗಳನ್ನು ಇಟ್ಟುಕೊಂಡು ರಂಗಕ್ಕೆ ಇಳಿದರೆ, ಅವುಗಳಿಗೆ ಬಣ್ಣ ಮೆತ್ತಿಕೊಳ್ಳುವ ಸಾಧ್ಯತೆಗಳಿವೆ. ಹೋಲಿ ಸಂದರ್ಭದಲ್ಲಿ ಆದಷ್ಟು ಖಾಲಿ ಜೇಬಿನಲ್ಲಿ ಇಲ್ಲವೇ, ಕಡಿಮೆ ಮೊತ್ತದ ನೋಟುಗಳನ್ನು ಜೇಬಿನಲ್ಲಿಟ್ಟುಕೊಳ್ಳುವುದು ಉತ್ತಮ.

ಹೋಲಿ ಎನ್ನುವುದು ಹಿಂದುಗಳ ಪಾಲಿಗೆ ದೊಡ್ಡ ಹಬ್ಬ. ಅತ್ಯುತ್ಸಾಹದಿಂದ ಉತ್ತರ ಭಾರತ ಸೇರಿದಂತೆ ದೇಶದೆಲ್ಲೆಡೆ ಆಚರಿಸಲಾಗುತ್ತದೆ. ಈ ವರ್ಷ ಮಾ.13ರಂದು ಹೋಳಿ ಹಬ್ಬ ಬಂದಿದ್ದು, ಬಣ್ಣಗಳದೇ ಇಲ್ಲಿ ವಿಶೇಷ.

ಸ್ವಚ್ಛ ನೋಟುಗಳ ನೀತಿ

ಮೊದಲಿನಿಂದಲೂ ನೋಟುಗಳನ್ನು ಚೊಕ್ಕಟವಾಗಿ ಇಡುವಂತೆ ಆರ್‌ಬಿಐ ಹೇಳುತ್ತಲೇ ಬಂದಿದೆ. 1999ರ 'ಕ್ಲೀನ್‌ ನೋಟ್‌ ಪಾಲಿಸಿ' ನೀತಿಯನ್ವಯವೇ ಹೊಸ ಸೂಚನೆ ಹೊರಬಿದ್ದಿದೆ. ನೋಟುಗಳ ಮೇಲೆ ಪೆನ್ನಿಂದ ಬರೆಯುವುದು, ಮಣ್ಣು ಅಥವಾ ಇತರೆ ಕಲೆಗಳಾಗದಂತೆ ನೋಟುಗಳನ್ನು ರಕ್ಷಿಸುವಂತೆ ಆರ್‌ಬಿಐ ಹೇಳುತ್ತಲೇ ಬಂದಿದೆ. ಅಲ್ಲದೇ, ಸಾರ್ವಜನಿಕರಲ್ಲಿ ಈ ಬಗ್ಗೆ ಜಾಗೃತಿ ಮೂಡಿಸುವ ಕೆಲಸವನ್ನು ಮಾಡುತ್ತಿದೆ. ಆದಾಗ್ಯೂ, ಇಂಥ ನೋಟುಗಳನ್ನು ನಿಷೇಧಿಸಲು ಮುಂದಾಗಿಲ್ಲ. ಈಗ ಒಂದು ಹೆಜ್ಜೆ ಮುಂದೆ ಸಾಗಿರುವ ಆರ್‌ಬಿಐ, ಬಣ್ಣದ ಕಲೆಗಳಾಗಿರುವ ನೋಟುಗಳನ್ನು ಬ್ಯಾಂಕ್‌ನಲ್ಲಿ ನಿರ್ಬಂಧಿಸಲು ಮುಂದಾಗಿದೆ.

ನೋಟುಗಳು ಹಾಳಾಗದಂತೆ ತಡೆಯುವ ನಿಟ್ಟಿನಲ್ಲಿ ಬ್ಯಾಂಕ್‌ಗಳು ಕರೆನ್ಸಿ ಬಂಡಲ್‌ಗೆ ಪಿನ್‌ ಹಾಕದಂತೆ(ಸ್ಟೆಪಲ್‌) ಆರ್‌ಬಿಐ ಸೂಚಿಸಿದ್ದು, ಆ ನಿಯಮ ಈಗಾಗಲೇ ಚಾಲ್ತಿಯಲ್ಲಿದೆ.

ನೋಟುಗಳ ಮೇಲೆ ಬರೆಯಬೇಡಿ

ನೋಟು ಹೊಸತು ಅಥವಾ ಹಳೆಯದು ಯಾವುದೇ ಇರಲಿ, ಅವುಗಳ ಮೇಲೆ ಸಾರ್ವಜನಿಕರು ಗೀಚಬಾರದು. ನೋಟುಗಳ ಮೇಲೆ ಕೆಲವರಿಗೆ ತಮ್ಮ ಹೆಸರು, ಪ್ರೇಮಿಯ ಹೆಸರು ಅಥವಾ ಇನ್ಸಿಯಲ್‌ಗಳನ್ನು ಇಲ್ಲವೇ ಚಿತ್ರಗಳನ್ನು ಬರೆಯುವ ಕೆಟ್ಟ ಅಭ್ಯಾಸವಿದೆ. ಇಂಥ ನೋಟುಗಳು ಚಲಾವಣೆಯಲ್ಲಿವೆ ಅನ್ನುವುದು ನಿಜವಾದರೂ, ನೋಟುಗಳನ್ನು ಸ್ವಚ್ಛವಾಗಿ ಇಡುವುದು ಎಲ್ಲರ ಕರ್ತವ್ಯ.

ಶೀಘ್ರದಲ್ಲೇ 10ರ ಹೊಸ ನೋಟು

ಮುಂಬಯಿ: 500, 1000ರೂ. ಮುಖ ಬೆಲೆಯ ಹಳೆಯ ನೋಟುಗಳನ್ನು ನಿಷೇಧಿಸಿದ ಬಳಿಕ, ಈಗ 10 ರೂ. ನೋಟಿನಲ್ಲೂ ಬದಲಾವಣೆ ತರಲು ಭಾರತೀಯ ರಿಸರ್ವ್‌ ಬ್ಯಾಂಕ್‌ ಮುಂದಾಗಿದೆ. ಹೊಸ ನೋಟು ಬಂದರೂ, ಈಗಿನ 10 ರೂ. ಮುಖಬೆಲೆಯ ನೋಟುಗಳು ಚಲಾವಣೆಯಲ್ಲಿರುತ್ತದೆ.

ಹೊಸ 10ರೂ. ನೋಟ್‌ನಲ್ಲಿ ಹೆಚ್ಚಿನ ಸುರಕ್ಷ ತಾ ಕ್ರಮಗಳಿರಲಿವೆ. 'ಮಹಾತ್ಮಾ ಗಾಂಧಿ ಚಿತ್ರ ಸರಣಿ-2005'ರ ನೋಟುಗಳು ಇವಾಗಿದ್ದು, ನೋಟುಗಳ ಮೇಲೆ ಎರಡೂ ಕಡೆ ನಂಬರಿನ ಬಳಿ 'ಔ' ಎಂದು ಮುದ್ರಿಸಲಾಗುತ್ತದೆ. ನೋಟಿನ ಹಿಂಬದಿಯಲ್ಲಿ '2017' ಎಂದು ಮುದ್ರಣದ ವರ್ಷವನ್ನು ಪ್ರಿಂಟ್‌ ಮಾಡಲಾಗುತ್ತದೆ.

ನೋಟಿನ ಎರಡೂ ಬದಿಯ ಸಂಖ್ಯೆಗಳ ಗಾತ್ರ ಎಡದಿಂದ ಬಲಕ್ಕೆ ಹೆಚ್ಚುತ್ತಾ ಹೋಗುತ್ತದೆ. ಅಲ್ಲದೇ ನೋಟಿನಲ್ಲಿ ರಿಸರ್ವ್‌ ಬ್ಯಾಂಕ್‌ ಗವರ್ನರ್‌ ಊರ್ಜಿತ್‌ ಪಟೇಲ್‌ ಅವರ ಸಹಿಯೂ ಇರಲಿದೆ ಎಂದು ಪ್ರಕಟಣೆಯಲ್ಲಿ ಆರ್‌ಬಿಐ ಹೇಳಿದೆ.