ಬ್ಯಾಡಗಿ ಎಪಿಎಂಸಿಯಲ್ಲಿ ಮತ್ತೆ ದಾಖಲೆ ಆವಕ

ಬ್ಯಾಡಗಿ : ಸ್ಥಳೀಯ ಕೃಷಿ ಉತ್ಪನ್ನ ಮಾರುಕಟ್ಟೆಗೆ ಗುರುವಾರ ಪ್ರಸಕ್ತ ವರ್ಷದಲ್ಲಿ ಮತ್ತೊಮ್ಮೆ 2,23,476 ಚೀಲ ಮೆಣಸಿನಕಾಯಿ ಅವಕವಾಗುವ ಮೂಲಕ ಎಲ್ಲರಲ್ಲೂ ಅಚ್ಚರಿ ಮೂಡಿಸಿದೆ.

ಮಾ. 02ರಂದು ದಾಖಲೆಯ 2,65,422 ಮೆಣಸಿನಕಾಯಿ ಚೀಲಗಳು ಆವಕವಾಗಿ ಹಿಂದಿನ ತನ್ನೆಲ್ಲಾ ದಾಖಲೆಗಳನ್ನು ಧೂಳೀಪಟ ಮಾಡಿ ಇತಿಹಾಸ ಸೃಷ್ಟಿಸಿದ್ದ ಮಾರುಕಟ್ಟೆಗೆ ಪ್ರಸಕ್ತ ವರ್ಷದಲ್ಲಿ 2 ಲಕ್ಷ ಚೀಲಗಳ ಆವಕ ಸರ್ವೆ ಸಾಮಾನ್ಯ ಎನ್ನುವಂತಾಗಿದೆ.

ಜನವರಿಯಿಂದ ಬಲು ಜೋರು:

ಗರಿಷ್ಠ ಮುಖಬೆಲೆಯ ನೋಟುಗಳನ್ನು ಚಲಾವಣೆಯಿಂದ ಹಿಂದಕ್ಕೆ ಪಡೆದ ಕಾರಣ ಈ ವರ್ಷ ಮಾರುಕಟ್ಟೆಗೆ ಶೋಚನೀಯ ಸ್ಥಿತಿ ಬಂದೊದಗಬಹುದೆಂದೇ ಬಹಳಷ್ಟು ಜನ ಅಂದುಕೊಂಡಿದ್ದರು. ಆದರೆ ಜನವರಿ ಮೊದಲ ವಾರದಿಂದ ಎಲ್ಲರ ಲೆಕ್ಕಾಚಾರ ತಲೆಕೆಳಗಾಗುವಂತೆ ಆವಕ ಆಗುತ್ತಿದ್ದು, ಇಲ್ಲಿವರೆಗೆ ಒಟ್ಟು 5 ಬಾರಿ 2 ಲಕ್ಷ ಕ್ಕಿಂತಲೂ ಹೆಚ್ಚಿನ ಆವಕವಾಗಿ ಎಲ್ಲರನ್ನೂ ನಿಬ್ಬೆರಗಾಗುವಂತೆ ಮಾಡಿದೆ.

ಸೋಮವಾರ ಬಂದ ಎಫೆಕ್ಟ್:

ದಾಖಲೆಯ ಆವಕದಿಂದಾಗಿ ಖರೀದಿಸಿದ ಮೆಣಸು ರವಾನೆಯಾಗದೆ ದಲಾಲರ ಅಂಗಡಿ ಆವರಣದಲ್ಲೆ ಉಳಿದಿದ್ದ ಕಾರಣ ಮಾ. 06ರಂದು ಮಾರುಕಟ್ಟೆಗೆ ರಜೆ ನೀಡಲಾಗಿತ್ತು. ಈ ಹಿನ್ನೆಲೆಯಲ್ಲಿ ಗುರುವಾರ ಮಾರುಕಟ್ಟೆಗೆ ದಾಖಲೆಯ ಮೆಣಸಿನಕಾಯಿ ಆವಕವಾಗಿದೆ.