ಹೊಸದಿಲ್ಲಿ: 'ಭವಿಷ್ಯ ನಿಧಿ(ಪಿಎಫ್‌) ಖಾತೆಯಿಂದ ರಾಷ್ಟ್ರೀಯ ಪಿಂಚಣಿ ಯೋಜನೆಗೆ(ಎನ್‌ಪಿಎಸ್‌) ನಿಧಿ ವರ್ಗಾಯಿಸಿದರೆ, ಯಾವುದೇ ತೆರಿಗೆ ಇರುವುದಿಲ್ಲ,' ಎಂದು ಪಿಂಚಣಿ ನಿಧಿ ನಿಯಂತ್ರಣ ಮತ್ತು ಅಭಿವೃದ್ಧಿ ಪ್ರಾಧಿಕಾರ(ಪಿಎಫ್‌ಆರ್‌ಡಿಎ) ತಿಳಿಸಿದೆ. 'ಮಾನ್ಯತೆ ಪಡೆದಿರುವ ಭವಿಷ್ಯನಿಧಿ/ನಿವೃತ್ತಿ ನಿಧಿ ಖಾತೆಯಿಂದ ಎನ್‌ಪಿಎಸ್‌ ಖಾತೆಗೆ ಸದಸ್ಯರು ವರ್ಗಾಯಿಸಿದರೆ, ಆ ನಿಧಿಯನ್ನು ಪ್ರಸಕ್ತ ವರ್ಷದ ಆದಾಯ ಎಂದು ಪರಿಗಣಿಸಲಾಗುವುದಿಲ್ಲ. ಅಲ್ಲದೆ ತೆರಿಗೆ ಕೂಡ ವಿಧಿಸುವುದಿಲ್ಲ. ಹೀಗಾಗಿ ಸದಸ್ಯರು ತೆರಿಗೆ ಸಂಬಂಧ ಕ್ಲೇಮ್‌ ಮಾಡಿಕೊಳ್ಳುವ ಅಗತ್ಯವಿಲ್ಲ' ಎಂದು ಪ್ರಾಧಿಕಾರ ಹೇಳಿದೆ. ಈ ನೀತಿಯನ್ನು 2016-17ನೇ ಸಾಲಿನ ಕೇಂದ್ರ ಬಜೆಚ್‌ನಲ್ಲಿಯೇ ಸರಕಾರ ಘೋಷಿಸಿತ್ತು. ಎನ್‌ಪಿಎಸ್‌ ಜತೆ ಇತರೆ ನಿವೃತ್ತಿ ನಿಧಿಗಳನ್ನು ಹೋಲಿಸುತ್ತಿದ್ದ ಜನರು, ವರ್ಗಾವಣೆ ಸಂಬಂಧ ನಾನಾ ಸಂದೇಹಗಳನ್ನು ಪಿಎಫ್‌ಆರ್‌ಡಿಎ ಮುಂದೆ ಇಟ್ಟಿಟ್ಟರು. ಈ ಹಿನ್ನೆಲೆಯಲ್ಲಿ ಸ್ಪಷ್ಟೀಕರಣವನ್ನು ನೀಡಲಾಗಿದೆ. ವರ್ಗಾವಣೆಗೆ ಏನು ಮಾಡಬೇಕು? * ಸಕ್ರಿಯ 'ಎನ್‌ಪಿಎಸ್‌ ಶ್ರೇಣಿ-1' ಖಾತೆಯನ್ನು ಹೊಂದಬೇಕು. ನಂತರ ಪಿಎಫ್‌ ಹಣ ವರ್ಗಾವಣೆಗೆ ಮುಂದಾಗಬೇಕು. * ಸರಕಾರಿ ಅಥವಾ ಖಾಸಗಿ ವಲಯದ ಉದ್ಯೋಗಿಗಳು ತಮ್ಮ ಪಿಎಫ್‌ ಖಾತೆಯಲ್ಲಿನ ನಿಧಿಯನ್ನು ಎನ್‌ಪಿಎಸ್‌ಗೆ ವರ್ಗಾಯಿಸಬೇಕು ಎಂದು ಅನ್ನಿಸಿದರೆ, ಮಾನ್ಯತೆ ಪಡೆದ ಪಿಎಫ್‌/ನಿವೃತ್ತಿ ನಿಧಿ ಟ್ರಸ್ಟ್‌ ಅನ್ನು ಹಾಲಿ ಉದ್ಯೋಗದಾತರ ಮೂಲಕ ಸಂಪರ್ಕಿಸಬೇಕು. ನಿಧಿ ವರ್ಗ ಸಂಬಂಧ ಮನವಿಯನ್ನು ಸಲ್ಲಿಸಬೇಕು. * ಪಿಎಫ್‌/ನಿವೃತ್ತಿ ನಿಧಿ ಟ್ರಸ್ಟ್‌ಗಳು ಹಣ ವರ್ಗಾವಣೆ ಪ್ರಕ್ರಿಯೆಗಳನ್ನು ನಡೆಸುತ್ತವೆ. * ಸರಕಾರಿ ಉದ್ಯೋಗಿಗಳಾದರೆ ಪಿಎಫ್‌/ನಿವೃತ್ತಿ ನಿಧಿಗೆ ಮನವಿ ಸಲ್ಲಿಸಬಹುದು. ಉದ್ಯೋಗದಾತ ಇಲಾಖೆಗೆ ಪತ್ರ ಕಳುಹಿಸಿ ಅರ್ಜಿ ಸಲ್ಲಿಸಿ, ತಮ್ಮ ಪಿಎಫ್‌ ಖಾತೆಯನ್ನು ಎನ್‌ಪಿಎಸ್‌ಗೆ ವರ್ಗಾಯಿಸಲು ಮನವಿ ಸಲ್ಲಿಸಬೇಕು.
↧
ಪಿಎಫ್‌ನಿಂದ ಎನ್‌ಪಿಎಸ್‌ಗೆ ತೆರಿಗೆ ರಹಿತ ನಿಧಿ ವರ್ಗಾವಣೆ
↧