ಹೊಸದಿಲ್ಲಿ: ನೌಕರರು ತಮ್ಮ ಸಾಮಾನ್ಯ ಭವಿಷ್ಯ ನಿಧಿಯಿಂದ(ಜಿಪಿಎಫ್‌) ಹಣ ಹಿಂತೆಗೆಯುವ ಅವಧಿಯನ್ನು ಈಗ 15 ದಿನಕ್ಕೆ ಇಳಿಕೆ ಮಾಡಲಾಗಿದೆ. ಹೊಸ ನಿಯಮವು 50 ಲಕ್ಷ ಕೇಂದ್ರ ಸರಕಾರಿ ನೌಕರರಿಗೆ ಸಂತಸವನ್ನು ತಂದಿದೆ. ಅಲ್ಲದೇ, ಸೇವಾ ಅವಧಿ 15 ವರ್ಷ ಪೂರೈಸಿದ ನಂತರ ಜಿಪಿಎಫ್‌ ಹಿಂತೆಯುವ ನಿಯಮವನ್ನು ಬದಲಿಸಲಾಗಿದ್ದು, ಅವಧಿಯನ್ನು ಈಗ 10 ವರ್ಷಕ್ಕೆ ಇಳಿಕೆ ಮಾಡಲಾಗಿದೆ. ಕೆಲವು ಆಯ್ದ ಕಾರಣಗಳಿಗೆ ಈ ಸೌಲಭ್ಯ ದೊರೆಯಲಿದೆ. ಪ್ರಾಥಮಿಕ, ಪ್ರೌಢ ಮತ್ತು ಉನ್ನತ ವ್ಯಾಸಂಗ ಸೇರಿದಂತೆ ಶಿಕ್ಷಣದ ಉದ್ದೇಶಕ್ಕಾಗಿ ಜಿಪಿಎಫ್‌ ಹಣ ಹಿಂತೆಗೆದುಕೊಳ್ಳಬಹುದು. ಈ ಮೊದಲು ಹೈಸ್ಕೂಲ್‌ ಹಂತದ ವಿದ್ಯಾಭ್ಯಾಸಕ್ಕಾಗಿ ಮಾತ್ರ ಹಣ ತೆಗೆಯಲು ಸದಸ್ಯರಿಗೆ ಅವಕಾಶ ಕಲ್ಪಿಸಲಾಗಿತ್ತು. ಜಿಪಿಎಫ್‌ ಸದಸ್ಯ ಅಥವಾ ಅವರ ಕುಟುಂಬ ಸದಸ್ಯರ ನಿಶ್ಚಿತಾರ್ಥ, ಮದುವೆ, ಉತ್ತರ ಕ್ರಿಯೆ, ಅನಾರೋಗ್ಯ ಮತ್ತಿತರ ಕಾರಣಗಳಿದ್ದರೇ, ಹಣವನ್ನು ಹಿಂಪಡೆಯಲು ಅವಕಾಶವಿದೆ. ಅನಾರೋಗ್ಯಕ್ಕಾದರೆ ಜಿಪಿಎಫ್‌ನಲ್ಲಿ ಶೇ.90 ಭಾಗದ ತನಕ, ಇತರೆ ಕಾರಣಗಳಾದರೆ ನಾಲ್ಕನೇ ಮೂರು ಭಾಗ ಅಥವಾ 12 ತಿಂಗಳ ಪಾವತಿ ಮೊತ್ತದಲ್ಲಿ ಯಾವುದು ಕಡಿಮೆಯೋ ಅಷ್ಟನ್ನು ಹಿಂಪಡೆಯಬಹುದಾಗಿದೆ. ಜಿಪಿಎಫ್‌ ಅನ್ನು ಕಾರು, ಸ್ಕೂಟರ್‌ನಂಥ ಗ್ರಾಹಕೋತ್ಪನ್ನಗಳ ಖರೀದಿ ಸಲುವಾಗಿಯೂ ಬಳಸಬಹುದಾಗಿದೆ. ಹೊಸ ನಿಯಮದ ಪ್ರಕಾರ ಜಿಪಿಎಫ್‌ನಿಂದ ಹಣ ತೆಗೆಯುವ ಸಂದರ್ಭದಲ್ಲಿ ಅದನ್ನು ಮಂಜೂರು ಮಾಡುವ ಮತ್ತು ಕೈಗೆ ನೀಡುವ ಅವಧಿಯನ್ನು 15 ದಿನಗಳಿಗೆ ಸೀಮಿತಗೊಳಿಸಲಾಗಿದೆ. ಅನಾರೋಗ್ಯದಂಥ ತುರ್ತು ಸಂದರ್ಭಗಳಲ್ಲಿ 7 ದಿನದೊಳಗೆ ಹಣವನ್ನು ಪಡೆಯಬಹುದಾಗಿದೆ. 'ಸದಸ್ಯರು ಎದುರಿಸುವ ಪರಿಸ್ಥಿತಿಗಳ ಅನುಸಾರ ಕಾಲಕಾಲಕ್ಕೆ ನಿಯಮಗಳಲ್ಲಿ ಬದಲಾವಣೆ ಮಾಡಲಾಗುತ್ತಿದೆ,' ಎಂದು ಸಿಬ್ಬಂದಿ ಮತ್ತು ಸಾರ್ವಜನಿಕ ಕುಂದು ಕೊರತೆ ಮತ್ತು ಪಿಂಚಣಿ ಸಚಿವಾಲಯ ಹೇಳಿದೆ. ಹಣ ಹಿಂಪಡೆಯಲು ಪೂರಕ ದಾಖಲೆಗಳನ್ನು ಕೊಡಬೇಕಿಲ್ಲ. ಸ್ವಯಂ ದೃಢೀಕರಿಸಿದರೆ ಸಾಕು.
↧
ಜಿಪಿಎಫ್‌ ಹೊಸ ನಿಯಮ: 15 ದಿನದಲ್ಲಿ ಹಣ ವಾಪಸ್‌
↧