ಬೃಹತ್‌ ಸಾಧು ಸಂತರ ಸಮಾವೇಶ

ಶಹಾಪುರ: ಸಾಧು,ಸಂತರ, ಮಹಾಂತರ ನೆಲೆಬೀಡಾದ ಸಗರನಾಡಿನ ಶಹಾಪುರ ತಾಲೂಕಿನ ಮೂಡಬೂಳದ ಅವಧೂತ ಸದ್ಗುರು ರಂಗಲಿಂಗೇಶ್ವರ ಗುರುಗಳ ಸವಿ ನೆನಪಿಗಾಗಿ ಮಾರ್ಚ 27ರಂದು 101 ಸಾಧು ಸಂತರ ಬೃಹತ್‌ ಶಹಾಪುರದಲ್ಲಿ ಸಮಾವೇಶ ಜರುಗಲಿದೆ ಎಂದು ತಾಲೂಕಿನ ಶಿರವಾಳ ವಲಯ ಕಸಾಪ ಅಧ್ಯಕ್ಷ ಮಲ್ಲಣ್ಣ ಹೊಸಮನಿ ತಿಳಿಸಿದ್ದಾರೆ.

ನಗರದ ಪ್ರವಾಸಿ ಮಂದಿರದಲ್ಲಿ ಸಮಾವೇಶದ ಕುರಿತು ಸುದ್ದಿಗಾರರೊಂದಿಗೆ ಮಾತನಾಡಿ, ನಗರದಲ್ಲಿ ಪ್ರಪ್ರಥಮ ಬಾರಿಗೆ ಚರಬಸವೇಶ್ವರ ಗದ್ದುಗೆ ಕಲ್ಯಾಣ ಮಂಟಪದಲ್ಲಿ 27ರಂದು ಬೆಳಿಗ್ಗೆ 10.30ಗಂಟೆಗೆ ಬೃಹತ್‌ ಸಾಧು ಸಂತರ ಸಮಾವೇಶ ಉದ್ಘಾಟನೆ ನಡೆಯಲಿದೆ. ಚರಬಸವೇಶ್ವರ ಸಂಸ್ಥಾನದ ಬಸವಯ್ಯ ಶರಣರು, ಯಾದಗಿರಿ ದಾಳಬಾಳ ಮಠದ ವೀರೇಶ ಸ್ವಾಮಿಗಳು,ವೀರಗೊಟ್ಟದ ಆದಿಲಿಂಗೇಶ್ವರ ಸಂಸ್ಥಾನದ ಅಡವಿಲಿಂಗ ಮಹಾರಾಜರು, ಹೋತಪೇಟ ಕೈಲಾಶ ಆಶ್ರಮದ ಶಿವಲಿಂಗ ಶರಣರು,ಸಿದ್ಧಾರೂಢ ಮಠದ ಮಾತೋಶ್ರೀ ಜ್ಞಾನೇಶ್ವರಿ ಅಮ್ಮ, ಪಂಚಾಚಾರ್ಯ ಸೇವಾಭೂಷಣ ಕಲಬುರ್ಗಿಯ ಗಿರಿಯಪ್ಪ ಮುತ್ಯಾ ಅವರು ಸಾನ್ನಿಧ್ಯವನ್ನು ವಹಿಸಿ ಅನುಭವದ ಆರ್ಶಿವಚನ ನೀಡುವರು.

ತಾಲೂಕಿನ ಶರಣ ಸಾಹಿತ್ಯ ಪರಿಷತ್‌ ಅಧ್ಯಕ್ಷ ಲಿಂಗಣ್ಣ ಪಡಶೆಟ್ಟಿ ಉದ್ಘಾಟಿಸುವರು. ಮುಖ್ಯ ಅತಿಥಿಗಳಾಗಿ ತಾಲೂಕು ಕಸಾಪ ಅಧ್ಯಕ್ಷ ಸಿದ್ದಲಿಂಗಣ್ಣ ಆನೆಗುಂದಿ ಆಗಮಿಸುವರು. ರಾಘವೇಂದ್ರ ಹಾರಣಗೇರಾ ಮತ್ತು ನಿವೃತ್ತ ಉಪನ್ಯಾಸಕ ಸೈಯದ್‌ ಚಾಂದ್‌ ಪಾಶಾ ಉಪನ್ಯಾಸ ನೀಡಲಿದ್ದಾರೆ.

ಸಮಾವೇಶದಲ್ಲಿ 101 ಕಾವಿಧಾರಿಗಳಿಗೆ ಸಮವಸ್ತ್ರ ವಿತರಿಸಲಾಗುವುದು. ನಾಡಿನ ನೆಲ,ಜಲ,ಸಂಸ್ಕೃತಿ ಸಂಪ್ರದಾಯಗಳನ್ನು ಮುಂದಿನ ಪೀಳಿಗೆಗೆ ರವಾನಿಸಲು ಈ ಸಮಾವೇಶ ದಾರಿ ದೀಪವಾಗಲಿ ಎಂದು ಅಭಿಪ್ರಾಯಿಸಿದರು. ಮಾನಪ್ಪ ಬಡಿಗೇರ ಮೂಡಬೂಳ,ಸಂಗಣ್ಣಗೌಡ ಮಡ್ನಾಳ,ಮಾರ್ಥಂಡಪ್ಪ ಶಿರವಾಳ,ಸಂಗಣ್ಣ ಹತ್ತಿ ಹೊನ್ನಕಿರಣಗಿ ಉಪಸ್ಥಿತರಿದ್ದರು.