- ಶರಣು ಹುಲ್ಲೂರು ಲೀ ಶಬ್ದವೇ ಬೆರಗು ಮೂಡಿಸುವಂಥದ್ದು. ಆ ಬೆರಗಿಗೆ ಕಾರಣ ಬ್ರೂಸ್ಲಿ. ಈ ಸಿನಿಮಾದ ನಾಯಕ ಕೂಡ ಒಂದೊಂದು ಬಾರಿ ಬ್ರೂಸ್ಲಿ ಅವತಾರ ತಾಳುತ್ತಾನೆ. ಹಳ್ಳಿ ಹಿನ್ನಲೆಯಲ್ಲಿ ಸಾಗುವ ಕತೆಯಲ್ಲಿ ಮಾರ್ಷಲ್‌ ಆರ್ಟ್ಸ್ನ ತರಬೇತುದಾರನಾಗಿ ಕಾಣಿಸಿಕೊಂಡರೆ, ಸಡನ್ನಾಗಿ ದೃಶ್ಯ ಬದಲಾದಾಗ ಹುಚ್ಚ. ಅರೆರೇ.. ನಾಯಕ ಹುಚ್ಚನಾ? ಅನ್ನುವಷ್ಟರಲ್ಲಿ ಲವರ್‌ ಬಾಯ್‌ ಆಗಿ ಧುತ್ತೆಂದು ಎದುರಾಗುತ್ತಾನೆ. ಈ ಮೂರು ಗೆಟಪ್‌ನಲ್ಲೂ ಸುಮಂತ್‌ ತಮ್ಮ ಸಾಮರ್ಥ್ಯ‌ವನ್ನು ತೋರಿದ್ದಾರೆ. ಅದರಲ್ಲೂ ಹುಚ್ಚನ ಪಾತ್ರದಲ್ಲಿ ಲೀಲಾಜಾಲವಾಗಿ ಅಭಿನಯಿಸಿದ್ದಾರೆ. ಸಿನಿಮಾದ ಕತೆ ಸಿಂಪಲ್‌. ಲೀ ಅಲಿಯಾಸ್‌ ಚಾರ್ಲಿ (ಸುಮಂತ್‌) ಹಳ್ಳಿಯ ಹುಡುಗ. ಅಲ್ಲಿನ ಮಕ್ಕಳಿಗೆ ಮಾರ್ಷಲ್‌ ಆರ್ಟ್ಸ್ ಹೇಳಿಕೊಡುವ ತರಬೇತಿದಾರ. ಅದೇ ಊರಿನ ಲೀಲಾ (ನಭಾ ನಟೇಶ್‌) ಳಿಗೆ ಮಾರು ಹೋಗುತ್ತಾನೆ. ನಂತರದ ದಿನಗಳಲ್ಲಿ ಇಬ್ಬರೂ ಇಷ್ಟಪಡುತ್ತಾರೆ. ಬೇರೆ ಬೇರೆ ಧರ್ಮದವರಾದ್ದರಿಂದ ಎರಡು ಕುಟುಂಬದ ಮಧ್ಯ ವೈಮನಸ್ಸುಂಟಾಗುತ್ತದೆ. ಹಾಗಾಗಿ ಪಟ್ಟಣಕ್ಕೆ ಹಾರುತ್ತಾರೆ ಚಾರ್ಲಿ ಮತ್ತು ಲೀಲಾ. ಅಲ್ಲಿಂದ ಇವರ ಜೀವನ ಮತ್ತೊಂದು ದಿಕ್ಕಿನತ್ತ ಸಾಗುತ್ತದೆ. ಹಲವು ಸಂಕಷ್ಟಗಳು ಎದುರಾಗುತ್ತವೆ. ಅವುಗಳಿಂದ ಇವರು ಪಾರಾಗುತ್ತಾರಾ? ಅಥವಾ ದುಷ್ಟ ಶಕ್ತಿಗಳಿಗೆ ಆಹಾರ ಆಗುತ್ತಾರಾ? ಅನ್ನುವುದೇ ಸಿನಿಮಾ. ಈ ಮಧ್ಯೆ ಜಾತಿಯ ಸಂಘರ್ಷವಿದೆ. ಪೊಲೀಸ್‌ ವ್ಯವಸ್ಥೆಯ ಕರಾಳ ಪುಟಗಳು ತೆರೆದುಕೊಳ್ಳುತ್ತವೆ. ಸಮಾಜವನ್ನು ಕಿತ್ತು ತಿನ್ನುತ್ತಿರುವ ಕೆಲ ಮಾಫಿಯಾಗಳ ಮುಖವಾಡ ಕೂಡ ಬಯಲಾಗುತ್ತಿವೆ. ಇಷ್ಟೆಲ್ಲ ಅಂಶಗಳಿಗೆ ಕಮರ್ಷಿಯಲ್‌ ಟಚ್‌ ಕೊಡಲಾಗಿದ್ದು, ಎಲ್ಲ ವರ್ಗದ ಪ್ರೇಕ್ಷಕರನ್ನೂ ಮೆಚ್ಚಿಸುವಂತೆ ಚಿತ್ರಕಥೆ ಹೆಣೆದಿದ್ದಾರೆ ನಿರ್ದೇಶಕರು. ಸಿನಿಮಾದಲ್ಲಿ ಪ್ಲಸ್‌ ಪಾಯಿಂಟ್‌ ತಾರಾಗಣ. ಚಿಕ್ಕಣ್ಣ, ಸಾಧು ಕೋಕಿಲಾ, ತಬಲಾ ನಾಣಿ, ರಂಗಾಯಣ ರಘು ಹೀಗೆ ಕನ್ನಡದ ಬಹುತೇಕ ಹಾಸ್ಯ ನಟರು ಇಲ್ಲಿದ್ದಾರೆ. ರಾಹುಲ್‌ ದೇವ್‌, ಜಯಶಂಕರ್‌, ರೋಬೋ ಗಣೇಶ್‌ ವಿಲನ್‌ ಪಾತ್ರಗಳಲ್ಲಿ ಅಬ್ಬರಿಸಿದ್ದಾರೆ. ಅಚ್ಯುತ್‌ ಕುಮಾರ್‌, ಸುಚೇಂದ್ರ ಪ್ರಸಾದ್‌ ಅವರಂಥ ಅನುಭವಿ ಕಲಾವಿದರ ದಂಡೇ ಇದೆ. ಜೋಗಿ ಚಿತ್ರ ಖ್ಯಾತಿಯ ನಂದಾ ಅವರ ಸಿನಿಮಾಟೋಗ್ರಫಿ ಚಿತ್ರವನ್ನು ಮತ್ತಷ್ಟು ಅಂದಗೊಳಿಸಿದೆ. ಸಿನಿಮಾದ ಬಹುತೇಕ ಹಾಡುಗಳು ಕಲರ್‌ಫುಲ್‌ ಆಗಿ ಮೂಡಿ ಬಂದಿವೆ. ಬಹುತೇಕ ಕಲಾವಿದರು ತಮ್ಮ ಪಾತ್ರಗಳನ್ನು ಅಚ್ಚುಕಟ್ಟಾಗಿ ನಿಭಾಯಿಸಿದ್ದಾರೆ. ಮಾಸ್ಟರ್‌ ಓಂ ಕೂಡ ಮಕ್ಕಳಿಗೆ ರಂಜಿಸುವಲ್ಲಿ ಸಫಲನಾಗಿದ್ದಾನೆ. ಪಟಾಕಾ ಖ್ಯಾತಿಯ ನಭಾ ನಟೇಶ್‌ ಎಂದಿನ ತಮ್ಮ ಪಟಾಕಿ ಸೌಂಡ್‌ ಮುಂದುವರಿಸಿದ್ದಾರೆ. ಮತ್ತೋರ್ವ ನಾಯಕಿ ಸ್ನೇಹಾ ನಟನೆಗಿಂತಲೂ ಸಖತ್‌ ಬೋಲ್ಡ್‌ ಆಗಿ ಕಂಡಿದ್ದಾರೆ. ಜತೆಗೆ ನಕಾರಾತ್ಮಕ ಅಂಶಗಳು ಚಿತ್ರದಲ್ಲಿವೆ. ಚಿತ್ರಕತೆ ಹೆಣೆಯುವ ವಿಧಾನದಲ್ಲಿ ಗಟ್ಟಿತನ ಬೇಕಿತ್ತು. ಪ್ರಸೆಂಟ್‌ ಮತ್ತು ಪಾಸ್ಟ್‌ ಮಾದರಿಯ ಸ್ಕ್ರೀನ್‌ ಪ್ಲೇ ಇಲ್ಲಿರುವುದರಿಂದ ಸಿನಿಮಾ ಕಟ್ಟುವ ಕ್ರಮದಲ್ಲಿ ಎಚ್ಚರಿಕೆ ವಹಿಸಿಕೊಳ್ಳಬೇಕಿತ್ತು. ನಾಯಕನಿಗೆ ಮೂರು ಶೇಡ್‌ ಇರುವ ಕಾರಣಕ್ಕಾಗಿ ಅಲ್ಲಲ್ಲಿ ಗೊಂದಲ ಮೂಡುತ್ತದೆ. ಕಮರ್ಷಿಯಲ್‌ ಹೆಸರಿನಲ್ಲಿ ಹಸಿಬಿಸಿ ದೃಶ್ಯಗಳಿಗೆ ಒತ್ತು ನೀಡಲಾಗಿದೆ. ಅದು ಗಂಭೀರ ದೃಶ್ಯಗಳಿಗೆ ಕೊಂಚ ಅಡಚಣೆ ಎನಿಸುತ್ತದೆ. ಉಳಿದಂತೆ ಚಿತ್ರ ಉತ್ತಮ.
ಸಿನಿಮಾ ಅನ್ನುವುದು ನಿರ್ದೇಶಕ ಬರೆದುಕೊಂಡ ಸ್ಕ್ರಿಪ್ಟ್‌ಗಿಂತ, ಸಂಕಲನದ ಟೇಬಲ್‌ ಮೇಲೆ ಅದು ಸರಿಯಾದ ರೂಪ ಪಡೆದುಕೊಳ್ಳುತ್ತದೆ ಅನ್ನುತ್ತದೆ ಸಿನಿಮಾ ಸಂವಿಧಾನ. ಶ್ರೀನಂದನ್‌ ನಿರ್ದೇಶನದಲ್ಲಿ ಮೂಡಿ ಬಂದ 'ಲೀ' ಚಿತ್ರದಲ್ಲಿ ಈ ಮ್ಯಾಜಿಕ್‌ ಕೆಲಸ ಮಾಡಿದೆ. ಭೂತ ಮತ್ತು ವರ್ತಮಾನದ ದೃಶ್ಯಗಳ ಸಮೀಕರಣದ ತಂತ್ರ ಇಲ್ಲಿ ಬಳಕೆ ಆಗಿದ್ದು, ಕತೆ ಹೇಳುವ ಈ ಮಾದರಿಗಿಂತಲೂ ಕಲರ್‌ಫುಲ್‌ ಮೇಕಿಂಗ್‌ನಿಂದಾಗಿ ಗಮನ ಸೆಳೆಯುತ್ತದೆ.
↧
ಲೀ: ಪಾಸ್ಟ್‌ ಮತ್ತು ಪ್ರೆಸೆಂಟ್‌ ನಡುವಿನ ಲೀ
↧