ಹೊಸದಿಲ್ಲಿ: ನಗದು ರೂಪದಲ್ಲಿ 2 ಲಕ್ಷ ರೂ.ಗಿಂತಲೂ ಹೆಚ್ಚಿನ ಮೊತ್ತದ ಆಭರಣಗಳನ್ನು ಖರೀದಿಸಿದರೆ, ಶೇ.1ರಷ್ಟು ಟಿಸಿಎಸ್‌(ಮೂಲದಲ್ಲೇ ತೆರಿಗೆ ಕಡಿತ) ವಿಧಿಸಲಾಗುತ್ತದೆ. ಏಪ್ರಿಲ್‌ 1ರಿಂದ ನಿಯಮ ಜಾರಿಗೆ ಬರಲಿದೆ. 'ಹಣಕಾಸು ವಿಧೇಯಕ 2017' ಜಾರಿಗೆ ಬಂದ ನಂತರ ಆಭರಣಗಳನ್ನು ಸಾಮಾನ್ಯ ಸರಕೆಂದು ಪರಿಗಣಿಸಲಾಗುತ್ತದೆ. ಅದರನ್ವಯ, ಆಭರಣ ಮೊತ್ತದಲ್ಲಿ ಶೇ.1ರಷ್ಟು ಟಿಸಿಎಸ್‌ ಕಡಿತ ಮಾಡಲಾಗುತ್ತದೆ. ನಗದು ರೂಪದಲ್ಲಿ 5 ಲಕ್ಷ ರೂ. ಮೀರಿದ ಆಭರಣ ಖರೀದಿಗೆ ಈ ಮೊದಲು ಆದಾಯ ತೆರಿಗೆ ಇಲಾಖೆ ಶೇ.1ರಷ್ಟು ಟಿಸಿಎಸ್‌ ವಿಧಿಸುತ್ತಿತ್ತು. 2012ರ ಜುಲೈ 1ರಿಂದ ನಿಯಮ ಜಾರಿಯಲ್ಲಿತ್ತು. ಇನ್ನು ಮುಂದೆ ನಗದು ಮೊತ್ತವು 5 ರಿಂದ 2 ಲಕ್ಷ ರೂ.ಗಳಿಗೆ ಇಳಿಕೆಯಾಗಲಿದೆ. ನಗದು ವಹಿವಾಟು ತಡೆದು ಡಿಜಿಟಲ್‌ ವಹಿವಾಟು ಉತ್ತೇಜಿಸುವ ನಿಟ್ಟಿನಲ್ಲಿ ಸರಕಾರ ಈ ಕ್ರಮ ಜಾರಿಗೊಳಿಸಲು ಮುಂದಾಗಿದೆ. ನಗದು ವ್ಯವಹಾರಗಳ ಮೇಲೆ ಕಣ್ಣಿಡುತ್ತಿರುವ ಸರಕಾರವು, ಏಪ್ರಿಲ್‌ 1ರಿಂದ 3 ಲಕ್ಷ ರೂ. ಮೊತ್ತದ ನಗದು ವ್ಯವಹಾರಗಳಿಗೆ ಶೇ.100 ರಷ್ಟು ದಂಡ ವಿಧಿಸಲೂ ಮುಂದಾಗಿದೆ. ಕಾಳಧನ ನಿಗ್ರಹದ ನಿಟ್ಟಿನಲ್ಲಿ ಈ ಕ್ರಮಗಳು ಜಾರಿಯಾಗಲಿವೆ.
↧
2 ಲಕ್ಷ ರೂ.ಗಿಂತಲೂ ಹೆಚ್ಚಿನ ಮೊತ್ತದ ಆಭರಣ ಖರೀದಿಗೆ 1% ತೆರಿಗೆ
↧