ರೈಲ್ವೆ ಬಾಂಡ್ ಖರೀದಿಸಿದ ಆಮಿರ್, ಅಕ್ಷಯ್

ತೆರಿಗೆ ಉಳಿಸುವ ಐಆರ್‌ಎಫ್‌ಸಿ ಬಾಂಡ್‌ಗಳಿಗೆ ಉತ್ತಮ ಪ್ರತಿಕ್ರಿಯೆ
ಮುಂಬಯಿ: ಭಾರತೀಯ ರೈಲ್ವೆ ಫೈನಾನ್ಸ್ ಕಾರ್ಪೊರೇಷನ್(ಐಆರ್‌ಎಫ್‌ಸಿ) ಬಾಂಡ್‌ಗಳನ್ನು ಖರೀದಿಸಿದವರ ಪಟ್ಟಿಯಲ್ಲಿ ಆಮಿರ್ ಖಾನ್, ಅಕ್ಷಯ್ ಕುಮಾರ್, ಕಪೂರ್ ಸಹೋದರಿಯರಾದ ಕರೀನಾ ಮತ್ತು ಕರಿಷ್ಮಾ ಸೇರಿದಂತೆ ಅನೇಕ ಬಾಲಿವುಡ್ ನಟನಟಿಯರು ಇದ್ದಾರೆ.

ತಮ್ಮ ಹೂಡಿಕೆಯ ಆಯ್ಕೆಯಾಗಿ ತೆರಿಗೆಮುಕ್ತ ಐಆರ್‌ಎಫ್‌ಸಿ ಬಾಂಡ್‌ಗಳನ್ನು ಖರೀದಿಸಲು ಬಾಲಿವುಡ್ ಮಂದಿ ಉತ್ಸುಕತೆ ತೋರಿಸಿದ್ದಾರೆ. ಭಾರತೀಯ ಅರ್ಥ ವ್ಯವಸ್ಥೆ ಬೆಳೆಯುತ್ತವೆ ಎನ್ನುವ ವಿಶ್ವಾಸದಲ್ಲಿ ಈ ತೀರ್ಮಾನವನ್ನು ಬಾಲಿವುಡ್ ನಟರು ಕೈಗೊಂಡಿದ್ದಾರೆ. ಉತ್ತಮ ಪ್ರತಿಕ್ರಿಯೆಯಿಂದಾಗಿ 4,532 ಕೋಟಿ ರೂ. ಸಂಗ್ರಹಿಸುವ ಗುರಿ ಹೊಂದಿದ್ದ ಐಆರ್‌ಎಫ್‌ಸಿ, 10,796 ಕೋಟಿ ರೂ.ನಷ್ಟು ಬಿಡ್‌ಗಳನ್ನು ಸ್ವೀಕರಿಸಿದೆ.

ಇತ್ತೀಚೆಗಷ್ಟೇ ಅಸಹಿಷ್ಣುತೆ ವಿವಾದದಲ್ಲಿ ಸಿಲುಕಿದ್ದ ನಟ ಆಮಿರ್ ಖಾನ್, 10 ಕೋಟಿ ರೂ.ಮೌಲ್ಯದ ಐಆರ್‌ಡಿಸಿ ಬಾಂಡ್‌ಗಳನ್ನು ಖರೀದಿಸಿದ್ದಾರೆ. ಇದೇ ರೀತಿ ಅಕ್ಷಯ್ ಕುಮಾರ್ ಅವರು 45 ಕೋಟಿ ಬಾಂಡ್‌ಗಳಿಗೆ ಬಿಡ್ ಮಾಡಿದ್ದಾರೆ. ಕರೀನಾ ಮತ್ತು ಕರಿಷ್ಮಾ ಸಹೋದರಿಯರು ಕ್ರಮವಾಗಿ 20 ಕೋಟಿ ಮತ್ತು 5 ಕೋಟಿ ರೂ.ಗಳ ಬಾಂಡ್‌ಗಳನ್ನು ಖರೀದಿಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ಕೇವಲ ಬಾಲಿವುಡ್ ಮಂದಿ ಮಾತ್ರವಲ್ಲ, ಕಾರ್ಫೊರೇಟ್ ಕಂಪನಿಗಳ ಮುಖ್ಯಸ್ಥರು ಮತ್ತು ಶ್ರೀಮಂತರು ಈ ಬಾಂಡ್‌ಗಳತ್ತ ಆಕರ್ಷಿತರಾಗಿದ್ದಾರೆ. ಶೇ.7.53ರಿಂದ 7.50ರ ತನಕ ಬಡ್ಡಿಯನ್ನು 10ರಿಂದ 15 ಮತ್ತು 20 ವರ್ಷಗಳ ಅವಧಿಯ ಬಾಂಡ್‌ಗಳಿಗೆ ಪಡೆಯಲಿದ್ದಾರೆ.

ಎಚ್‌ಡಿಎಫ್‌ಸಿ ಉಪಾಧ್ಯಕ್ಷ ಕೇಕಿ ಮಿಸ್ತ್ರಿ, ನೀರಜ್ ಬಜಾಜ್, ಮಧುರ್ ಬಜಾಜ್, ಶೇಖರ್ ಬಜಾಜ್, ಎಚ್‌ಡಿಎಫ್‌ಸಿ ಮ್ಯೂಚುವಲ್ ಫಂಡ್ ಮ್ಯಾನೇಜಿಂಗ್ ಡೈರೆಕ್ಟರ್ ಮಿಲಿಂದ್ ಬ್ರೇವ್ ಅವರು 5 ರಿಂದ 10 ಕೋಟಿ ರೂ.ಗಳನ್ನು ಈ ಬಾಂಡ್ ಯೋಜನೆಗೆ ವಿನಿಯೋಗಿಸಿದ್ದಾರೆ.

ಆರ್ಕಿಟೆಕ್ಟ್ ಹಫೀಜ್ ಕಾಂಟ್ರ್ಯಾಕ್ಟರ್ ಅವರು 15 ಕೋಟಿ ರೂ. ಹೂಡಿಕೆ ಮಾಡಿದ್ದಾರೆ. ದೇಶದ ದೊಡ್ಡ ಬ್ಯಾಂಕ್‌ಗಳಲ್ಲಿ ಒಂದಾದ ಸ್ಟೇಟ್ ಬ್ಯಾಂಕ್ ಆಫ್ ಇಮಡಿಯಾ 2,600 ಕೋಟಿ ರೂ., ವಿಫ್ರೊ 1,000 ಕೋಟಿ ರೂ.ಗಳನ್ನು ಈ ಬಾಂಡ್‌ಗಳಲ್ಲಿ ಹೂಡಿಕೆ ಮಾಡಿದೆ. ಇನ್ಫೋಸಿಸ್, ಆಕ್ಸಿಸ್ ಬ್ಯಾಂಕ್, ಯೆಸ್ ಬ್ಯಾಂಕ್‌ಗಳೂ ಬಾಂಡ್ ಖರೀದಿಗೆ ಮುಂದಾಗಿವೆ.

ಇತರೆ ಬಾಂಡ್‌ಗಳಿಗೆ ನೀರಸ ಪ್ರತಿಕ್ರಿಯೆ

ನ್ಯಾಷನಲ್ ಥರ್ಮಲ್ ಪವರ್ ಕಾರ್ಪೊರೇಷನ್(ಎನ್‌ಟಿಪಿಸಿ), ಪವರ್ ಫೈನಾನ್ಸ್ ಕಾರ್ಪೊರೇಷನ್(ಪಿಎಫ್‌ಸಿ), ಆರ್‌ಇಸಿ ಮತ್ತಿತರ ಸಂಸ್ಥೆಗಳು ಎರಡು ತಿಂಗಳ ಹಿಂದೆ ಇಂಥದ್ದೇ ಬಾಂಡ್‌ಗಳ ಮೂಲಕ ಮಾರುಕಟ್ಟೆ ಪ್ರವೇಶಿಸಿದ್ದವು. ಆದರೆ ತಲಾ 750 ಕೋಟಿ ರೂ.ಗಳನ್ನಷ್ಟೇ ಸಂಗ್ರಹಿಸಲು ಸಾಧ್ಯವಾಗಿತ್ತು.

ಉತ್ತಮ ರಿಟರ್ನ್ಸ್

ಬ್ಯಾಂಕ್‌ನ ನಿಶ್ಚಿತ ಠೇವಣಿಗಳಿಗೆ ಹೋಲಿಸಿದರೆ ಐಆರ್‌ಎಫ್‌ಸಿ ಬಾಂಡ್‌ಗಳು ಸೂಕ್ತ. ತೆರಿಗೆ ಉಳಿಸುವುದಲ್ಲದೇ, ಉತ್ತಮ ರಿಟರ್ನ್ಸ್ ಅನ್ನು ನಿರೀಕ್ಷಿಸಬಹುದಾಗಿದೆ ಎಂದು ಹಣಕಾಸು ಸಲಹೆಗಾರರು ಹೇಳುತ್ತಾರೆ. ವಾರ್ಷಿಕ ಶೇ.7.5 ಬಡ್ಡಿದರವನ್ನು ಈ ಬಾಂಡ್‌ಗಳು ಹೊಂದಿದ್ದು, ಇವನ್ನು ಖರೀದಿಸಿದವರು ಮುಂದಿನ 20 ವರ್ಷಗಳ ಕಾಲ ತೆರಿಗೆ ರಿಯಾಯಿತಿಯನ್ನು ಪಡೆಯಲಿದ್ದಾರೆ.