ಅಯೋಧ್ಯಾ: ಪ್ರಧಾನಿ ಮೋದಿ ಅಯೋಧ್ಯೆಯಲ್ಲಿ ರಾಮಮಂದಿರ ಕಟ್ಟುವ ಭರವಸೆ ನೀಡಿದರೆ ಮಾತ್ರ ಮುಂಬರುವ ಉತ್ತರ ಪ್ರದೇಶ ಚುನಾವಣೆಯಲ್ಲಿ ಮಠಾಧೀಶರು ಮತ್ತು ಸಾಧುಗಳು ಬಿಜೆಪಿಯನ್ನು ಬೆಂಬಲಿಸಲಿದ್ದಾರೆ ಎಂದು ರಾಮ ಮಂದಿರದ ಪ್ರಧಾನ ಅರ್ಚಕ ಆಚಾರ್ಯ ಸತ್ಯೇಂದ್ರ ದಾಸ್‌ ಹೇಳಿದ್ದಾರೆ. 'ಮಠಾಧೀಶರು ಮತ್ತು ಸಾಧುಗಳು ರಾಮನ ಪರಮ ಭಕ್ತರಾಗಿದ್ದು, ಅಯೋಧ್ಯೆಯಲ್ಲಿ ಭವ್ಯ ರಾಮಮಂದಿರವನ್ನು ಕಾಣುವ ಬಯಕೆ ಹೊಂದಿದ್ದಾರೆ. ಮೋದಿ ಸರಕಾರ ಅಧಿಕಾರಕ್ಕೆ ಬಂದಿದ್ದರಿಂದ ಮಂದಿರ ನಿರ್ಮಾಣವಾಗಲಿದೆ ಎಂಬ ಆಶಾಭಾವನೆಯಿದೆ' ಎಂದು ದಾಸ್‌ ತಿಳಿಸಿದ್ದಾರೆ. 'ಮೋದಿ ಅಯೋಧ್ಯೆಗೆ ಭೇಟಿ ನೀಡಿ ರಾಮಮಂದಿರ ಕಟ್ಟುವ ಕುರಿತು ಭರವಸೆ ನೀಡಬೇಕು. ಆಗ ನಾವೆಲ್ಲರೂ ಹಿಂದೂಗಳನ್ನು ಒಂದುಗೂಡಿಸಿ ಬಿಜೆಪಿಗೆ ಮತ ನೀಡುವಂತೆ ಮನವೊಲಿಸುತ್ತೇವೆ. ಉತ್ತರ ಪ್ರದೇಶದಲ್ಲಿ ಮಠಾಧೀಶರು ಮತ್ತು ಸಾಧುಗಳಿಗೆ ಸಾಕಷ್ಟು ಜನಬೆಂಬಲವಿದೆ' ಎಂದಿದ್ದಾರೆ. ಆಡ್ವಾಣಿ ಬಗ್ಗೆ ಬೇಸರ ಅಯೋಧ್ಯೆಯಲ್ಲಿ ರಾಮಮಂದಿರದ ಹೆಸರಿನಲ್ಲಿ ಅಧಿಕಾರಕ್ಕೆ ಬಂದ ಬಿಜೆಪಿ ಸಂಸದರು ಒಂದು ಬಾರಿಯೂ ಸಂಸತ್ತಿನಲ್ಲಿ ಈ ಕುರಿತು ಧ್ವನಿ ಎತ್ತಿಲ್ಲ ಎಂದು ಅಯೋಧ್ಯೆಯ ರಸಿಕ ನಿವಾಸ ದೇವಸ್ಥಾನದ ಅರ್ಚಕರಾದ ರಘುವೀರ್‌ ಶರಣ್‌ ಆರೋಪಿಸಿದರು. 'ಆಡ್ವಾಣಿ, ಮುರಳಿ ಮನೋಹರ ಜೋಷಿ, ಉಮಾ ಭಾರತಿ, ವಿನಯ್‌ ಕಟಿಯಾರ್‌ ಸೇರಿದಂತೆ ಬಹುತೇಕ ಬಿಜೆಪಿ ನಾಯಕರು ಮಂದಿರದ ಹೆಸರಿನಲ್ಲಿ ಅಧಿಕಾರ ಪಡೆದರು. ಆದರೆ ಅವರಾರೂ ಮಂದಿರ ನಿರ್ಮಾಣಕ್ಕೆ ಮುಂದಾಗುವಂತೆ ಪ್ರಧಾನಿ ಮೋದಿಯವರಿಗೆ ಬೇಡಿಕೆ ಸಲ್ಲಿಸಿಲ್ಲ' ಎಂದು ಶರಣ್‌ ದೂರಿದರು.
↧
ಮಂದಿರ ಕಟ್ಟುವ ಭರವಸೆ ನೀಡಿದರೆ ಮಾತ್ರ ಮತ : ಪ್ರಧಾನ ಅರ್ಚಕ ದಾಸ್‌
↧