ಒಂದೇ ಹೋರ್ಡಿಂಗ್‌ನಲ್ಲಿ ಪ್ರಿಯಾಂಕಾ-ಡಿಂಪಲ್‌ ಯಾದವ್‌ ಹೊಸದಿಲ್ಲಿ: ಸೈಕಲ್‌ ಚಿಹ್ನೆಯನ್ನು ಯಾರಿಗೆ ಕೊಡಬೇಕು ಎನ್ನುವ ಬಗ್ಗೆ ಚುನಾವಣೆ ಆಯೋಗ ಇನ್ನೂ ನಿರ್ಧರಿಸಿಲ್ಲ. ಅಷ್ಟರ ನಡುವೆಯೇ ಸಮಾಜವಾದಿ ಪಾರ್ಟಿಯು ಕಾಂಗ್ರೆಸ್‌ ಪಕ್ಷದೊಂದಿಗೆ ಮೈತ್ರಿ ರಾಜಕಾರಣದಲ್ಲಿ ಬಹುತೇಕ ಯಶಸ್ಸು ಸಾಧಿಸಿರುವುದು ಸ್ಪಷ್ಟವಾಗಿದೆ. ಉತ್ತರ ಪ್ರದೇಶ ಮುಖ್ಯಮಂತ್ರಿ ಅಖಿಲೇಶ್‌ ಯಾದವ್‌ ಅವರು ಪಕ್ಷದೊಳಗಿನ ಜಗಳದ ಸಿಕ್ಕಿನಲ್ಲಿ ಸಿಕ್ಕಿಹಾಕಿಕೊಂಡಿರುವ ನಡುವೆಯೇ ಅವರ ಪತ್ನಿ ಡಿಂಪಲ್‌ ಯಾದವ್‌ ಅವರು ಮೈತ್ರಿ ರಾಜಕಾರಣದ ಸಾರಥ್ಯ ವಹಿಸಿ ಕಾಂಗ್ರೆಸ್‌ನ ಜತೆ ಹೊಂದಾಣಿಕೆ ಖಚಿತಪಡಿಸಿಕೊಂಡಿದ್ದಾರೆ ಎನ್ನಲಾಗುತ್ತಿದೆ. ಈ ನಿಟ್ಟಿನಲ್ಲಿ ಅವರು ಮಾತನಾಡಿದ್ದು ಕಾಂಗ್ರೆಸ್‌ನ ಮಹಿಳಾ ಶಕ್ತಿಯಾಗಿರುವ ಪ್ರಿಯಾಂಕಾ ವಾದ್ರಾ ಜತೆ. ಮೈತ್ರಿ ಬಗ್ಗೆ ಅಧಿಕೃತವಾಗಿ ಪಕ್ಷಗಳು ಏನನ್ನೂ ದೃಢೀಕರಿಸಿಲ್ಲವಾದರೂ ಅಲಹಾಬಾದ್‌ನ ಬೀದಿಗಳಲ್ಲಿ ಆಗಲೇ ಸ್ಥಾಪಿತವಾಗಿರುವ ಚುನಾವಣೆ ಸಂಬಂಧಿ ಪೋಸ್ಟರ್‌ಗಳು ಅದನ್ನು ಸಾಕ್ಷೀಕರಿಸುತ್ತಿವೆ. ಹಲವಾರು ಕಡೆಗಳಲ್ಲಿ ಡಿಂಪಲ್‌ ಯಾದವ್‌ ಮತ್ತು ಪ್ರಿಯಾಂಕಾ ವಾದ್ರಾ ಅವರು ಒಂದೇ ಕಟೌಟ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ. ಅದರಲ್ಲಿ, ''ಡಿಂಪಲ್‌ ಯಾದವ್‌ ಮತ್ತು ಪ್ರಿಯಾಂಕಾ ಒಂದಾದರೆ ಉತ್ತರ ಪ್ರದೇಶದ ಮಹಿಳೆಯರ ಸಬಲೀಕರಣವಾಗುತ್ತದೆ,'' ಎಂದು ಹೋರ್ಡಿಂಗ್‌ಗಳಲ್ಲಿ ಬರೆಯಲಾಗಿದೆ. ಡಿಂಪಲ್‌ಗೆ ಜವಾಬ್ದಾರಿ: ಪಕ್ಷದ ಒಳರಾಜಕೀಯದಲ್ಲೇ ಮುಳುಗಿರುವ ಅಖಿಲೇಶ್‌ ಯಾದವ್‌ ಮೈತ್ರಿ ವಿಷಯವನ್ನು ಪತ್ನಿ ಡಿಂಪಲ್‌ಗೆ ವಹಿಸಿದ್ದೇ ಯಶಸ್ಸಿನ ಮೂಲ ಎನ್ನಲಾಗುತ್ತಿದೆ. ಪತಿಯಿಂದ ಪ್ರೇರಣೆ ಪಡೆದ ಡಿಂಪಲ್‌ ಖುದ್ದಾಗಿ ಪ್ರಿಯಾಂಕಾ ವಾದ್ರಾ ಅವರನ್ನು ಭೇಟಿಯಾಗಿದ್ದು, ಅಲ್ಲಿಗೆ ಬಂದ ರಾಹುಲ್‌ ಗಾಂಧಿ ಅವರ ಜತೆಗೂ ಮಾತುಕತೆ ನಡೆಸಿ ಮೈತ್ರಿಗೆ ಅಡಿಪಾಯ ಹಾಕಿದ್ದಾರೆ ಎನ್ನಲಾಗಿದೆ. ಹಿಂದಿನ ಚುನಾವಣೆಗಳಲ್ಲಿ ಸಮಾಜವಾದಿ ಪಕ್ಷದ ಪ್ರಚಾರದಲ್ಲಿ ದೊಡ್ಡ ಪಾತ್ರ ವಹಿಸುತ್ತಿದ್ದ ಡಿಂಪಲ್‌ ಯಾದವ್‌ ಅವರು ತನ್ನ ಮೈತ್ರಿ ರಾಜಕಾರಣದಲ್ಲಿ ಯಶಸ್ಸು ಗಳಿಸಿದರೆ, ಪ್ರಿಯಾಂಕಾ ವಾದ್ರಾ ಮತ್ತು ಅವರು ಜತೆಯಾಗಿ ರಾರ‍ಯಲಿಗಳಲ್ಲಿ ಕಾಣಿಸಿಕೊಳ್ಳುವ ಸಾಧ್ಯತೆಗಳಿವೆ. ಫೋಟೊಗಳಿಗೆ ಬೇಡಿಕೆ: ಇತ್ತ ಚುನಾವಣೆಗೆ ಸಿದ್ಧವಾಗುತ್ತಿದ್ದಂತೆಯೇ ಡಿಂಪಲ್‌ ಯಾದವ್‌ ಅವರ ಫೋಟೊಗಳಿಗೆ ಭಾರಿ ಬೇಡಿಕೆ ಬಂದಿದೆ ಎಂದು ಲಖನೌನಲ್ಲಿರುವ ಸಮಾಜವಾದಿ ಪಾರ್ಟಿ ಕಚೇರಿಯ ಉಸ್ತುವಾರಿ ಆಯುಷಿ ಶ್ರೀವಾಸ್ತವ ಹೇಳುತ್ತಾರೆ. ಕಾಂಗ್ರೆಸ್‌ಗೆ 100 ಕ್ಷೇತ್ರಗಳ ಟಿಕೆಟ್‌ ಹೊಸದಿಲ್ಲಿ: ಇತ್ತ ಕಾಂಗ್ರೆಸ್‌ ನಾಯಕ ಗುಲಾಂ ನಬಿ ಆಜಾದ್‌ ಮತ್ತು ಎಸ್‌ಪಿಯ ರಾಮ್‌ ಗೋಪಾಲ್‌ ಯಾದವ್‌ ನಡುವಿನ ಮಾತುಕತೆಯಲ್ಲಿ ಮೈತ್ರಿ ಬಹುತೇಕ ಖಚಿತವಾಗಿದೆ. ಒಂದೊಮ್ಮೆ ಮೈತ್ರಿ ನಡೆದರೆ 403 ಸ್ಥಾನಗಳ ಪೈಕಿ 100ನ್ನು ಕಾಂಗ್ರೆಸ್‌ಗೆ ಬಿಟ್ಟುಕೊಡುವ ಸಾಧ್ಯತೆಗಳಿವೆ ಎಂದು ಮೂಲಗಳು ಹೇಳಿವೆ. ಇದು ನಿಜವಾದರೆ, ಇತ್ತೀಚಿನ ವರ್ಷಗಳಲ್ಲಿ ರಾಜ್ಯ ರಾಜಕೀಯದಲ್ಲಿ ಅಪ್ರಸ್ತುತವಾಗುತ್ತಿರುವ ಕಾಂಗ್ರೆಸ್‌ಗೆ ನಿಜಕ್ಕೂ ಬಂಪರ್‌ ಹೊಡೆದಂತೆಯೇ ಎಂದು ವಿಶ್ಲೇಷಿಸಲಾಗುತ್ತಿದೆ. ಕುಟುಂಬದ ನೆರಳಿಂದ ಹೊರ ಬಂದ ಡಿಂಪಲ್‌ ಕಾಂಗ್ರೆಸ್‌ ಜತೆಗೆ ಮೈತ್ರಿ ಸಾಧಿಸುವಲ್ಲಿ ಯಶಸ್ವಿಯಾಗಿರುವ ಡಿಂಪಲ್‌ ಯಾದವ್‌ ಕೌಟುಂಬಿಕ ನೆರಳಿನಿಂದ ಹೊರಬಂದಿರುವುದು ಸ್ಪಷ್ಟವಾಗಿದೆ. ಜತೆಗೆ, ಪುರುಷ ಪಾರಮ್ಯದ ಕೋಟೆಯಲ್ಲಿ ತನ್ನತನವನ್ನು ತೋರಿಸುತ್ತಿದ್ದಾರೆ ಎಂದು ವಿಶ್ಲೇಷಿಸಲಾಗುತ್ತಿದೆ. ಡಿಂಪಲ್‌ ರಾಜಕೀಯ ಪಯಣ 1999ರಲ್ಲಿ ಅಖಿಲೇಶ್‌ ಯಾದವ್‌ ಅವರನ್ನು ಮದುವೆಯಾದಾಗ ಡಿಂಪಲ್‌ ಇನ್ನೂ ಕಾಲೇಜು ಫೈನಲ್‌ ಯಿಯರ್‌ನಲ್ಲಿದ್ದರು. ವಯಸ್ಸು ಇನ್ನೂ 21 ಆಗಿತ್ತಷ್ಟೆ. 2009ರಲ್ಲಿ ಮೊದಲ ಬಾರಿ ಸಂಸತ್‌ ಚುನಾವಣೆಗೆ ಕಣಕ್ಕಿಳಿದು ಕಾಂಗ್ರೆಸ್‌ನ ರಾಜ್‌ ಬಬ್ಬರ್‌ ಎದುರು ಸೋತ ಅವರು, 2012ರಲ್ಲಿ ಸಿಎಂ ಆಗುವ ಅನಿವಾರ್ಯತೆಯಲ್ಲಿ ಅಖಿಲೇಶ್‌ ತೆರವುಗೊಳಿಸಿದ ಕನ್ನೌಜ್‌ ಕ್ಷೇತ್ರದಿಂದ ಅವಿರೋಧ ಆಯ್ಕೆಯಾದರು. ಬಳಿಕ ಅಖಿಲೇಶ್‌ ಅವರ ಹಿಂದೆ ಬಲವಾಗಿ ನಿಂತ ಡಿಂಪಲ್‌ ಈಗ ಪಕ್ಷದ ನೆಲೆಯಲ್ಲೂ ದೊಡ್ಡ ಕೊಡುಗೆ ಕೊಟ್ಟಿದ್ದಾರೆ ಎನ್ನಲಾಗುತ್ತಿದೆ.
↧
ಮಹಿಳಾ ಶಕ್ತಿಗೆ ಒಲಿದ ಕಾಂಗ್ರೆಸ್‌-ಎಸ್ಪಿ ಮೈತ್ರಿ
↧