ಗಣಿ ಉದ್ಯಮಿಗಳ ಕನಸಿಗೆ ಸುಪ್ರೀಂ ತಣ್ಣೀರು

ಶಶಿಧರ ಮೇಟಿ

ಬಳ್ಳಾರಿ: ಹಳೆಯ ಅರ್ಜಿಗಳಿಗೆ ಗಣಿಗಾರಿಕೆ ಪರವಾನಗಿ ನೀಡಬೇಕೆಂಬ ಹೈಕೋರ್ಟ್‌ ಆದೇಶಕ್ಕೆ ಸುಪ್ರೀಂ ಕೋರ್ಟ್‌ ತಡೆಯಾಜ್ಞೆ ನೀಡಿದ್ದು, ಗಣಿ ಉದ್ಯಮಿಗಳ ಕನಸಿಗೆ ತಣ್ಣೀರು ಎರಚಿದಂತಾಗಿದೆ.

ಗಣಿ ಮತ್ತು ಖನಿಜ ಅಭಿವೃದ್ಧಿ ನಿಯಂತ್ರಣ ಕಾಯಿದೆಗೆ ಕೇಂದ್ರ ಸರಕಾರ, 2014ರಲ್ಲಿ ತಿದ್ದುಪಡಿ ಮೂಲಕ ಪ್ರತಿ ಗಣಿ ಗುತ್ತಿಗೆ ನೀಡಲು ಇ-ಹರಾಜು ಪ್ರಕ್ರಿಯೆ ಪಾಲಿಸುವುದು ಕಡ್ಡಾಯ ಎಂಬ ಹೊಸ ನಿಯಮ ಜಾರಿಗೊಳಿಸಿದೆ. ಗಣಿಗಾರಿಕೆಗೆ ಸಂಬಂಧಿಸಿ ಈಗಾಗಲೇ ಸಲ್ಲಿಕೆಯಾದ ಅರ್ಜಿಗಳನ್ನು ಮುಂದಿನ ಎರಡು ವರ್ಷಗಳ ಅವಧಿಯಲ್ಲಿ ವಿಲೇವಾರಿ ಮಾಡಬೇಕೆಂದು ಕೇಂದ್ರ ಸರಕಾರ ಈ ಕಾಯಿದೆ ಜಾರಿ ಸಂದರ್ಭದಲ್ಲಿ ಸೂಚಿಸಿತ್ತು. ಈ ಸೂಚನೆ, ಹಳೆಯ ಅರ್ಜಿದಾರರಲ್ಲಿ ಹೊಸ ಭರವಸೆ ಮೂಡಿಸಿತ್ತು.

ಹೈಕೋರ್ಟ್‌ಗೆ ಮೊರೆ:

ಎರಡು ವರ್ಷಗಳ ಕಾಲಾವಾಧಿ ಮುಗಿಯುತ್ತಿರುವ ಹಿನ್ನೆಲೆಯಲ್ಲಿ ಶೀಘ್ರದಲ್ಲಿಯೇ ಅರ್ಜಿಗಳನ್ನು ವಿಲೇವಾರಿ ಮಾಡಬೇಕೆಂದು ಹಳೆಯ ಅರ್ಜಿದಾರರು ಹೈಕೋರ್ಟ್‌ನಿಂದ ಆದೇಶ ತಂದಿದ್ದರು. ಅರ್ಜಿ ವಿಲೇವಾರಿಗೆ ಜ.11ಕೊನೆಯ ದಿನವೆಂದು ನಿಗದಿಯಾಗಿತ್ತು. ರಾಜ್ಯದಲ್ಲಿ ಮ್ಯಾಂಗನೀಸ್‌, ಬಾಕ್ಸೈಟ್‌, ಕಬ್ಬಿಣ ಮತ್ತು ಲೈಮ್‌ಸ್ಟೋನ್‌ ಗಣಿಗಾರಿಕೆ ಸಂಬಂಧಿಸಿದಂತೆ 59 ಹಳೆಯ ಅರ್ಜಿಗಳ ವಿಲೇವಾರಿ ಬಾಕಿಯಿದೆ.

ಆದರೆ, ಅರ್ಜಿ ವಿಲೇವಾರಿಯಲ್ಲಿ ಗಣಿ ಮತ್ತು ಭೂ ವಿಜ್ಞಾನ ಇಲಾಖೆ ಸೂಕ್ಷ್ಮತೆ ಕಾಯ್ದುಕೊಂಡಿತು. ಅರ್ಜಿಗಳು ಹೊಂದಿರುವ ಅಗತ್ಯ ದಾಖಲೆಗಳನ್ನು ಜಾಗರೂಕತೆಯಿಂದ ಪರಿಶೀಲಿಸಿತು. ಅಗತ್ಯ ದಾಖಲೆಗಳನ್ನು ಒಳಗೊಂಡ ಕೇವಲ 2-3 ಅರ್ಜಿಗಳನ್ನು ಪುರಸ್ಕರಿಸಿತು.

ಉಳಿದ ಅರ್ಜಿಗಳನ್ನು ಇಲಾಖೆ ತಿರಸ್ಕರಿಸಿರುವುದು ಅರ್ಜಿದಾರರ ಸಂಕಷ್ಟಕ್ಕೆ ಕಾರಣವಾಗಿದೆ. ಅಗತ್ಯ ದಾಖಲೆಗಳು ಇಲ್ಲದೇ ಅರ್ಜಿಗಳನ್ನು ಸ್ವೀಕರಿಸಿದರೆ ಇಲಾಖೆಯು ಮುಂದೊಂದು ದಿನ ಸಮಸ್ಯೆಗೆ ಎದುರಿಸಬೇಕಾದ ಸಾಧ್ಯತೆ ಮನಗಂಡು, ಎಚ್ಚರಿಕೆಯ ಹೆಜ್ಜೆ ಇರಿಸಲು ಮುಂದಾಗಿದೆ ಎಂದು ಮೂಲಗಳು ತಿಳಿಸಿವೆ.

ಹೊಸ ಪದ್ಧತಿ ಅನ್ವಯ ಗಣಿಗಾರಿಕೆ ಪಡೆಯುವುದು ತೀರಾ ಕಷ್ಟಸಾಧ್ಯವಾಗಿದೆ. ಹಳೆಯ ಅರ್ಜಿಗಳ ಮೂಲಕ ಮುಂದಿನ ಅವಧಿಗೆ ಗಣಿಗಾರಿಕೆ ಗುತ್ತಿಗೆ ಪಡೆಯಬೇಕೆಂಬ ಗಣಿ ಉದ್ಯಮಿಗಳ ನಿರೀಕ್ಷೆಗೆ ಇಲಾಖೆ ನಡೆ ತಣ್ಣೀರೆರಚಿದೆ. ಹೈಕೋರ್ಟ್‌ ಆದೇಶ ಇದ್ದಾಗ್ಯೂ ಅರ್ಜಿಗಳನ್ನು ವಿಲೇವಾರಿ ಮಾಡಿಲ್ಲ ಎಂಬ ವಿಚಾರ ಮುಂದಿಟ್ಟುಕೊಂಡು ಅರ್ಜಿದಾರರು ನ್ಯಾಯಾಲಯದ ಕದತಟ್ಟುವ ಸಾಧ್ಯತೆ ಮನಗಂಡ ಗಣಿ ಮತ್ತು ವಿಜ್ಞಾನ ಇಲಾಖೆಯು ಸುಪ್ರೀಂ ಕೋರ್ಟ್‌ಗೆ ಮೇಲ್ಮನವಿ ಸಲ್ಲಿಸಿತು. ಈ ಮೂಲಕ ಹೈಕೋರ್ಟ್‌ ಆದೇಶಕ್ಕೆ ತಡೆಯಾಜ್ಞೆ ತಂದಿರುವುದು ಅರ್ಜಿದಾರರ ಹಿನ್ನಡೆಗೆ ಕಾರಣವಾಗಿದೆ.

ಹೊಸ ಪದ್ಧತಿಗೆ ಅಂಕಿತ:

ಹಳೆಯ ಅರ್ಜಿಗಳು ತಿರಸ್ಕೃತವಾಗಿರುವುದರಿಂದ ಮುಂದೆ ಇ-ಹರಾಜು ಮೂಲಕವೇ ಗಣಿಗಾರಿಕೆ ಪಡೆಯುವುದು ಕಷ್ಟವಾಗಲಿದೆ. ಹರಾಜಿನಲ್ಲಿ ಭಾರಿ ಸ್ಪರ್ಧೆ ಏರ್ಪಡುವುದನ್ನು ಅರಿತ ಗಣಿ ಉದ್ಯಮಿಗಳು, ಹೇಗಾದರೂ ಮಾಡಿ ಹಳೆಯ ಅರ್ಜಿಗಳ ಮೂಲಕವೇ ಪರವಾನಗಿ ಪಡೆಯಬೇಕೆಂದು ಗಣಿ ಉದ್ಯಮಿಗಳು ಇಲಾಖೆಯ ಮೇಲೆ ಒತ್ತಡ ತರಲು ಮುಂದಾದರು. ಆದರೆ, ಈ ಪ್ರಯತ್ನ ಕೊನೆಗೂ ಫಲಿಸದಾಯಿತು. ಹಳೆಯ ಅರ್ಜಿದಾರರ ಮುಂದಿನ ಕಾನೂನು ಸಮರ ಕುತೂಹಲ ಮೂಡಿಸಿದೆ.