ಮಾರುತಿ, ಹುಂಡೈ ಕಾರುಗಳು 1 ಲಕ್ಷ ರೂ. ತನಕ ಏರಿಕೆ

ಮುಂಬಯಿ: ಮಾರುತಿ ಸುಜುಕಿ ಮತ್ತು ಹುಂಡೈ ಮೋಟರ್‌ ಇಂಡಿಯಾ ಕಂಪನಿಗಳು ಕಾರುಗಳ ದರವನ್ನು 2,500 ರೂ.ನಿಂದ 1 ಲಕ್ಷ ರೂ. ತನಕ ಜನವರಿಯಿಂದಲೇ ಏರಿಕೆ ಮಾಡಲಿವೆ. ಇತರೆ ಕಂಪನಿಗಳೂ ಹೀಗಾಗಲೇ ದರ ಹೆಚ್ಚಳದ ಬಗ್ಗೆ ಪ್ರಕಟಣೆ ಹೊರಡಿಸಿವೆ. ಇನ್ನೂ ಕೆಲವು ಕಂಪನಿಗಳು ಸದ್ಯದಲ್ಲೇ ಈ ಬಗ್ಗೆ ಪ್ರಕಟಿಸುವ ನಿರೀಕ್ಷೆ ಇದೆ.

ಕಾರು ಉತ್ಪಾದನೆಗೆ ಬಳಕೆಯಾಗುವ ಕಚ್ಚಾ ವಸ್ತುಗಳ ದರ ಹೆಚ್ಚಳದಿಂದ ಲಾಭಾಂಶ ಕುಸಿತವಾಗಿದೆ. ಜತೆಗೆ ಇತ್ತೀಚಿನ ತಿಂಗಳುಗಳಲ್ಲಿ ಗ್ರಾಹಕರಿಗೆ ನೀಡಿದ ಸ್ಪರ್ಧಾತ್ಮಕ ರಿಯಾಯಿತಿಗಳು ಕಂಪನಿಗಳಿಗೆ ಹೊರೆಯಾಗಿ ಮಾರ್ಪಟ್ಟಿದೆ. ಡಾಲರ್‌ ಎದುರು ರೂಪಾಯಿ ಮೌಲ್ಯ ದುರ್ಬಲಗೊಳ್ಳುತ್ತಿದ್ದು, ವಾಹನ ಬಿಡಿ ಭಾಗಗಳ ಆಮದು ಶುಲ್ಕ ಅಧಿಕಗೊಳ್ಳುತ್ತಿದೆ. ಇದರಿಂದಾಗಿ ದರ ಹೆಚ್ಚಳ ಅನಿವಾರ್ಯ ಎಂದು ಎಲ್ಲ ಕಂಪನಿಗಳೂ ಹೇಳುತ್ತಿವೆ.

ವರ್ಷಾಂತ್ಯದಲ್ಲಿ ಸ್ಟಾಕ್‌ ಖಾಲಿ ಮಾಡಲು ಕಂಪನಿಗಳು ಪ್ರಯತ್ನಿಸುತ್ತವೆ. ಹೊಸ ವರ್ಷದಲ್ಲಿ ವಾಹನ ಖರೀದಿಸೋಣ ಎಂದು ಯೋಚಿಸುವ ಗ್ರಾಹಕರನ್ನು ರಿಯಾಯಿತಿಗಳ ಮೂಲಕ ಸೆಳೆಯಲು ಕಂಪನಿಗಳು ಯತ್ನಿಸುತ್ತವೆ. ಹೀಗಾಗಿ, ಭಾರತೀಯ ಆಟೊಮೊಬೈಲ್‌ ಉದ್ಯಮದಲ್ಲಿ ವಾಹನಗಳ ದರ ಹೆಚ್ಚಳ ಮಾಡುವುದು ಸಾಮಾನ್ಯ.

ಭಾರತದಲ್ಲಿ ಮಾರಾಟವಾಗುವ ಪ್ರತಿ ಎರಡು ಕಾರುಗಳಲ್ಲಿ ಮಾರುತಿಯದು ಒಂದು ಇದ್ದೇ ಇರುತ್ತದೆ. ಈ ಕಂಪನಿ ಈಗ ಹೊಸ ವರ್ಷದ ಆರಂಭದಲ್ಲಿ ದರಗಳನ್ನು ಏರಿಕೆ ಮಾಡಿದೆ.

''ಸರಕು ದರದ ಒತ್ತಡ ತಡೆದುಕೊಳ್ಳಲು ನಮ್ಮ ಕಂಪನಿ ಪ್ರಯತ್ನಿಸಿತು. ಆದಾಗ್ಯೂ, ಹೆಚ್ಚಿನ ರಿಯಾಯಿತಿಗಳ ಹೊರೆ ಮತ್ತು ರೂಪಾಯಿ ಮೌಲ್ಯ ಕುಸಿತದಿಂದಾಗಿ ವಾಹನ ದರ ಏರಿಕೆ ಅನಿವಾರ್ಯವಾಗಿದೆ,'' ಎಂದು ಮಾರುತಿ ಕಂಪನಿಯ ಮಾರಾಟ ಮತ್ತು ಮಾರುಕಟ್ಟೆ ವಿಭಾಗದ ಕಾರ್ಯನಿರ್ವಾಹಕ ನಿರ್ದೇಶಕ ಆರ್‌.ಎಸ್‌.ಕಾಲ್ಸಿ ಹೇಳಿದ್ದಾರೆ.

ಆರು ತಿಂಗಳಲ್ಲಿ ಎರಡನೇ ಸಲ ದರ ಹೆಚ್ಚಳ ಮಾಡುತ್ತಿರುವ ಮಾರುತಿ, ಕನಿಷ್ಠ ಶೇ.2ರಷ್ಟು ದರವನ್ನು ಏರಿಕೆ ಮಾಡುತ್ತಿರುವುದಾಗಿ ಹೇಳಿದೆ.

ಟೊಯೊಟಾ, ಹೋಂಡಾ, ರೆನಾಲ್ಟ್‌, ಮಹೀಂದ್ರಾ ಆ್ಯಂಡ್‌ ಮಹೀಂದ್ರಾ ಮತ್ತು ಟಾಟಾ ಮೋಟಾರ್ಸ್‌ ಕಂಪನಿಗಳು ಈಗಾಗಲೇ ಜನವರಿಯಿಂದ ಶೇ.3ರ ತನಕ ತನ್ನ ಕಾರುಗಳ ದರ ಏರಿಕೆ ಮಾಡುವುದಾಗಿ ಪ್ರಕಟಿಸಿವೆ. ವಿಚಿತ್ರವೆಂದರೇ, ಪ್ರಸ್ತುತ ಮಾರುಕಟ್ಟೆಯಲ್ಲಿ ಕೆಲವು ಕಾರು ತಯಾರಿಕಾ ಕಂಪನಿಗಳು ನಾನಾ ಮಾಡೆಲ್‌ಗಳಿಗೆ ಶೇ.5ರಿಂದ 10ರಷ್ಟು ರಿಯಾಯಿತಿ ನೀಡುತ್ತಿದ್ದು, ಅವುಗಳನ್ನು ಹೊಸ ವರ್ಷದಲ್ಲೂ ಮುಂದುವರಿಸುವ ನಿರೀಕ್ಷೆ ಇದೆ. ನೋಟು ಅಮಾನ್ಯತೆಯ ಪರಿಣಾಮದಿಂದ ಮಂದಗತಿಯಲ್ಲಿರುವ ಮಾರುಕಟ್ಟೆಯನ್ನು ಚುರುಕಾಗಿಡಲು ರಿಯಾಯಿತಿ ಮುಂದುವರಿಯಲಿದೆ ಎಂದು ಮೂಲಗಳು ಹೇಳಿವೆ.

======

ಹುಂಡೈ ಮಾಡೆಲ್‌ಗಳ ದರಗಳು 4000 ರೂ.ನಿಂದ 1 ಲಕ್ಷ ರೂ. ತನಕ ಜನವರಿಯಿಂದ ಏರಿಕೆಯಾಗಲಿವೆ. ಕಚ್ಚಾ ವಸ್ತುಗಳ ದರ ಏರಿಕೆ ಮತ್ತು ರೂಪಾಯಿ ದುರ್ಬಲಗೊಂಡಿರುವುದರಿಂದ ದರ ಹೆಚ್ಚಳ ಮಾಡಲಾಗುತ್ತಿದೆ.

- ರಾಕೇಶ್‌ ಶ್ರೀವಾಸ್ತವ, ಹುಂಡೈ ಇಂಡಿಯಾ ಹಿರಿಯ ಉಪಾಧ್ಯಕ್ಷ

26 ಸಾವಿರ ತನಕ ಮಹೀಂದ್ರಾ ವಾಹನಗಳ ದರ ಏರಿಕೆ

ಮಹೀಂದ್ರಾ ಅ್ಯಂಡ್‌ ಮಹೀಂದ್ರಾ ಕಂಪನಿಯು 2017ರ ಜನವರಿಯಿಂದ ತನ್ನ ಎಲ್ಲ ವಾಹನಗಳ ದರವನ್ನು 26 ಸಾವಿರ ರೂ. ತನಕ ಏರಿಕೆ ಮಾಡಲಿದೆ. ''ಮಾಡೆಲ್‌ಗಳ ಅನುಸಾರ ಕನಿಷ್ಠ 3,000 ರೂ.ನಿಂದ 26,500 ರೂ. ತನಕ ದರಗಳು ಏರಿಕೆಯಾಗುತ್ತವೆ. ಸಣ್ಣ ಕಮರ್ಷಿಯಲ್‌ ವಾಹನಗಳ ದರ 6,000 ರೂ. ತನಕ ಏರಿಕೆಯಾಗುತ್ತದೆ,'' ಎಂದು ಕಂಪನಿ ಹೇಳಿಕೊಂಡಿದೆ.