ನೋಟುಗಳ ಅಮಾನ್ಯತೆ: ಡಿಸೆಂಬರ್‌ನಲ್ಲಿ ಕಾರುಗಳ ಮಾರಾಟ ಚೇತರಿಕೆ

ಸಹಜ ಸ್ಥಿತಿಗೆ ಮರಳಿದ ಆಟೊಮೊಬೈಲ್‌ ಮಾರುಕಟ್ಟೆ

ಶೇ.100ರ ತನಕವೂ ಸಾಲದ ಮೂಲಕ ಕಾರು ಖರೀದಿಗೆ ಗ್ರಾಹಕರಲ್ಲಿ ಹೆಚ್ಚಿದ ಆಸಕ್ತಿ!

ಸಂಪೂರ್ಣ ನಗದು ಕೊಟ್ಟು ಕಾರು ಕೊಳ್ಳುವವರ ಸಂಖ್ಯೆ ಇಳಿಮುಖ

ಕೇಶವ ಪ್ರಸಾದ್‌.ಬಿ.ಕಿದೂರು

ಬೆಂಗಳೂರು: ನೋಟುಗಳ ಅಮಾನ್ಯತೆಯ ನಂತರ ನವೆಂಬರ್‌ನಲ್ಲಿ ಮಂದಗತಿಯಲ್ಲಿದ್ದ ಕಾರುಗಳ ಮಾರುಕಟ್ಟೆ, ಡಿಸೆಂಬರ್‌ನಲ್ಲಿ ಮತ್ತೆ ಚೇತರಿಸಿದೆ. ಸ್ವಾರಸ್ಯವೇನೆಂದರೆ ಗರಿಷ್ಠ ಪ್ರಮಾಣದಲ್ಲಿ ಸಾಲದ ಮೂಲಕವೇ ಕಾರು ಕೊಳ್ಳುವವರ ಸಂಖ್ಯೆ ಹೆಚ್ಚುತ್ತಿದೆ. ಕೆಲವು ಬ್ಯಾಂಕ್‌ ಹಾಗೂ ಹಣಕಾಸು ಸಂಸ್ಥೆಗಳು ಕಾರುಗಳ ಮೌಲ್ಯದ ಶೇ.100ರಷ್ಟೂ ಸಾಲ ಒದಗಿಸುವುದಾಗಿ ಘೋಷಿಸಿವೆ. ಅಂಥ ಯೋಜನೆಗಳ ಬಗ್ಗೆ ಕೂಡ ಗ್ರಾಹಕರು ಆಸಕ್ತಿ ವಹಿಸುತ್ತಿದ್ದಾರೆ ಎಂದು ಡೀಲರ್‌ಗಳು ಹೇಳುತ್ತಾರೆ.

'ನೋಟು ಅಮಾನ್ಯತೆಯಿಂದ ನವೆಂಬರ್‌ ತಿಂಗಳಲ್ಲಿ ಜನರಲ್ಲಿ ನೋಟುಗಳ ತೀವ್ರ ಕೊರತೆ ಉಂಟಾಗಿತ್ತು. ಹಾಗೂ ಖರೀದಿ ನಿರ್ಧಾರವನ್ನು ಮುಂದೂಡಿದ್ದರು. ಆದರೆ ಡಿಸೆಂಬರ್‌ನಲ್ಲಿ ಪರಿಸ್ಥಿತಿ ಗಣನೀಯವಾಗಿ ಸುಧಾರಿಸಿದೆ. ಜತೆಗೆ ಹೆಚ್ಚಿನ ಮೊತ್ತದ ಸಾಲದಲ್ಲಿ ಕೊಳ್ಳುವವರ ಸಂಖ್ಯೆ ಹೆಚ್ಚಿದೆ. ಈ ಹಿಂದೆ ಶೇ.20ರಷ್ಟು ಮಂದಿ ಸಂಪೂರ್ಣ ನಗದಿನಲ್ಲೇ ಕೊಳ್ಳುವವರಿದ್ದರು. ಈಗ ಅದು ಶೇ.10ಕ್ಕೆ ಇಳಿದಿದೆ. ಹಾಗೆಯೇ ಶೇ.90ರಷ್ಟು ಸಾಲದ ಮೂಲಕ ಕಾರು ತಮ್ಮದಾಗಿಸುವವರ ಸಂಖ್ಯೆ ವೃದ್ಧಿಸಿದೆ' ಎನ್ನುತ್ತಾರೆ ಕಲ್ಯಾಣಿ ಮೋಟಾರ್ಸ್‌ನ ಮುಖ್ಯ ಪ್ರಧಾನ ವ್ಯವಸ್ಥಾಪಕ ಎಸ್‌.ಎನ್‌.ಶೆಟ್ಟಿ ತಿಳಿಸಿದ್ದಾರೆ.

ಕಳೆದ ನವೆಂಬರ್‌ನಲ್ಲಿ ಶೇ.40ರ ತನಕ ಮಂದಗತಿಯಲ್ಲಿದ್ದ ವಹಿವಾಟು ಡಿಸೆಂಬರ್‌ ವೇಳೆಗೆ ಸಂಪೂರ್ಣ ಚೇತರಿಸಿದೆ. ಗ್ರಾಹಕರು ಮತ್ತೆ ಉತ್ಸಾಹದಿಂದ ಖರೀದಿಸುತ್ತಿದ್ದಾರೆ. ನೋಟುಗಳ ಅಮಾನ್ಯತೆ ತೀರ ನಕಾರಾತ್ಮಕ ಪ್ರಭಾವ ಬೀರಿಲ್ಲ. ಹೀಗಿದ್ದರೂ, ಕಳೆದ ವರ್ಷದ ಡಿಸೆಂಬರ್‌ಗೆ ಹೋಲಿಸಿದರೆ ಈ ವರ್ಷ ಶೇ.10ರಷ್ಟು ಮಾರಾಟ ಕೊಂಚ ತಗ್ಗಿದೆ ಎನ್ನುತ್ತಾರೆ ಅವರು.

ಬ್ಲೂಹುಂಡೈನ ಸೇಲ್ಸ್‌ ವಿಭಾಗದ ವ್ಯವಸ್ಥಾಪಕ ವೀರಭದ್ರ ಅವರ ಪ್ರಕಾರವೂ ನವೆಂಬರ್‌ನಲ್ಲಿ ವಹಿವಾಟು ಕುಸಿದಿದ್ದರೂ, ಡಿಸೆಂಬರ್‌ನಲ್ಲಿ ಸುಧಾರಿಸಿದೆ. ಟೊಯೊಟಾ ಡೀಲರ್‌ ರವೀಂದು ಟೊಯೊಟಾದ ಸೇಲ್ಸ್‌ ಮ್ಯಾನೇಜರ್‌ ಆಗಿರುವ ನವೀನ್‌ ಪ್ರಕಾರ, ' ಶೇ.100ರಷ್ಟು ಕಾರು ಸಾಲ ತೆಗೆದುಕೊಳ್ಳುವವರ ಸಂಖ್ಯೆಯಲ್ಲಿ ವೃದ್ಧಿಸಿದೆ. ಹೀಗಿದ್ದರೂ, ಇದಕ್ಕೆ ಅರ್ಹತೆ ಇರಬೇಕಾಗುತ್ತದೆ. ಈ ಡಿಸೆಂಬರ್‌ನಲ್ಲಿ ಕಾರುಗಳ ಮಾರಾಟ ಚೇತರಿಸಿದೆ. ಟೊಯೊಟಾ ಫಾರ್ಚುನರ್‌ ಕಾರಿಗೆ ಬೇಡಿಕೆಯಲ್ಲಿ ಹೆಚ್ಚಳ ಕಂಡುಬಂದಿದೆ' ಎನ್ನುತ್ತಾರೆ ಅವರು.

ಕಾರು ಸಾಲ ಇಳಿಕೆ ನಿರೀಕ್ಷೆ:

ಮುಂಬರುವ ತಿಂಗಳುಗಳಲ್ಲಿ ವಾಹನ ಸಾಲಗಳ ಬಡ್ಡಿ ದರ ಇಳಿಯುವ ಸಾಧ್ಯತೆ ದಟ್ಟವಾಗಿರುವುದರಿಂದ, ಕಾರುಗಳ ಮಾರಾಟ ಕೂಡ ಹೆಚ್ಚಲಿದೆ ಎನ್ನುತ್ತಾರೆ ಮಾರುಕಟ್ಟೆ ತಜ್ಞರು. ಬಡ್ಡಿ ದರದಲ್ಲಿ ಸ್ವಲ್ಪ ಇಳಿದರೂ ಗ್ರಾಹಕರಿಗೆ ಇಎಂಐ ಮೇಲೆ ಪರಿಣಾಮ ಬೀರುತ್ತದೆ. ಹೀಗಾಗಿ ವಹಿವಾಟು ಹೆಚ್ಚಳದ ಸಾಧ್ಯತೆ ಇದೆ ಎನ್ನುತ್ತಾರೆ ಮ್ಯಾಗ್ನಮ್‌ ಹೋಂಡಾದ ಹಿರಿಯ ಅಧಿಕಾರಿ ಅವಿನಾಶ್‌.

ಕೆಲವು ಕಾರು ಕಂಪನಿಗಳು ಡಿಸ್ಕೌಂಟ್‌ ಘೋಷಿಸಿರುವುದು, ಕೆಲವು ಕಂಪನಿಗಳು ಹೊಸ ಮಾದರಿಗಳನ್ನು ಬಿಡುಗಡೆಗೊಳಿಸಿರುವುದು ಕೂಡ ವಹಿವಾಟು ಚೇತರಿಕೆಗೆ ಕಾರಣವಾಗಿದೆ.

ಅರ್ಹತೆ ಅಗತ್ಯ:

ಕೆಲವು ಬ್ಯಾಂಕ್‌ ಹಾಗೂ ಹಣಕಾಸು ಸಂಸ್ಥೆಗಳು ಕಾರಿನ ಇಡೀ ಮೌಲ್ಯಕ್ಕೆ ಸಾಲ ಕೊಡುವುದಿದ್ದರೂ, ಗ್ರಾಹಕರಿಗೆ ಅಗತ್ಯವಿರುವಷ್ಟು ಆದಾಯ ಮೂಲದ ಅರ್ಹತೆ ಇರಬೇಕು. ಕೆಲವು ಬ್ಯಾಂಕ್‌ಗಳು ಸರಕಾರಿ ಮತ್ತು ಸಾರ್ವಜನಿಕ ವಲಯದ ಉದ್ಯೋಗಿಗಳಿಗೆ ಮಾತ್ರ ಶೇ.100ರಷ್ಟು ಸಾಲ ಕೊಡುತ್ತವೆ. ಖಾಸಗಿಯವರಿಗೆ ಶೇ.85 ಇತ್ಯಾದಿ ನಿಯಮವನ್ನು ಹೊಂದಿರುತ್ತವೆ. ಜತೆಗೆ ಸಿಬಿಲ್‌ ಸ್ಕೋರ್‌ ಕೂಡ ಚೆನ್ನಾಗಿರಬೇಕಾಗುತ್ತದೆ.

2016ರ ಹಿನ್ನೋಟ: ಅತೀ ಹೆಚ್ಚು ಓದಿದ ವಿಷಯಗಳು