ಕಿರಿಕ್‌ ಸಾಂಗ್ಸ್‌ ಕರಾಮತ್ತು ಇಂಟ್ರೊ: ರಕ್ಷಿತ್‌ ಶೆಟ್ಟಿ ಮತ್ತು ರಿಷಭ್‌ ಶೆಟ್ಟಿ ಕಾಂಬಿನೇಷನ್ನಿನ 'ಕಿರಿಕ್‌ ಪಾರ್ಟಿ' ಚಿತ್ರ ಇದೇ ಡಿ.30ಕ್ಕೆ ರಾಜ್ಯಾದ್ಯಂತ ರಿಲೀಸ್‌ ಆಗುತ್ತಿದೆ. ಸಿನಿಮಾ ಬಿಡುಗಡೆಗೂ ಮುನ್ನ ಸಾಮಾಜಿಕ ಜಾಲತಾಣಗಳಲ್ಲಿ ಚಿತ್ರದ ಹಾಡುಗಳು ವೈರಲ್‌ ಆಗಿವೆ. ------------------------------- - ಶರಣು ಹುಲ್ಲೂರು ಕಾಲೇಜು ಹುಡುಗರ ಪಾಲಿನ ನಿತ್ಯ ಮಂತ್ರದಂತಾಗಿವೆ 'ಕಿರಿಕ್‌ ಪಾರ್ಟಿ' ಚಿತ್ರದ ಬಹುತೇಕ ಗೀತೆಗಳು. ಸಿನಿಮಾದ ಆರು ಹಾಡುಗಳನ್ನು ಸಾಮಾಜಿಕ ಜಾಲತಾಣದ ಮೂಲಕ ರಿಲೀಸ್‌ ಮಾಡಿದೆ ಚಿತ್ರತಂಡ. ಹಾಗಾಗಿ ಪಾರ್ಟಿಯ ಹಾಡುಗಳು ಬೇಗನೇ ಯುವಜನತೆಯನ್ನು ಆಕರ್ಷಿಸಿವೆ. ಅದರಲ್ಲೂ 'ತಿರ್ಬೋಕಿ ಜೀವನ..' ಮತ್ತು 'ಬೆಳಗೆದ್ದು ಯಾರ ಮುಖವ...' ಸಾಂಗ್ಸ್‌ ಯೂಟ್ಯೂಬ್‌ನಲ್ಲಿ ದಾಖಲೆ ಬರೆದಿವೆ. ಸಾಮಾನ್ಯವಾಗಿ ಹಾಡುಗಳ ಸಿಡಿ ಬಿಡುಗಡೆ ಮಾಡುವುದು ವಾಡಿಕೆ. ಇತ್ತೀಚೆಗೆ ಪೆನ್‌ಡ್ರೈವ್‌ಗಳಲ್ಲೂ ಸಿನಿಮಾ ಗೀತೆಗಳನ್ನು ರಿಲೀಸ್‌ ಮಾಡಲಾಗುತ್ತಿದೆ. ಇವೆರಡಕ್ಕಿಂತ ವಿಭಿನ್ನ ಆಲೋಚನೆ ಮಾಡಿತ್ತು ಸಿನಿಮಾ ತಂಡ. ನೇರವಾಗಿ ಎಲ್ಲ ಹಾಡುಗಳನ್ನೂ ಆನ್‌ಲೈನ್‌ನಲ್ಲಿ ರಿಲೀಸ್‌ ಮಾಡುವ ಮೂಲಕ ಕ್ಷಣಾರ್ಧದಲ್ಲೇ ಎಲ್ಲರ ಮನಸಿಗೆ ತಲಿಪಿಸುವಲ್ಲಿ ಯಶಸ್ವಿಯಾಗಿದೆ. ಹಾಗಾಗಿ ದಿನವೊಂದಕ್ಕೆ ಲಕ್ಷಾಂತರ ಕೇಳುಗರು ಹಾಡುಗಳನ್ನು ಆಲಿಸಿದ್ದಾರೆ. ಆನ್‌ಲೈನ್‌ನಲ್ಲೇ ತಮ್ಮ ಪ್ರತಿಕ್ರಿಯೆಯನ್ನೂ ಬರೆದಿದ್ದಾರೆ. ಈ ಕುರಿತು ನಟ ಮತ್ತು ಸಿನಿಮಾದ ನಿರ್ಮಾಪಕ ರಕ್ಷಿತ್‌ ಶೆಟ್ಟಿ ಹೇಳುವುದು ಹೀಗೆ, 'ನಮ್ಮದೇ ಸಿನಿಮಾ ಸಂಸ್ಥೆಯಲ್ಲಿ ನಿರ್ಮಾಣವಾದ ಚಿತ್ರವಿದು. ನಮ್ಮ ಸಂಸ್ಥೆಯನ್ನು ಸಿನಿಮಾದ ಎಲ್ಲಾ ವಲಯಗಳಿಗೂ ವಿಸ್ತರಿಸಬೇಕಾಗಿತ್ತು. ಹಾಗಾಗಿ ಆನ್‌ಲೈನ್‌ನಲ್ಲಿ ಹಾಡುಗಳನ್ನು ಬಿಡುಗಡೆ ಮಾಡುವಂತಹ ತೀರ್ಮಾನ ತೆಗೆದುಕೊಂಡೆವು. ಮೊದಲು ಸಿನಿಮಾದ ಟ್ರೇಲರ್‌ ಬಿಡುಗಡೆ ಮಾಡಲಾಗಿತ್ತು. ಅದಕ್ಕೆ ಅದ್ಭುತ ಪ್ರತಿಕ್ರಿಯೆ ಸಿಕ್ಕಿತ್ತು. ಆ ಧೈರ್ಯವೇ ಹಾಡುಗಳನ್ನು ಆನ್‌ಲೈನ್‌ನಲ್ಲಿ ರಿಲೀಸ್‌ ಮಾಡುವಂತೆ ಮಾಡಿತು. ಆ ಯೋಜನೆ ಕೂಡ ಸಕ್ಸಸ್‌ ಆಗಿದೆ. ಇದರಿಂದ ಕನ್ನಡದ ಹಾಡುಗಳ ಮಾರುಕಟ್ಟೆಯು ಮತ್ತೊಂದು ಹಂತವನ್ನು ತಲುಪುವಲ್ಲಿ ಸಹಾಯವಾಗಿದೆ' ಅಂತಾರೆ. ಕಿರಿಕ್‌ ಪಾರ್ಟಿ ಸಿನಿಮಾದಲ್ಲಿ ಒಟ್ಟು ಹತ್ತು ಹಾಡುಗಳಿವೆ. ಅದರಲ್ಲಿ ಆರು ಹಾಡುಗಳನ್ನು ಈಗಾಗಲೇ ರಿಲೀಸ್‌ ಮಾಡಲಾಗಿದೆ. ಸಿನಿಮಾ ಬಿಡುಗಡೆಯ ನಂತರ ಉಳಿದ ಗೀತೆಗಳನ್ನು ಆನ್‌ಲೈನ್‌ನಲ್ಲಿ ಹರಿಬಿಡುವ ಪ್ಲಾನ್‌ ಚಿತ್ರತಂಡದ್ದು. ಇಂಥ ಪ್ರಯತ್ನ ಇದೇ ಮೊದಲು ಎನ್ನಬಹುದು. ಹಾಡುಗಳಿಗೆ ಬಿ. ಅಜನೀಶ್‌ ಲೋಕನಾಥ್‌ ಸಂಗೀತ ನೀಡಿದ್ದು, ರಕ್ಷಿತ್‌ ಶೆಟ್ಟಿ ಸಾಹಿತ್ಯ ಬರೆದಿದ್ದಾರೆ. ರಿಷಭ್‌ ಶೆಟ್ಟಿ ನಿರ್ದೇಶನದಲ್ಲಿ ಚಿತ್ರ ಮೂಡಿಬಂದಿದೆ. ಇದೇ ಡಿ.30ಕ್ಕೆ ಸಿನಿಮಾ ರಾಜ್ಯಾದ್ಯಂತ ರಿಲೀಸ್‌ ಆಗುತ್ತಿದ್ದು, ಸಾಕಷ್ಟು ನಿರೀಕ್ಷೆ ಮೂಡಿಸಿದೆ. ----------------------------
↧
'ಕಿರಿಕ್‌ ಪಾರ್ಟಿ' ಚಿತ್ರ ಡಿ. 30ಕ್ಕೆ ಬಿಡುಗಡೆ
↧