ಕನ್ನಡ ಚಿತ್ರ: ಮಾದ ಮತ್ತು ಮಾನಸಿ -ಪದ್ಮಾ ಶಿವಮೊಗ್ಗ ನಟ ಪ್ರಜ್ವಲ್‌ ದೇವರಾಜ್‌ ಮತ್ತು ನಿರ್ದೇಶಕ ಸತೀಶ್‌ ಪ್ರದಾನ್‌ ಇಬ್ಬರೂ ಹಿಂದಿನ ಚಿತ್ರಗಳಲ್ಲಿ ಸೋಲು ಕಂಡವರು. ಹೀಗಾಗಿ ಈ ಚಿತ್ರದ ಬಗ್ಗೆ ಬಹಳ ನಿರೀಕ್ಷೆ ಇತ್ತು. ಆದರೆ, ಇಬ್ಬರ ಗ್ರಾಫ್‌ ಇನ್ನೂ ಕೆಳಗೆ ಇಳಿದಿದೆ. ತರ್ಕವಿಲ್ಲದ ಕತೆ ಮತ್ತು ಪೇಲವ ನಿರ್ದೇಶನದಿಂದ ಚಿತ್ರ ತಾಳ್ಮೆಯನ್ನು ಪರೀಕ್ಷೆ ಮಾಡುತ್ತದೆ. ಮಾದ (ಪ್ರಜ್ವಲ್‌) ಮತ್ತು ಮಾನಸಿ (ಶ್ರುತಿ ಹರಿಹರನ್‌) ರೌಡಿಗಳಿಂದ ತಪ್ಪಿಸಿಕೊಂಡು ಓಡಿಬಂದು ರೈಲು ಹತ್ತುತ್ತಾರೆ. ಅಲ್ಲಿ ರಂಗಾಯಣ ರಘು ಪರಿಚಯವಾಗುತ್ತದೆ. ಅವರಿಗೆ ತಮ್ಮ ಪ್ರೇಮಕತೆಯನ್ನು ಅರ್ಧ ಹೇಳುವ ಹೊತ್ತಿಗೆ, ಒಂದು ಫೈಟ್‌, ಹಾಡು ಎಲ್ಲಾ ಬಂದು ಹೋಗಿರುತ್ತದೆ. ರೌಡಿಯೊಬ್ಬನ (ಶೋಭರಾಜ್‌) ಮಗಳಾದ ಮಾನಸಿಯನ್ನು ಪ್ರಜ್ವಲ್‌ ಕಂಡಾಕ್ಷಣ ಹುಟ್ಟಿದ ಪ್ರೇಮಕ್ಕೆ ಬ್ರೇಕ್‌ ಬೀಳುತ್ತೆ. ಯಾಕೆಂದರೆ ಅವಳು ಕಾಲೇಜು ಸ್ನೇಹಿತನನ್ನು ಪ್ರೀತಿಸಿರುತ್ತಾಳೆ. ತ್ಯಾಗರಾಜನಾಗುವ ಮಾದ ಆ ಪ್ರೇಮಿಗಳನ್ನು ಒಂದು ಮಾಡಲು ಅವಳಪ್ಪನ ಕಣ್ತಪ್ಪಿಸಿ ರೈಲಿನಲ್ಲಿ ಕರೆದೊಯ್ಯುತ್ತಿರುತ್ತಾನೆ. ನಡುವೆ ಅನಿರೀಕ್ಷಿತ ಘಟನೆಯೊಂದು ನಡೆಯುತ್ತದೆ. ಮಾನಸಿ ಕುರುಡಿಯಾದರೂ, ಕುಂಟಿಯಾದರೂ ಪರವಾಗಿಲ್ಲ ಅನ್ನೋ ಮಾದ ಒಂದೆಡೆ, ಪ್ರೀತಿಸಿದ ಕಾಲೇಜು ಹುಡುಗನನ್ನು ಮದುವೆಯಾಗಬಯಸುವ ಮಾನಸಿ ಇನ್ನೊಂದೆಡೆ. ಕೊನೆಗೆ ಯಾರಿಗೆ ಹೇಗೆ ಮಾನಸಿ ಸಿಗುತ್ತಾಳೆ ಎನ್ನುವುದೇ ಕತೆ. ಈ ಮಧ್ಯೆ ರಂಗಾಯಣ ರಘು ಬಾಳಿನ ದುರಂತ ಕತೆ ತೋರಿಸಲಾಗುತ್ತದೆ. ಸಿನಿಮಾದ ಕತೆಗೆ ಪೂರಕವಾಗಿಲ್ಲದಿದ್ದರೂ, ವಾಟ್ಸಪ್‌ಗಳಲ್ಲಿ ಹರಿದಾಡುತ್ತಿರುವ ಒಂದು ಪುಟ್ಟ ಕತೆÜಯನ್ನೂ ಅಳವಡಿಸಿಕೊಂಡಿದ್ದಾರೆ ನಿರ್ದೇಶಕ. ಪ್ರೇಕ್ಷಕ ಮಹಾಶಯನಿಗೆ ರಂಗಾಯಣ ರಘು ಮತ್ತು ವಾಣಿಶ್ರೀಯನ್ನು ರೆಟ್ರೋ ಸ್ಟೈಲ್‌ನಲ್ಲಿ ನೋಡೋ ಅವಕಾಶ ಇದೆ. ಪ್ರಾರಂಭದಲ್ಲೇ ತೋರಿಸುವ ಅನುಶ್ರೀ ಅಭಿನಯದ ಹಾಡಿನಲ್ಲಿ ಮಾದ ಮತ್ತು ಮಾನಸಿಯ ರೋಮ್ಯಾನ್ಸ್‌ ತೋರಿಸಲಾಗುತ್ತದೆ. ಆದರೆ, ಕತೆಯೇ ಬೇರೆ. ಚಿತ್ರದುದ್ದಕ್ಕೂ ಕುಡುಕರು, ಪೋಲಿಗಳು ಹೆಜ್ಜೆ ಹೆಜ್ಜೆಗೆ ಸಿಗುತ್ತಾರೆ. ಇವರ ಮಧ್ಯೆ ನಾಯಕಿ ಬಳಲುತ್ತಾಳೆ, ಹೀರೊ ಬಿಲ್ಡಪ್‌ ಕೊಡುತ್ತಾನೆ. ಅಚ್ಚರಿ ಉಂಟು ಮಾಡುವ ಪ್ರಯತ್ನದಲ್ಲಿ ಕತೆಗೆ ಇಟ್ಟಿರುವ ಟ್ವಿಸ್ಟ್‌ಗಳು ಲಾಜಿಕ್‌ ಇಲ್ಲದೆ ಕೃತಕವಾಗಿ ಕಾಣುತ್ತವೆ. ರೇಪ್‌ ಆಗಿದ್ದು ಹೆಣ್ಣಿಗೆ ಗೊತ್ತಾಗುತ್ತೋ ಇಲ್ಲವೋ ಎಂಬ ಗೊಂದಲ ಪ್ರೇಕ್ಷಕನದ್ದಾಗುತ್ತದೆ. ಪಾತ್ರ ಪೋಷಣೆ ದುರ್ಬಲವಾಗಿದೆ. ದ್ವಿತಿಯಾರ್ಧದಲ್ಲಿ ಪ್ರೇಮಿಯಿಂದ ತಿರಸ್ಕೃತಗೊಂಡ ನಂತರ ಪ್ರೇಕ್ಷಕನಿಗೆ ಹುಟ್ಟುವ ನಿರೀಕ್ಷೆ ಠುಸ್‌ ಎನ್ನುತ್ತದೆ. ಅಲ್ಲಲ್ಲಿ ಕೆಟ್ಟ ಸಂಭಾಷಣೆಯ ಜೋಕ್‌ಗಳು ಕಿರಿಕಿರಿಯುಂಟು ಮಾಡುತ್ತದೆ. ಡ್ರೋನ್‌ನಲ್ಲಿ ಸೆರೆ ಹಿಡಿದ ದೃಶ್ಯಗಳು ಕಣ್ಣಿಗೆ ಹಿತ ಅನ್ನಿಸಿದರೂ ಸಿನಿಮಾಗೆ ಯಾವ ರೀತಿಯಲ್ಲೂ ಸಪೋರ್ಟ್‌ ಮಾಡೋಲ್ಲ. ಮುಂಗಾರು ಮಳೆ ಚಿತ್ರದ ಹಾಡುಗಳಿಗೆ ನೀಡಿದ ಸಂಗೀತದಿಂದ ಜನಪ್ರಿಯರಾದ, ನಿರ್ಮಾಪಕರೂ ಆಗಿರುವ ಮನೋ ಮೂರ್ತಿ ಸಂಗೀತ ಕಿವಿಗಪ್ಪಳಿಸುತ್ತದೆ. ಚಿತ್ರದಿಂದ ಚಿತ್ರಕ್ಕೆ ಪ್ರಜ್ವಲ್‌ ನಟನೆಯ ಗ್ರಾಫ್‌ ಇಳಿಯುತ್ತಿದೆ. ಅಪಕ್ವ ನಿರ್ದೇಶನ, ದುರ್ಬಲ ತಾಂತ್ರಿಕತೆ ಚಿತ್ರವನ್ನು ಇನ್ನಷ್ಟು ನೀರಸ ಮಾಡಿದೆ.
↧
ಮಾದ ಮಾನಸಿ ಚಿತ್ರ ವಿಮರ್ಶೆ: ಮೋಡಿ ಮಾಡದ ಮಾದ ಮತ್ತು ಮಾನಸಿ
↧