ಚೆನ್ನೈ ಟೆಸ್ಟ್: ಜಡೇಜಾ ಸ್ಪಿನ್‌ಗೆ ಬಸವಳಿದ ಇಂಗ್ಲೆಂಡ್, ಭಾರತಕ್ಕೆ ಭರ್ಜರಿ ಜಯ

ಚೆನ್ನೈ: ಸೋಮವಾರ ಭಾರತಕ್ಕೆ ದಾಖಲೆಗಳ ಸಡಗರವಾದರೆ, ಮಂಗಳವಾರ ಮತ್ತೊಂದು ಮೈಲಿಗಲ್ಲು. ಸ್ಪಿನ್ನರ್ ರವೀಂದ್ರ ಜಡೇಜಾ ಕೇವಲ 48 ರನ್ ನೀಡಿ 7 ವಿಕೆಟ್ ಕಬಳಿಸುವ ಮೂಲಕ ಇಂಗ್ಲೆಂಡ್ ತಂಡವನ್ನು ಹೆಡೆಮುರಿ ಕಟ್ಟಿ, ಭಾರತಕ್ಕೆ 4-0 ಅಂತರ ಸರಣಿ ವಿಜಯ ದೊರಕಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದರು. ಕರುಣ್ ನಾಯರ್ ಪಂದ್ಯಶ್ರೇಷ್ಠರಾಗಿಯೂ, ನಾಯಕ ವಿರಾಟ್ ಕೋಹ್ಲಿ ಸರಣಿ ಶ್ರೇಷ್ಠರಾಗಿಯೂ ಪುರಸ್ಕೃತರಾದರು.

ಚೆನ್ನೈಯ ಚೆಪಾಕ್‌ನಲ್ಲಿರುವ ಚಿದಂಬರಂ ಸ್ಟೇಡಿಯಂನಲ್ಲಿ ಐದನೇ ಕ್ರಿಕೆಟ್ ಟೆಸ್ಟ್‌ನ ಅಂತಿಮ ದಿನವಾದ ಮಂಗಳವಾರ, ಇಂಗ್ಲೆಂಡ್ ದಾಂಡಿಗರೆಲ್ಲರೂ ಜಡೇಜಾ ಸ್ಪಿನ್‌ನ ಸುಳಿಯಲ್ಲಿ ಸಿಲುಕಿ ವಿಕೆಟ್ ಒಪ್ಪಿಸುತ್ತಾ ಹೋದರು.

ಇಂಗ್ಲೆಂಡ್ ಮೊದಲ ಇನ್ನಿಂಗ್ಸ್‌ನಲ್ಲಿ 477 ರನ್ ಮಾಡಿತ್ತು. ಭಾರತವು 7 ವಿಕೆಟಿಗೆ 759 ರನ್ ಬೃಹತ್ ಮೊತ್ತ ಪೇರಿಸಿ 282 ರನ್ ಮುನ್ನಡೆಯೊಂದಿಗೆ ಇಂಗ್ಲೆಂಡಿಗೆ ಸವಾಲೊಡ್ಡಿತ್ತು. ಆದರೆ ಭಾರತ ಮೊದಲ ಇನ್ನಿಂಗ್ಸ್‌ನಲ್ಲಿ ಪೇರಿಸಿದ ಮೊತ್ತವನ್ನು ಎರಡನೇ ಇನ್ನಿಂಗ್ಸ್‌ನಲ್ಲೂ ದಾಟಲಾಗದ ಇಂಗ್ಲೆಂಡ್, 207 ರನ್ ಮಾಡುವಷ್ಟರಲ್ಲಿ ಎಲ್ಲ ವಿಕೆಟ್‌ಗಳನ್ನು ಕಳೆದುಕೊಂಡಿತು. ಆರಂಭದ ನಾಲ್ಕೂ ದಿನಗಳ ಕಾಲ ಬ್ಯಾಟ್ಸ್‌ಮನ್‌ಗಳಿಗೆ ನೆರವಾಗಿದ್ದ ಪಿಚ್, ಕೊನೆಯ ದಿನವಂತೂ ಬೌಲರುಗಳ ಪರವಾಗಿ ತಿರುಗಿತ್ತು.

ಸ್ಕೋರ್ ಕಾರ್ಡ್‌ಗೆ ಇಲ್ಲಿ ಕ್ಲಿಕ್ ಮಾಡಿ

ಸೋಮವಾರದ ಆಟದಲ್ಲಿ ಕನ್ನಡಿಗ ಕರುಣ್‌ ನಾಯರ್‌ (303*) ಅವರ ತ್ರಿಶತಕದ ಆಟ ಇತಿಹಾಸಕ್ಕೆ ಸಾಕ್ಷಿಯಾಗಿತ್ತು. ಕರುಣ್‌ ಅವರ ಅತ್ಯದ್ಭುತ ಆಟದ ಪರಿಣಾಮ ಭಾರತ ಮೊದಲ ಇನಿಂಗ್ಸ್‌ನಲ್ಲಿ 7 ವಿಕೆಟ್‌ಗೆ 759 ರನ್‌ ಗಳಿಸಿ ಡಿಕ್ಲೇರ್‌ ಮಾಡಿಕೊಂಡಿತು. ಇದು ಭಾರತೀಯ ಟೆಸ್ಟ್‌ ಇತಿಹಾಸದಲ್ಲೇ ಇನಿಂಗ್ಸ್‌ ಒಂದರಲ್ಲಿ ದಾಖಲಾದ ಗರಿಷ್ಠ ಮೊತ್ತ. 282 ರನ್‌ಗಳ ಭಾರಿ ಹಿನ್ನಡೆಯೊಂದಿಗೆ 2ನೇ ಇನಿಂಗ್ಸ್‌ ಆರಂಭಿಸಿದ ಇಂಗ್ಲೆಂಡ್‌ ದಿನದಂತ್ಯಕ್ಕೆ ವಿಕೆಟ್‌ ನಷ್ಟವಿಲ್ಲದೆ 12 ರನ್‌ ಗಳಿಸಿತ್ತು.

ಕರಣ್ ಇನ್ನಿಂಗ್ಸ್ ವೈಭವ ನೋಡಲು ಕ್ಲಿಕ್ ಮಾಡಿ
ಕRun ಮೆಷಿನ್: ಇನ್ಫೋಗ್ರಾಫಿಕ್ಸ್ ನೋಡಿ.

ಪ್ರವಾಸಿ ಇಂಗ್ಲೆಂಡ್ ಪರವಾಗಿ ಆರಂಭಿಕರಾದ ಕೀಟನ್ ಜೆನ್ನಿಂಗ್ಸ್ (54) ಹಾಗೂ ನಾಯಕ ಆಲಿಸ್ಟರ್ (49) ಕುಕ್, ಮೊಯೀನ್ ಅಲಿ (44) ಹೊರತುಪಡಿಸಿದರೆ, ಬ್ರಿಟಿಷ್ ದಾಂಡಿಗರಿಗೆ ಭಾರತೀಯ ಬೌಲಿಂಗ್ ದಾಳಿಯನ್ನು ಎದುರಿಸಲು ಸಾಧ್ಯವಾಗಲಿಲ್ಲ. ಬೆನ್ ಸ್ಟೋಕ್ಸ್ 23 ರನ್ ಮಾಡಿ ಒಂದಿಷ್ಟು ಪ್ರತಿರೋಧ ತೋರಿದರು. ಉಳಿದವರ್ಯಾರೂ ಎರಡಂಕಿ ದಾಟಲಿಲ್ಲ. ಇದರೊಂದಿಗೆ 5 ಪಂದ್ಯಗಳ ಸರಣಿಯನ್ನು ಭಾರತವು 4-0 ಅಂತರದಿಂದ ತನ್ನದಾಗಿಸಿಕೊಂಡಿತು. ತ್ರಿಶತಕದ ದಾಖಲೆ ಸಾಧಿಸಿದ ಕನ್ನಡಿಗ ಕರುಣ್ ನಾಯರ್ ಪಂದ್ಯಶ್ರೇಷ್ಠರಾಗಿ ಪುರಸ್ಕೃತರಾದರು.

450ಕ್ಕೂ ಹೆಚ್ಚು ಮೊತ್ತದ ಪ್ರಥಮ ಇನ್ನಿಂಗ್ಸ್ ಸ್ಕೋರ್ ದಾಖಲಿಸಿದರೂ, ಇಷ್ಟು ದೊಡ್ಡ ಅಂತರದ ಸೋಲನುಭವಿಸಿದ್ದು ಕ್ರಿಕೆಟ್ ಇತಿಹಾಸದಲ್ಲಿ ಇದೇ ಮೊದಲು.

ಸಂಕ್ಷಿಪ್ತ ಸ್ಕೋರ್‌:

ಇಂಗ್ಲೆಂಡ್‌: ಪ್ರಥಮ ಇನಿಂಗ್ಸ್‌ 477 (157.2)

ಭಾರತ: ಪ್ರಥಮ ಇನಿಂಗ್ಸ್‌ 759/7 ಡಿ. (190.4)

ಇಂಗ್ಲೆಂಡ್: ದ್ವಿತೀಯ ಇನ್ನಿಂಗ್ಸ್ 207ಕ್ಕೆ ಆಲೌಟ್

ಫಲಿತಾಂಶ: ಭಾರತಕ್ಕೆ ಇನ್ನಿಂಗ್ಸ್ ಹಾಗೂ 75 ರನ್ ಅಂತರದ ವಿಜಯ