ಮಕಾವ್‌ ಓಪನ್‌ ಗ್ರ್ಯಾನ್‌ ಪ್ರಿ ಗೋಲ್ಡ್‌ ಬ್ಯಾಡ್ಮಿಂಟನ್‌ ಟೂರ್ನಿ ಮಕಾವ್‌: ಅಗ್ರ ಶ್ರೇಯಾಂಕಿತ ಆಟಗಾರ್ತಿ ಭಾರತದ ಸೈನಾ ನೆಹ್ವಾಲ್‌, ಇಲ್ಲಿ ನಡೆಯುತ್ತಿರುವ ಮಕಾವ್‌ ಓಪನ್‌ ಗ್ರ್ಯಾನ್‌ ಪ್ರಿ ಗೋಲ್ಡ್‌ ಬ್ಯಾಡ್ಮಿಂಟನ್‌ ಟೂರ್ನಿಯ ಮಹಿಳಾ ಸಿಂಗಲ್ಸ್‌ನ ಕ್ವಾರ್ಟರ್‌ ಫೈನಲ್‌ ಹಂತದಲ್ಲಿ ಮುಗ್ಗರಿಸಿದ್ದಾರೆ. ಗಾಯದ ಸಮಸ್ಯೆಯಿಂದ ಚೇತರಿಸಿದ ಬಳಿಕ ಎಂದಿನ ಲಯಕ್ಕೆ ಮರಳುವ ಪ್ರಯತ್ನದಲ್ಲಿರುವ ಅಗ್ರ ಶ್ರೇಯಾಂಕಿತೆ ಸೈನಾ, ಶುಕ್ರವಾರ ನಡೆದ ಪ್ರಿ ಕ್ವಾರ್ಟರ್‌ ಫೈನಲ್‌ ಪಂದ್ಯದಲ್ಲಿ 17-21, 17-21 ಅಂತರದ ನೇರ ಗೇಮ್‌ಗಳಿಂದ ಚೀನಾದ ಆಟಗಾರ್ತಿ ಜಾಂಗ್‌ ಯಿಮಾನ್‌ ಎದುರು ಸೋಲೊಪ್ಪಿಕೊಂಡರು. ಕಳೆದ ಆಗಸ್ಟ್‌ನಲ್ಲಿ ನಡೆದ ರಿಯೊ ಒಲಿಂಪಿಕ್ಸ್‌ ವೇಳೆ ಮಂಡಿ ನೋವಿನ ಸಮಸ್ಯೆಗೆ ತುತ್ತಾಗಿ ಶಸ್ತ್ರಚಿಕಿತ್ಸೆಗೆ ಒಳಪಟ್ಟ ಸೈನಾ ನೆಹ್ವಾಲ್‌, ಚೇತರಿಕೆ ಬಳಿಕ ಆಡಿದ ಮೂರನೇ ಟೂರ್ನಿ ಇದಾಗಿದೆ. ಮೊದಲಿಗೆ ಚೀನಾ ಓಪನ್‌ನ ಆರಂಭಿಕ ಸುತ್ತಿನಲ್ಲಿ ನಿರ್ಗಮಿಸಿದ್ದ ಸೈನಾ ಬಳಿಕ ಹಾಂಕಾಂಗ್‌ ಓಪನ್‌ ಮತ್ತು ಇದೀಗ ಮಕಾವ್‌ ಓಪನ್‌ನಲ್ಲಿ ಕ್ವಾರ್ಟರ್‌ ಫೈನಲ್‌ಗೆ ತಮ್ಮ ಓಟ ಅಂತ್ಯಗೊಳಿಸಿದ್ದಾರೆ. ವಿಶ್ವದ 226ನೇ ರಾರ‍ಯಂಕ್‌ನ ಆಟಗಾರ್ತಿ 19 ವರ್ಷದ ಜಾಂಗ್‌ ಯಿಮಾನ್‌ ಎದುರು ಕೇವಲ 35 ನಿಮಿಷಗಳ ಅಂತರದಲ್ಲಿ ಸೈನಾ ನೆಹ್ವಾಲ್‌ ನೇರ ಗೇಮ್‌ಗಳ ಆಘಾತ ಎದುರಿಸಿದರು. ಗುರುವಾರ ಪ್ರಕಟಗೊಂಡ ವಿಶ್ವ ಬ್ಯಾಡ್ಮಿಂಟನ್‌ ಒಕ್ಕೂಟದ ನೂತನ ರಾರ‍ಯಂಕಿಂಗ್‌ ಪಟ್ಟಿಯಲ್ಲಿ ಒಂದು ಸ್ಥಾನ ಸುಧಾರಣೆ ಕಂಡು 10ನೇ ರಾರ‍ಯಂಕಿಂಗ್‌ ಸಂಪಾದಿಸಿರುವ ಸೈನಾ ನೆಹ್ವಾಲ್‌, ಈ ಹಿಂದಿನ ಎರಡು ಪಂದ್ಯಗಳಲ್ಲಿ ಮೂರು ಗೇಮ್‌ಗಳ ಹೋರಾಟ ನಡೆಸಿ ದಣಿದಿದ್ದರು. ಹೀಗಾಗಿ ಅಂತಿಮ ಎಂಟರ ಘಟ್ಟದ ಪಂದ್ಯದಲ್ಲಿ ತಮ್ಮ ಸಂಪೂರ್ಣ ಸಾಮರ್ಥ್ಯ ಹೊರತರಲು ಸಾಧ್ಯವಾಗಲಿಲ್ಲ.
↧
ಕ್ವಾರ್ಟರ್‌ ಫೈನಲ್‌ನಲ್ಲಿ ಎಡವಿದ ಸೈನಾ
↧