- ಶರಣು ಹುಲ್ಲೂರು ಈವರೆಗೂ ಕನ್ನಡದ ನಾಯಕರು ಡಿಫರೆಂಟ್‌ ಕಾಸ್ಟ್ಯೂಮ್‌ನಲ್ಲಿ ಮಿಂಚಿದ್ದನ್ನು ನೋಡಿದ್ದೇವೆ. ಈ ಬಾರಿ ಇವರೆಲ್ಲ ಹೇರ್‌ಸ್ಟೈಲ್‌ನಿಂದಾಗಿ ಸದ್ದು ಮಾಡುತ್ತಿದ್ದಾರೆ. ನಾಯಕರ ವಿಭಿನ್ನ ಕೇಶ ವಿನ್ಯಾಸಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿವೆ. ನೆಚ್ಚಿನ ನಟರ ಹೇರ್‌ ಸ್ಟೈಲ್‌ ಅನ್ನು ಅಭಿಮಾನಿಗಳು ಅನುಕರಿಸುತ್ತಿದ್ದು, ಟ್ರೆಂಡ್‌ ಆಗಿಯೂ ಮಾರ್ಪಟ್ಟಿರುವುದು ವಿಶೇಷ. ಚೌಕ ಸಿನಿಮಾಗಾಗಿ ನೆನಪಿರಲಿ ಪ್ರೇಮ್‌, ಟಗರು ಚಿತ್ರದಲ್ಲಿ ಧನಂಜಯ್‌, ದುನಿಯಾ-2 ಚಿತ್ರಕ್ಕಾಗಿ ಲೂಸ್‌ಮಾದ ಯೋಗಿ, ಧೈರ್ಯಂ ಚಿತ್ರದಲ್ಲಿ ಅಜಯ್‌ರಾವ್‌ ಹೀಗೆ ಅನೇಕ ಕಲಾವಿದರು ತಮ್ಮ ಹೇರ್‌ಸ್ಟೈಲ್‌ ಬದಲಾಯಿಸಿದ್ದಾರೆ. ಕೆಲವು ಟ್ರೆಂಡಿ ಹೇರ್‌ಸ್ಟೈಲ್‌ ಇಲ್ಲಿವೆ. ಉಪ್ಪಿ ಸ್ಟೈಲ್‌: ಹೇರ್‌ಸ್ಟೈಲ್‌ ಅಂದಾಕ್ಷಣ ಥಟ್ಟನೆ ನೆನಪಾಗುವ ನಟ ಉಪೇಂದ್ರ. 'ಎ' ಚಿತ್ರದಿಂದ 'ಉಪ್ಪಿ-2' ಸಿನಿಮಾದವರೆಗೂ ವಿಭಿನ್ನ ರೀತಿಯಲ್ಲಿ ಹೇರ್‌ಸ್ಟೈಲ್‌ ಮಾಡಿಕೊಂಡು ಬಂದವರು. ಅವರ ಅಭಿಮಾನಿಗಳು ಕೂಡ ಅದನ್ನು ಫಾಲೋ ಮಾಡಿಕೊಂಡು ಬರುತ್ತಲೇ ಇದ್ದಾರೆ. ಅವೆಲ್ಲವೂ ಈಗ ಉಪ್ಪಿ ಸ್ಟೈಲ್‌ ಅಂತಾನೇ ಫೇಮಸ್‌ ಆಗಿವೆ. ಪ್ರತಿ ಸಿನಿಮಾದಲ್ಲೂ ಡಿಫರೆಂಟ್‌ ಆಗಿ ಕಾಣುವ ಉಪ್ಪಿಗೆ ತಮ್ಮ ಹೇರ್‌ಸ್ಟೈಲ್‌ ಬಗ್ಗೆ ವಿಪರೀತ ಕಾಳಜಿ. ಉಪೇಂದ್ರ ಹೀರೋ ಆಗುವ ಮುನ್ನ ಹಿಪ್ಪಿ ಸ್ಟೈಲ್‌ ಇತ್ತು. ಅವರು ಬಂದ ಮೇಲೆ ಉಪ್ಪಿ ಸ್ಟೈಲ್‌ ಬಂತು ಅನ್ನುವ ಮಾತಿದೆ. ಸದ್ಯ ಇವರು 'ಉಪೇಂದ್ರ ಮತ್ತೆ ಬಾ' ಎಂಬ ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ಈ ಸಿನಿಮಾದ ಹೇರ್‌ಸ್ಟೈಲ್‌ ಕೂಡ ವಿಭಿನ್ನವಾಗಿದೆ. ಹೆಬ್ಬುಲಿ ಸ್ಟೈಲ್‌: ಹೆಬ್ಬುಲಿ ಚಿತ್ರಕ್ಕಾಗಿ ಕಿಚ್ಚ ಸುದೀಪ್‌ ಸಖತ್ತಾಗಿ ಕೇಶ ವಿನ್ಯಾಸ ಮಾಡಿಕೊಂಡಿದ್ದಾರೆ. ಜೂ. 8ರಂದು ರಿಲೀಸ್‌ ಆದ ಚಿತ್ರದ ಫಸ್ಟ್‌ಲುಕ್‌ ನೋಡಿದವರು ಕಿಚ್ಚನ ಸ್ಟೈಲಿಷ್‌ ಹೇರ್‌ಸ್ಟೈಲ್‌ಗೆ ಫಿದಾ ಆದರು. ಮೇಲೊಂದು ಜುಟ್ಟು, ಬಲಭಾಗಕ್ಕೆ ಉದ್ದನೆಯ ಕೂದಲಿನ ಈ ಸ್ಟೈಲ್‌, ಪೋಸ್ಟರ್‌ ರಿಲೀಸ್‌ ಆದ ಕ್ಷಣಾರ್ಧದಲ್ಲೇ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿತ್ತು. ಅಭಿಮಾನಿಗಳು ಕೂಡ ಪೋಸ್ಟರ್‌ ರಿಲೀಸ್‌ ಆದ ಮರುದಿನವೇ ಸುದೀಪ್‌ ರೀತಿಯಲ್ಲೇ ಹೇರ್‌ ಸ್ಟೈಲ್‌ ಮಾಡಿಕೊಂಡು ಅಭಿಮಾನ ತೋರಿಸಿದರು. ಈಗ ಹೆಬ್ಬುಲಿ ಹೇರ್‌ಸ್ಟೈಲ್‌ ಅಂತಾನೇ ಇದು ಚಾಲ್ತಿಯಲ್ಲಿದೆ. ಟಗರಿಗಾಗಿ ಸ್ಟೈಲ್‌: ಟಗರು ಚಿತ್ರಕ್ಕಾಗಿ ಶಿವರಾಜ್‌ಕುಮಾರ್‌ ಹೊಸ ರೀತಿಯ ಹೇರ್‌ಸ್ಟೈಲ್‌ ಮಾಡಿಕೊಂಡಿದ್ದಾರೆ. ಇದು ಕೂಡ ಸಖತ್‌ ಟ್ರೆಂಡಿಯಾಗಿದೆ. ನಿರ್ದೇಶಕ ದುನಿಯಾ ಸೂರಿ, ತಮ್ಮ ಚಿತ್ರದ ಕಲಾವಿದರನ್ನು ವಿಭಿನ್ನವಾಗಿ ತೋರಿಸುತ್ತಲೇ ಬಂದವರು. ಟಗರು ಚಿತ್ರದಲ್ಲೂ ಅದನ್ನು ಮುಂದುವರಿಸಿದ್ದಾರೆ. ಇದೇ ಚಿತ್ರದಲ್ಲಿ ಧನಂಜಯ್‌ ಕೂಡ ನಟಿಸುತ್ತಿದ್ದು, ಅವರ ಹೇರ್‌ಸ್ಟೈಲ್‌ ಕೂಡ ಬದಲಾಗಿದೆ. ವಿಲನ್‌ ಲುಕ್‌ ಬರುವಂತೆ ಧನಂಜಯ್‌ ಅವರ ತಲೆಗೂದಲಿಗೆ ಕತ್ತರಿ ಹಾಕಲಾಗಿದೆ. ಗೂಗ್ಲಿ ಸ್ಟೈಲ್‌: ಉಪೇಂದ್ರ ನಂತರ ಟ್ರೆಂಡಿ ಹೇರ್‌ಸ್ಟೈಲ್‌ ಮಾಡಿಕೊಂಡು ಬಂದವರು ಯಶ್‌. ಸಾಮಾನ್ಯವಾಗಿ ಇವರು ತಮ್ಮ ಪ್ರತಿ ಸಿನಿಮಾಗಳಲ್ಲೂ ಹೇರ್‌ ಸ್ಟೈಲ್‌ ಬದಲಾಯಿಸಿರುವುದು ಗಮನಿಸಬೇಕಾದ ಅಂಶ. ಇನ್ನಷ್ಟೇ ನಟಿಸಬೇಕಿರುವ ಕೆಜಿಎಫ್‌ ಚಿತ್ರಕ್ಕಾಗಿಯೂ ಯಶ್‌ ವಿಭಿನ್ನ ಹೇರ್‌ಸ್ಟೈಲ್‌ ಮಾಡಿಸಿಕೊಳ್ಳಲಿದ್ದಾರಂತೆ. ಗಜಕೇಸರಿ, ಗೂಗ್ಲಿ ಸೇರಿದಂತೆ ಇವರ ಅನೇಕ ಚಿತ್ರಗಳ ಹೇರ್‌ಸ್ಟೈಲ್‌ ಅಭಿಮಾನಿಗಳಲ್ಲಿ ಕ್ರೇಜ್‌ ಕ್ರಿಯೇಟ್‌ ಮಾಡಿದ್ದವು. ಅದರಲ್ಲೂ ಗೂಗ್ಲಿ ಹೇರ್‌ ಸ್ಟೈಲ್‌ ಇಂದಿಗೂ ಫೇಮಸ್‌.
ನಾನಾ ರೀತಿಯ ಹೇರ್‌ಸ್ಟೈಲ್‌ನಲ್ಲಿ ಮಿಂಚುತ್ತಿದ್ದಾರೆ ಕನ್ನಡದ ಸಿನಿ ಸ್ಟಾರ್ಸ್‌. ಇವರ ಕೇಶವಿನ್ಯಾಸ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗುವುದರ ಜತೆಗೆ ಅಭಿಮಾನಿಗಳು ಕೂಡ ಅದನ್ನು ಅನುಕರಿಸುತ್ತಿದ್ದಾರೆ.
↧
ಟ್ರೆಂಡಿಯಾಗುತ್ತಿದೆ ಸ್ಟಾರ್‌ಗಳ ಹೇರ್‌ ಸ್ಟೈಲ್‌
↧