- ಪದ್ಮಾ ಶಿವಮೊಗ್ಗ ರಿಷಭ್‌ ಶೆಟ್ಟಿ ನಿರ್ದೇಶನದ ಕಿರಿಕ್‌ ಪಾರ್ಟಿ ಚಿತ್ರದ ಟ್ರೇಲರ್‌ ಈಗಾಗಲೇ ಆನ್‌ಲೈನ್‌ನಲ್ಲಿ ಅತಿ ಹೆಚ್ಚು ಹಿಟ್‌ ಆಗಿದೆ. ಇಲ್ಲಿ ರಕ್ಷಿತ್‌ ಶೆಟ್ಟಿ ಫಂಕಿ ಸ್ಟೈಲ್‌ನಲ್ಲಿ ಕಾಲೇಜು ಹುಡುಗನಾಗಿ ಕಾಣಿಸಿಕೊಂಡಿದ್ದಾರೆ. ಈ ಸಿನಿಮಾಕ್ಕೆ ಕತೆ ಮತ್ತು ಚಿತ್ರಕತೆ ಬರೆದಿರುವ ರಕ್ಷಿತ್‌, ನಿರ್ಮಾಣದ ಜವಾಬ್ದಾರಿಯನ್ನೂ ಹೊತ್ತಿದ್ದಾರೆ. ಇದು ಇವರು ಬರೆದ ಮೊದಲ ಕತೆ. ಕಾಲೇಜಿನಲ್ಲಿ ಹಲವು ಹುಡುಗಿಯರ ಜತೆ ರಕ್ಷಿತ್‌ಗೆ ಕ್ರಷ್‌ ಆಗಿತ್ತಂತೆ. 'ಒಬ್ಬರಲ್ಲ ಇಬ್ಬರಲ್ಲ, ಅನೇಕ ಹುಡುಗಿಯರ ಜತೆ ಕ್ರಷ್‌ ಆಗಿತ್ತು. ಅದನ್ನೇ ಸಿನಿಮಾದಲ್ಲಿ ಒಬ್ಬರ ಜತೆ ಅನ್ನೋ ಹಾಗೆ ಸ್ಕ್ರಿಪ್ಟ್‌ ಬರೆದಿದ್ದೇವೆ. ಇದನ್ನು ಸ್ವಲ್ಪ ಸೀರಿಯಸ್‌ ಲವ್‌ ರೀತಿ ತೋರಿಸಿದ್ದೇವೆ. ಹುಡುಗರ ಗ್ಯಾಂಗ್‌ನಲ್ಲಿ ಇರುವ ನೆಗೆಟಿವ್‌ ಕ್ಯಾರೆಕ್ಟರ್‌ಗಳೂ ಚಿತ್ರದಲ್ಲಿ ಇವೆ' ಎನ್ನುತ್ತಾರೆ ಈ ನಟ. ಇದುವರೆಗೆ ಬಂದ ಚಿತ್ರಗಳಿಗಿಂತ ರಕ್ಷಿತ್‌ ಅವರದ್ದು ಇಲ್ಲಿ ವಿಭಿನ್ನ ಪಾತ್ರವಾಗಿದ್ದು, ಕಿರಿಕ್‌ ಹುಡುಗನಾಗಿ ಕಾಣಿಸಿಕೊಂಡಿದ್ದಾರೆ. ಈ ಚಿತ್ರದ ಕತೆಗೆ ಅವರ ಕಾಲೇಜ್‌ ಲೈಫೇ ಸ್ಫೂರ್ತಿ. 'ನಾನು ಕಾಲೇಜಿನಲ್ಲಿ ತುಂಬ ತುಂಟನಾಗಿದ್ದೆ. ನಮ್ಮ ಗ್ಯಾಂಗ್‌ ಬಹಳ ಫೇಮಸ್‌ ಆಗಿತ್ತು. ಕಾಲೇಜು ಹುಡುಗರಿಗೆ ಮಾತ್ರ ಅಲ್ಲ, ದೊಡ್ಡವರಿಗೂ ಈ ಚಿತ್ರ ಮಜಾ ಕೊಡುತ್ತೆ. ಏಕೆಂದರೆ, ಪ್ರತಿಯೊಬ್ಬರಿಗೂ ಕಾಲೇಜ್‌ ಡೇಸ್‌ನ ನೆನಪುಗಳೇ ಮಧುರ. ಈ ಚಿತ್ರ ನೋಡಿದಾಗ ಮತ್ತೆ ಆ ನೆನಪಿನೊಂದಿಗೆ ಕನೆಕ್ಟ್ ಮಾಡಿಕೊಳ್ಳೋದು ಗ್ಯಾರಂಟಿ' ಎಂಬ ವಿಶ್ವಾಸ ರಕ್ಷಿತ್‌ ಅವರದ್ದು. ಮೊದಲ ಚಿತ್ರಕ್ಕೆ ಕಾಲೇಜು ಸ್ಟೋರಿಯ ಆಯ್ಕೆ ಹೆಚ್ಚು ಸೇಫ್‌ ಅಂತ ಅವರಿಗೆ ಅನ್ನಿಸಿದೆ. ಪ್ರತಿಯೊಬ್ಬರ ಬದುಕಿಗೂ ಚಿತ್ರ ಮ್ಯಾಚ್‌ ಆಗುವಂತಿರಬೇಕು ಎಂಬ ಕಾರಣಕ್ಕೆ ಬಹಳ ವರ್ಷಗಳ ಹಿಂದೆ ಬರೆದ ಕತೆಯನ್ನು ಆಯ್ಕೆ ಮಾಡಿಕೊಂಡಿದ್ದಾರೆ. ಈ ಹಿಂದಿನ ಚಿತ್ರಗಳಿಗಿಂತ ದೊಡ್ಡ ಪ್ರಾಜೆಕ್ಟ್ ಇದು ಅನ್ನೋದು ಅವರ ಅಭಿಪ್ರಾಯ. ಚಿತ್ರದಲ್ಲಿ ಇಬ್ಬರು ಹೊಸ ನಾಯಕಿಯರನ್ನು ಪರಿಚಯಿಸಲಾಗುತ್ತಿದೆ. ಸಂಯುಕ್ತಾ ಹೆಗಡೆ ಮತ್ತು ರಶ್ಮಿಕಾ ಮಂದಣ್ಣ, ಕಿರಿಕ್‌ ಪಾರ್ಟಿ ಮೂಲಕ ಸ್ಯಾಂಡಲ್‌ವುಡ್‌ಗೆ ಎಂಟ್ರಿ ಕೊಟ್ಟಿದ್ದಾರೆ. 'ಈ ಚಿತ್ರದಲ್ಲಿ ನಾನು ಮತ್ತು ಅಚ್ಯುತ್‌ ಅವರನ್ನು ಬಿಟ್ಟರೆ ಉಳಿದವರೆಲ್ಲ ಹೊಸಬರು. ಸುಮಾರು 2000 ಜನರ ಆಡಿಷನ್‌ ಮಾಡಲಾಗಿತ್ತು. ಎಲ್ಲರೂ ಹೊಸಬರೇ ಆಗಿರಬೇಕು ಅನ್ನೋದು ನನ್ನ ನಿರ್ಧಾರವಾಗಿತ್ತು. ಏಕೆಂದರೆ, ನಾವು ಮೊದಲ ದಿನ ಕಾಲೇಜಿಗೆ ಹೋದಾಗ ಎಲ್ಲಾ ಮುಖಗಳೂ ಹೊಸದಿರುತ್ತೆ. ಇದು ಹೊಸ ಅನುಭವನ್ನು ಕೊಡುತ್ತೆ. ಆ ಅನುಭವ ಪ್ರೇಕ್ಷಕನಿಗೂ ಸಿಗಬೇಕು ಅನ್ನುವುದೇ ಇದಕ್ಕೆ ಕಾರಣ' ಎಂದು ವಿವರ ನೀಡುತ್ತಾರೆ ರಕ್ಷಿತ್‌. ಚಿತ್ರ ಇದೇ ತಿಂಗಳು 23ರಂದು ರಿಲೀಸ್‌ ಆಗಲಿದೆ. -ರಕ್ಷಿತ್‌ ಶೆಟ್ಟಿ, ನಟ
ಸ್ಕೂಲ್‌ ಡೇಸ್‌ನಿಂದಲೂ ನಾನು ತರಲೆ ಹುಡುಗನೇ. ಈಗಲೂ ಆ ತುಂಟತನ ನನ್ನೊಳಗಿದೆ. ಜವಾಬ್ದಾರಿ ಬಂದ ಮೇಲೂ ಮತ್ತೆ ಹುಡುಗುತನ ಬೇಕು ಅನ್ನಿಸುತ್ತೆ. ಆ ಆಸೆಯನ್ನು ಕಿರಿಕ್‌ ಪಾರ್ಟಿ ಚಿತ್ರದಲ್ಲಿ ಪೂರೈಸಿಕೊಂಡೆ.
↧
ಪಾರ್ಟಿಯಲ್ಲಿ ಕಿರಿಕ್‌ ಮಾಡಿದ ರಕ್ಷಿತ್‌
↧