ಕೊಡಗಿನಿಂದ ಸ್ಯಾಂಡಲ್‌ವುಡ್‌ಗೆ ಈವರೆಗೆ ಸಾಕಷ್ಟು ನಾಯಕಿಯರು ಎಂಟ್ರಿ ಕೊಟ್ಟಿದ್ದಾರೆ. ಈಗ ಆ ಸಾಲಿಗೆ ರಶ್ಮಿಕಾ ಹೊಸ ಸೇರ್ಪಡೆ. ಮೊದಲ ಸಿನಿಮಾ ಬಿಡುಗಡೆಯಾಗುವ ಮುನ್ನವೇ ದರ್ಶನ್‌ ಜತೆ ಸಿನಿಮಾಗೆ ಅವರು ಆಯ್ಕೆಯಾಗಿದ್ದಾರೆ. ತಮ್ಮ ಸಿನಿ ಜರ್ನಿ ಬಗ್ಗೆ ಅವರು ಮಾತನಾಡಿದ್ದು ಇಲ್ಲಿದೆ. - ಹರೀಶ್‌ ಬಸವರಾಜ್‌ * ಹಾಡಿನ ಮೂಲಕ ಫೇಮಸ್‌ ಆಗಿರೋ ರಶ್ಮಿಕಾ, ಸಿನಿಮಾರಂಗಕ್ಕೆ ಬಂದಿದ್ದು ಹೇಗೆ? - ನಾನು ಕೊಡಗಿನ ವಿರಾಜಪೇಟೆಯವಳು, ವಿದ್ಯಾಭ್ಯಾಸಕ್ಕಾಗಿ ಬೆಂಗಳೂರಿಗೆ ಬಂದೆ. ರಾಮಯ್ಯ ಕಾಲೇಜಿನಲ್ಲಿ ಬಿಎ ಓದುತ್ತಿರುವಾಗ ಮಾಡೆಲಿಂಗ್ ಮಾಡ್ತಾ ಇದ್ದೆ. 'ಟೈಮ್ಸ್‌ ಆಫ್‌ ಇಂಡಿಯಾ' ಪತ್ರಿಕೆಯ 'ಫ್ರೆಶ್‌ ಫೇಸ್‌' ಕಾಂಪಿಟೇಶನ್‌ನಲ್ಲಿ ಆಯ್ಕೆಯಾಗಿದ್ದೆ. ಅಲ್ಲಿನ ಒಂದು ಫೋಟೋವನ್ನು ನಿರ್ದೇಶಕ ರಿಷಭ್‌ ಶೆಟ್ಟಿ ಮತ್ತು ರಕ್ಷಿತ್‌ ಶೆಟ್ಟಿ ನೋಡಿ ನನ್ನನ್ನು ಅವರ ಸಿನಿಮಾಗೆ ಆಯ್ಕೆ ಮಾಡಿಕೊಂಡರು. *ಮೊದಲ ಸಿನಿಮಾದಲ್ಲಿ ನೀವು ನಾಯಕನ ಸೀನಿಯರ್‌ ಆಗಿ ನಟಿಸಿದ್ದೀರಾ, ಅದರ ಅನುಭವ ಹೇಗಿತ್ತು? - ಡಿಗ್ರಿ ಕೊನೆಯ ವರ್ಷದಲ್ಲಿ ಓದುತ್ತಿದ್ದೇನೆ. ಆದರೆ ಆ ಸಿನಿಮಾದಲ್ಲಿ ಎಂಜಿನಿಯರಿಂಗ್‌ನ ಕೊನೆಯ ವರ್ಷದ ವಿದ್ಯಾರ್ಥಿನಿ. ಮೊದ ಮೊದಲಿಗೆ ಕಷ್ಟವಾಯಿತು ಆದರೆ ರಿಷಭ್‌ ಮತ್ತು ರಕ್ಷಿತ್‌ ಚೆನ್ನಾಗಿ ಹೇಳಿಕೊಡುತ್ತಿದ್ದರು. ಪ್ರತಿ ಸೀನ್‌ನಲ್ಲಿಯೂ ನಟಿಸಬೇಕಾದರೆ ರಿಹರ್ಸಲ್‌ ಮಾಡಿಸುತ್ತಿದ್ದರು. ಒಂದು ರೀತಿಯಲ್ಲಿ ಮೆಚುರ್ಡ್‌ ಕ್ಯಾರೆಕ್ಟರ್‌ ಅದು. * ಮೊದಲ ಸಿನಿಮಾ ಇನ್ನೂ ಬಿಡುಗಡೆಯಾಗಿಲ್ಲ, ಆಗಲೇ ದರ್ಶನ್‌ ಅವರಂತಹ ಸ್ಟಾರ್‌ ನಟರ ಸಿನಿಮಾಗೆ ಆಯ್ಕೆಯಾಗಿದ್ದೀರಾ... - ಮಾಡೆಲಿಂಗ್ ಮಾಡಿಕೊಂಡು ಇದ್ದವಳು, ಮೊದಲ ಸಿನಿಮಾದಲ್ಲೇ ರಕ್ಷಿತ್‌ ಶೆಟ್ಟಿ ಜತೆ ನಾಯಕಿ. ಈಗ ಎರಡನೇ ಸಿನಿಮಾದಲ್ಲಿ ದರ್ಶನ್‌ ಅವರಂತಹ ದೊಡ್ಡ ನಟ, ಪ್ರಕಾಶ್‌ ಅವರಂಥ ದೊಡ್ಡ ನಿರ್ದೇಶಕರ ಜತೆ ಕೆಲಸ ಮಾಡುವ ಅವಕಾಶ ಸಿಕ್ಕಿರುವುದಕ್ಕೆ ಎಕ್ಸೈಟ್‌ ಆಗಿದ್ದೇನೆ. ಕನ್ನಡದ ಎಲ್ಲ ನಟರ ಜತೆಗೂ ನಟಿಸಬೇಕು ಎಂಬ ಆಸೆ ಇದೆ. ದರ್ಶನ್‌ ಅವರ ಜತೆಗಿನ ಸಿನಿಮಾ ಯಾವಾಗ ಆರಂಭವಾಗುತ್ತದೋ ಎಂದು ಕಾಯುತ್ತಿದ್ದೇನೆ. *ದರ್ಶನ್‌ ಅವರ ಸಿನಿಮಾದಲ್ಲಿರುವ ನಿಮ್ಮ ಪಾತ್ರ ಹೇಗಿದೆ? - ತುಂಬಾ ಚೆನ್ನಾಗಿದೆ, ನಿರ್ದೇಶಕರು ನನ್ನ ಪಾತ್ರವನ್ನು ಉತ್ತಮವಾಗಿ ಕಟ್ಟಿಕೊಟ್ಟಿದ್ದಾರೆ. ಮೊದಲ ಸಿನಿಮಾದಲ್ಲಿ ನಾನು ಸ್ವಲ್ಪ ಮೆಚುರ್ಡ್‌ ಕ್ಯಾರೆಕ್ಟರ್‌ನಲ್ಲಿ ಕಾಣಿಸಿಕೊಂಡಿದ್ದೇನೆ. ಎರಡನೇ ಸಿನಿಮಾದಲ್ಲಿ ಮಾಡ್‌ ಹುಡುಗಿ. ಆದರೂ ಅವಳು ಒಂದು ರೀತಿಯಲ್ಲಿ ಟ್ರೆಡಿಶನಲ್‌ ಆಗಿರುತ್ತಾಳೆ. * ಮಾಡೆಲಿಂಗ್‌ಗೂ ಮತ್ತು ಸಿನಿಮಾ ನಟನೆಗೂ ವ್ಯತ್ಯಾಸ ಇದೆ ಅಂತ ಅನಿಸಿದೆಯಾ? - ತುಂಬ ವ್ಯತ್ಯಾಸ ಇದೆ, ಮಾಡೆಲಿಂಗ್ ಅಂದರೆ ಬರೀ ಫೋಟೋಗೆ ಪೋಸ್‌ ಮಾತ್ರ ಕೊಡಬೇಕು. ಆದರೆ ಸಿನಿಮಾ ಹಾಗಲ್ಲ ಕ್ಯಾಮೆರಾ ಮುಂದೆ ನಾವು ನಮ್ಮ ಎಕ್ಸ್‌ಪ್ರೆಶನ್‌ ತೋರಿಸಬೇಕು. ಸಿನಿಮಾ ಒಂದು ರೀತಿಯಲ್ಲಿ ಚಾಲೆಂಜ್‌ ಆಗಿರುತ್ತದೆ. ನನಗೂ ಸ್ವಲ್ಪ ಕಷ್ಟವಾಗುತ್ತಿತ್ತು. ನಮ್ಮ ನಿರ್ದೇಶಕರು ಮತ್ತು ರಕ್ಷಿತ್‌ ಶೆಟ್ಟಿ ತುಂಬ ಸಹಾಯ ಮಾಡಿದರು. *ನಿಮಗೆ ಕಾಲೇಜಿನಲ್ಲಿ ಯಾರಾದ್ರೂ ಜೂನಿಯರ್‌ಗಳು ಫ್ಲರ್ಟ್‌ ಮಾಡುತ್ತಾರಾ? - ಇಲ್ಲ, ಅಷ್ಟೆಲ್ಲ ಸೀನ್‌ ಇಲ್ಲ, ನನ್ನ ಜೂನಿಯರ್‌ಗಳು ನನ್ನನ್ನು ಮಾತನಾಡಿಸಲು ಸಹ ಬರುವುದಿಲ್ಲ. ಇನ್ನು ನಮ್ಮ ಕ್ಲಾಸಿನವರೇ ನನಗೆ ರೇಗಿಸುತ್ತಾರೆ. ಅಲ್ಲದೆ ಕಾಲೇಜಿಗೆ ನಾನು ತುಂಬಾ ಕಡಿಮೆ ಹೋಗುತ್ತಿರುವುದು. ಸಿನಿಮಾ, ಮಾಡೆಲಿಂಗ್‌ನಲ್ಲಿ ಬಿಝಿಯಾಗಿದ್ದೇನೆ. *ರಶ್ಮಿಕಾ ಅವರ ಲೈಫ್‌ನಲ್ಲಿ ಲವ್‌, ಪ್ಯಾರ್‌, ಗೀರ್‌ ಆ ತರಹದ್ದೇನಾದ್ರು? - ನನ್ನ ಲೈಫ್‌ನಲ್ಲಿ ಲವ್‌ಗೆ ಜಾಗನೇ ಇಲ್ಲ, ಎಲ್ಲದಕ್ಕಿಂತ ಹೆಚ್ಚಾಗಿ ಅವಕ್ಕೆಲ್ಲ ಸಮಯನೇ ಇಲ್ಲ. ಶಾಲಾ ದಿನಗಳಲ್ಲಿ ಒಂದೆರಡು ಕ್ರಶ್‌ ಆಗಿದ್ದವು. ಆದರೆ ಅದು ಅವಾಗಷ್ಟೆ. ಈಗ ಆರಾಮಾಗಿ. ಬಿಂದಾಸ್‌ ಆಗಿ ಆಗಿ ಇದ್ದೇನೆ. *ಮನೆಯವರ ಪ್ರೋತ್ಸಾಹ ಹೇಗಿದೆ? - ಅಪ್ಪನ ಪ್ರೋತ್ಸಾಹ ಇಲ್ಲದೇ ಹೋಗಿದ್ದರೆ, ನಾನು ಇಲ್ಲಿಯವರೆಗೂ ಬರಲು ಸಾಧ್ಯವೇ ಆಗುತ್ತಿರಲಿಲ್ಲ. ನನ್ನ ಎಲ್ಲ ಸಿನಿಮಾ ವಿಚಾರಗಳನ್ನು ಅಮ್ಮನೇ ನೋಡಿಕೊಳ್ಳುವುದು. ಅವರು ನನಗಿಂತಲೂ ಈಗ ಬಿಝಿ. *ನಿಮ್ಮ ಡ್ರೀಮ್‌ ರೋಲ್‌ ಯಾವುದು? - ನಾನು ನನ್ನ ಸಿನಿಮಾ ಮೂಲಕ ಪ್ರೇಕ್ಷಕರಿಗೆ ಖುಷಿ ಕೊಡಬೇಕು. ಅದಷ್ಟೇ ನನ್ನ ಉದ್ದೇಶ. ನನ್ನ ಸಿನಿಮಾ ನೋಡಿದವರು ಸಂತೋಷದಿಂದ ಮನೆಗೆ ಹೋಗಬೇಕು. ಎಲ್ಲ ರೀತಿಯ ಪಾತ್ರಗಳಲ್ಲಿಯೂ ನಟಿಸಬೇಕು ಎಂಬುದು ನನ್ನ ಆಸೆ. ಹಾಗಾಗಿ ಡ್ರೀಮ್‌ ರೋಲ್‌ ಎಂದು ಯಾವುದೂ ಇಲ್ಲ.
↧
ಮಾಡೆಲಿಂಗ್ ಸುಲಭ, ಆ್ಯಕ್ಟಿಂಗ್ ಕಷ್ಟ
↧