ಬಡ್ಡಿ ದರ ಮತ್ತೆ ಇಳಿಕೆ ಸಂಭವ: ಎಸ್‌ಬಿಐ

ನೋಟು ಅಮಾನ್ಯತೆಯಿಂದ ಬ್ಯಾಂಕ್‌ಗಳಿಗೆ ಹೆಚ್ಚಿದ ಹಣದ ಹರಿವು

ಹೊಸದಿಲ್ಲಿ: ಸಾವಿರ, ಐನೂರು ರೂಪಾಯಿ ನೋಟುಗಳ ಅಮಾನ್ಯತೆಯಿಂದ ಬ್ಯಾಂಕ್‌ಗಳ ಉಳಿತಾಯ ಮತ್ತು ಚಾಲ್ತಿ ಖಾತೆಗಳಿಗೆ ಹೆಚ್ಚಿನ ಹಣ ಹರಿದು ಬರುತ್ತಿದ್ದು, ಮುಂದಿನ ದಿನಗಳಲ್ಲಿ ಬಡ್ಡಿ ದರ ಇಳಿಕೆಯಾಗುವ ಸಾಧ್ಯತೆ ಇದೆ ಎಂದು ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾ(ಎಸ್‌ಬಿಐ) ಹೇಳಿದೆ.

''ನೋಟುಗಳ ಅಮಾನ್ಯತೆಗೊಳಿಸುವ ಕೇಂದ್ರ ಸರಕಾರದ ಇತ್ತೀಚಿನ ನಡೆ ಸ್ವಾಗತಾರ್ಹ. ದೊಡ್ಡ ಮೊತ್ತದ ಹಣ ಬ್ಯಾಂಕ್‌ಗೆ ಬರುತ್ತಿದೆ. ಬ್ಯಾಂಕ್‌ಗೆ ಇದು ಹೆಚ್ಚುವರಿ ಹಣದ ಹರಿವಾಗಿದ್ದು, ಬಡ್ಡಿ ದರವನ್ನು ಮತ್ತೆ ಇಳಿಕೆ ಮಾಡುವ ಸಂದರ್ಭ ಸೃಷ್ಟಿಯಾಗಿದೆ,'' ಎಂದು ಪಿಟಿಐಗೆ ನೀಡಿದ ಸಂದರ್ಶನದಲ್ಲಿ ಎಸ್‌ಬಿಐ ಉನ್ನತ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ನ.8ರಂದು ಸರಕಾರವು 500, 1000 ರೂ.ಗಳ ನೋಟಿನ ಚಲಾವಣೆಯನ್ನು ರದ್ದುಗೊಳಿಸಿದ್ದು, ಅವುಗಳನ್ನು ಬದಲಿಸಿಕೊಳ್ಳಲು 50 ದಿನಗಳ ಗಡುವು ನೀಡಿದೆ. ಲೆಕ್ಕವಿಲ್ಲದ ಹಣಕ್ಕೆ ದಂಡ, ತೆರಿಗೆ ಹಾಕುವುದಾಗಿ ಹೇಳಿದೆ. ನೋಟುಗಳ ಬದಲಾವಣೆ ಹಿನ್ನೆಲೆಯಲ್ಲಿ ಜನರು ತಮ್ಮ ಖಾತೆಗಳಿಗೆ ಹಣ ಜಮಾ ಮಾಡುತ್ತಿದ್ದು, ಎಸ್‌ಬಿಐವೊಂದಕ್ಕೇ ನ.17ರ ಹೊತ್ತಿಗೆ 1.27 ಲಕ್ಷ ಕೋಟಿ ರೂ. ಹಣ ಹರಿದು ಬಂದಿದೆ. ರಿವರ್ಸ್‌ ರೆಪೊ ಮತ್ತು ಅಲ್ಪಾವಧಿಯ ಟಿ-ಬಿಲ್‌ಗಳಲ್ಲಿ ಹೆಚ್ಚುವರಿ ಹಣವನ್ನು ಹೂಡಿಕೆ ಮಾಡುವುದಾಗಿ ಎಸ್‌ಬಿಐ ಹೇಳಿದೆ.

ಕಳೆದ ಅಕ್ಟೋಬರ್‌ನಲ್ಲಿ ನಡೆದ ಹಣಕಾಸು ನೀತಿ ಪರಾಮರ್ಶೆ ವೇಳೆ ಭಾರತೀಯ ರಿಸರ್ವ್‌ ಬ್ಯಾಂಕ್‌ ಬಡ್ಡಿ ದರವನ್ನು ಶೇ.0.25ರಷ್ಟು ಇಳಿಸಿ ಶೇ.6.25ಕ್ಕೆ ಸ್ಥಿರಗೊಳಿಸಿತ್ತು. 2015ರ ಜನವರಿಯಿಂದ ಈಚೆಗೆ ಆರ್‌ಬಿಐ ಶೇ.1.75ರಷ್ಟು ರೆಪೊ ದರವನ್ನು ಕಡಿತಗೊಳಿಸಿದೆ. ಇದರ ಲಾಭವನ್ನು ಕೆಲವು ಬ್ಯಾಂಕ್‌ಗಳು ಗ್ರಾಹಕರಿಗೆ ವರ್ಗಾಯಿಸಿದ್ದು, ಮನೆ ಮತ್ತು ಕಾರ್‌ ಸಾಲದ ಬಡ್ಡಿ ದರದಲ್ಲಿ ಅಲ್ಪ ಇಳಿಕೆಯಾಗಿದೆ. ಆದರೆ, ಕೆಲವು ಬ್ಯಾಂಕ್‌ಗಳು ಅನುತ್ಪಾದಕ ಆಸ್ತಿಯ ನೆಪಗಳನ್ನು ಹೇಳುತ್ತಾ ಬಡ್ಡಿಯಲ್ಲಿ ಯಥಾಸ್ಥಿತಿಯನ್ನು ಕಾಯ್ದುಕೊಂಡಿವೆ.

=====

ಉಳಿತಾಯ ಯೋಜನೆಗಳ ಬಡ್ಡಿಗೆ ಕತ್ತರಿ?

ನೋಟುಗಳ ಅಮಾನ್ಯತೆಯಿಂದ ಸಾಲಗಳ ಮೇಲಿನ ಬಡ್ಡಿ ದರ ಇಳಿಕೆಯಾದರೂ, ನಿಶ್ಚಿತ ಠೇವಣಿ ಸೇರಿದಂತೆ ಉಳಿತಾಯ ಯೋಜನೆಗಳ ಬಡ್ಡಿದರಕ್ಕೆ ಮತ್ತೆ ಕತ್ತರಿ ಬೀಳುವ ಅವಕಾಶವೂ ಇದೆ. ಎಸ್‌ಬಿಐ ನಿಶ್ಚಿತ ಠೇವಣಿ ಬಡ್ಡಿ ದರವನ್ನು ಕಳೆದ ವಾರವಷ್ಟೇ ಶೇ.0.15ರಷ್ಟು ಇಳಿಸಿದೆ.

=========

ಶೇ.0.25ರಿಂದ 0.50ರಷ್ಟು ಬಡ್ಡಿ ಇಳಿಕೆ

''ನಮ್ಮ ನಿರೀಕ್ಷೆಯ ಪ್ರಕಾರ, ಹಣದುಬ್ಬರವು ನವೆಂಬರ್‌ನಲ್ಲಿ ಶೇ.4ಕ್ಕಿಂತ ಕೆಳಗಿಳಿಯಲಿದೆ. ನೋಟು ಅಮಾನ್ಯತೆಯು ಹಣದುಬ್ಬರ ಇಳಿಕೆಗೆ ಪೂರಕವಾಗಿದೆ. ಹೀಗಾಗಿ ಬಡ್ಡಿ ದರದಲ್ಲಿ ಶೇ.0.25ರಿಂದ ಶೇ.0.50ರ ತನಕ ಬಡ್ಡಿ ದರ ಇಳಿಕೆಯಾಗುವ ಸಾಧ್ಯತೆ ಇದೆ,'' ಎಂದು ಎಸ್‌ಬಿಐ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಈ ಬ್ಯಾಂಕ್‌ ಬಡ್ಡಿ ದರ ಇಳಿಸಿದರೆ, ಇತರೆ ಬ್ಯಾಂಕ್‌ಗಳೂ ಒತ್ತಡಪೂರ್ವಕವಾಗಿ ಬಡ್ಡಿ ಇಳಿಸಬೇಕಾಗುತ್ತದೆ.

==========

ನೋಟಿನ ಬದಲಾವಣೆ ನೀತಿಯ ಅನುಸಾರ, ಜನರು ತಮ್ಮಲ್ಲಿನ ಹಳೆಯ ನೋಟುಗಳನ್ನು ಬ್ಯಾಂಕ್‌ಗಳಿಗೆ ಜಮೆ ಮಾಡುತ್ತಿದ್ದಾರೆ. ಇದರಿಂದ ಬ್ಯಾಂಕ್‌ಗಳಲ್ಲಿ ಹೆಚ್ಚಿನ ಹಣ ಸಂಗ್ರಹ.

ಅಕ್ಟೋಬರ್‌ನಲ್ಲಿ ಚಿಲ್ಲರೆ ಹಣದುಬ್ಬರ ಶೇ.4.20, ಸಗಟು ಹಣದುಬ್ಬರವು ಶೇ.3.39ಕ್ಕೆ ಇಳಿದಿದ್ದು, ನವೆಂಬರ್‌ನಲ್ಲಿ ಇನ್ನಷ್ಟು ಕುಸಿಯುವ ನಿರೀಕ್ಷೆಯಿದ್ದು, ಬಡ್ಡಿ ಇಳಿಕೆಗೆ ಸಹಾಯಕ.

ಎಸ್‌ಬಿಐವೊಂದಕ್ಕೆ ನ.17ರ ಹೊತ್ತಿಗೆ 1.27 ಲಕ್ಷ ಕೋಟಿ ರೂ. ಹರಿದು ಬಂದಿದೆ.