ಬಾಲಿವುಡ್‌ನ ಅನೇಕ ನಟಿಯರು ಈಗಾಗಲೇ ಸ್ಯಾಂಡಲ್‌ವುಡ್‌ನಲ್ಲಿ ಸ್ಪೆಷಲ್‌ ಸಾಂಗ್‌ಗೆ ಕುಣಿದಿದ್ದಾರೆ. ಈಗ ಮುಕುಂದ ಮುರಾರಿ ಚಿತ್ರದಲ್ಲಿ ಉಪ್ಪಿ ಜತೆ ಕಾಣಿಸಿಕೊಂಡಿದ್ದ ನಟಿ ಇಷಿತಾ ವ್ಯಾಸ್‌ ಇದೀಗ ದರ್ಶನ್ ಜತೆ ಕಾಣಿಸಿಕೊಳ್ಳಲಿದ್ದಾರೆ. ಚಿಂತನ್‌ ನಿರ್ದೇಶನದ ಹೊಸ ಚಿತ್ರದಲ್ಲಿ ರೆಟ್ರೋ ಸ್ಟೈಲ್‌ನಲ್ಲಿ ಹೆಜ್ಜೆ ಹಾಕಲು ಬಂದಿದ್ದಾರೆ. ----- ದರ್ಶನ್ ಅಭಿನಯದ ಹೊಸ ಚಿತ್ರವನ್ನು ಚಿಂತನ್‌ ನಿರ್ದೇಶನ ಮಾಡುತ್ತಿದ್ದು, ದೀಪಾ ಸನ್ನಿಧಿ ನಾಯಕಿ. ಈ ಚಿತ್ರವನ್ನು ರೆಟ್ರೋ ಸ್ಟೈಲ್‌ನಲ್ಲಿ ಚಿತ್ರೀಕರಿಸಲಾಗುತ್ತಿದೆ. ದೀಪಾ ಸನ್ನಿಧಿ ಅಪ್ಪಟ ಗೃಹಿಣಿಯಾಗಿ, ಗೌರಮ್ಮನಂತೆ ಕಾಣಿಸಿಕೊಂಡಿದ್ದರೆ, ಗ್ಲಾಮ್‌ ಹುಡುಗಿ ಇಷಿತಾ ವ್ಯಾಸ್‌ ಸ್ಟೈಲಿಶ್‌ ಆಗಿ ಕಾಣಿಸಿಕೊಂಡಿದ್ದಾರೆ. ಚಿತ್ರದಲ್ಲಿರುವ ಸ್ಪೆಷಲ್‌ ಸಾಂಗ್‌ಗೆ ರೆಟ್ರೋ ಸ್ಟೈಲ್‌ನಲ್ಲೇ ಡ್ರೆಸ್‌ ಮಾಡಿಕೊಂಡು ಡಾನ್ಸ್‌ ಮಾಡಿದ್ದಾರೆ. ಇಷಿತಾ ವ್ಯಾಸ್‌ ಬಾಲಿವುಡ್‌ನ ಬೋಲ್ಡ್‌ ನಟಿ. ಮಾಡೆಲಿಂಗ್‌ನಿಂದ ಬಂದ ಇವರು ಈಗಾಗಲೆ ಕಮಾಂಡೋ, ಗಬ್ಬರ್‌ ಈಸ್‌ ಬ್ಯಾಕ್‌, ಪೀಪ್ಲಿ ಲೈವ್‌, ಓ ಮೈ ಗಾಡ್‌ ಚಿತ್ರಗಳಲ್ಲಿ ನಟಿಸಿದ್ದಾರೆ. ಕನ್ನಡದಲ್ಲಿ ಇತ್ತೀಚೆಗೆ ಉಪೇಂದ್ರ ಮತ್ತು ಸುದೀಪ್‌ ಅಭಿನಯದ ಮುಕುಂದ ಮುರಾರಿ ಚಿತ್ರದಲ್ಲಿ ಕಾಣಿಸಿಕೊಂಡಿದ್ದರು. ಈಗ ದರ್ಶನ್ ಜತೆ ನಟಿಸುವ ಅವಕಾಶ ಅವರಿಗೆ ಸಿಕ್ಕಿದೆ. ಹೊಸ ಚಿತ್ರದಲ್ಲಿ ಸ್ಟೆಷಲ್‌ ಸಾಂಗ್‌ಗೆ 80ರ ದಶಕದ ಚಿತ್ರಗಳಲ್ಲಿ ಇರುತ್ತಿದ್ದ ಐಟಂ ಸಾಂಗ್‌ ಸ್ಟೈಲ್‌ನಲ್ಲಿ ಸ್ಟೆಪ್‌ ಹಾಕಿದ್ದಾರೆ ಇಷಿತಾ. ಚಿತ್ರದಲ್ಲಿ ಇವರ ಪಾತ್ರವೇನು ಎಂಬುದರ ಬಗ್ಗೆ ನಿರ್ದೇಶಕ ಚಿಂತನ್‌ ಹೆಚ್ಚಿನ ವಿವರ ಬಿಟ್ಟು ಕೊಡಲು ಸಿದ್ಧರಿಲ್ಲ. ಈ ಚಿತ್ರಕ್ಕೆ ಸಂಗೀತ ನೀಡಿರುವುದು ಅರ್ಜುನ್‌ ಜನ್ಯ ಕೂಡಾ ರೆಟ್ರೋ ಹಾಡಿಗೆ ಸಖತ್‌ ಕಿಕ್‌ ಕೊಟ್ಟಿದ್ದಾರೆ. 'ಅರ್ಜುನ್‌ ಜನ್ಯ ರೆಟ್ರೋ ಸ್ಟೈಲ್‌ನಲ್ಲೇ ಕೊಟ್ಟಿರುವ ಸಂಗೀತಕ್ಕೆ ತಕ್ಕಂತೆ ಹಾಡು ಚಿತ್ರಿಸಿದ್ದೇವೆ. ಸ್ಪೆಷಲ್‌ ಸಾಂಗ್‌ನಲ್ಲಿ ದರ್ಶನ್, ಇಷಿತಾ ಸೇರಿ ಸುಮಾರು 150 ಸಹ ಕಲಾವಿದರು ಹೆಜ್ಜೆ ಹಾಕಿದ್ದಾರೆ' ಎಂದು ಹೇಳಿದ್ದಾರೆ ಚಿಂತನ್‌. ಮೈಸೂರು ದಸರಾದಲ್ಲಿ ಪ್ರದರ್ಶನ ನೀಡುವ ಲೈವ್‌ ಬ್ಯಾಂಡ್‌ ಮ್ಯೂಸಿಕ್‌ ತಂಡವೊಂದನ್ನು ಬಳಸಿಕೊಂಡು ಅರ್ಜುನ್‌ ಜನ್ಯ ಸಂಗೀತ ಸಂಯೋಜನೆ ಮಾಡಿದ್ದಾರೆ. ಎರಡೇ ದಿನಗಳಲ್ಲಿ ರೆಕಾರ್ಡಿಂಗ್‌ ಮುಗಿಸಿದ್ದಾರೆ. ಟ್ರಂಪೆಟ್‌, ಕ್ಲಾರಿಯೋನೆಟ್‌, ಹಳೆಯ ಮಾದರಿಯ ಗಿಟಾರ್‌ ಅಲ್ಲದೆ, ಇನ್ನೂ ಕೆಲವು ಹಳೆಯ ವಾದ್ಯಗಳನ್ನೇ ಬಳಸಿದ್ದಾರೆ. 'ರಾಣಿ ರಾಣಿ ರಾಣಿ ಮೇ ಮುಂಬೈ ಕಿ ರಾಣಿ' ಎಂಬ ಹಾಡಿನಲ್ಲಿ ಇಷಿತಾ ಡಾನ್ಸ್‌ ಮಾಡಿದ್ದಾರೆ. ಚಿತ್ರದಲ್ಲಿ ಎಲ್ಲರ ಕಾಸ್ಟ್ಯೂಮ್‌, ಹೇರ್‌ಸ್ಟೈಲ್‌ ಹಳೆಯ ಚಿತ್ರಗಳನ್ನು ನೆನಪಿಸುವಂತಿದೆ. ಚಿತ್ರದಲ್ಲಿ ದರ್ಶನ್ ಸಹೋದರ ದಿನಕರ್‌ ತೂಗುದೀಪ ಮತ್ತು ಸೃಜನ್‌ ನಟಿಸಿದ್ದಾರೆ. ----- ಸ್ಟಾರ್‌ ನಟ ದರ್ಶನ್ ಚಿತ್ರದಲ್ಲಿ ಅವಕಾಶ ಸಿಕ್ಕಿದ್ದಕ್ಕೆ ಎಕ್ಸೈಟ್‌ ಆಗಿದ್ದೇನೆ. ಚಿತ್ರದಲ್ಲಿ ಡಿಫರೆಂಟ್‌ ಲುಕ್‌ನಲ್ಲಿ ಕಾಣಿಸಿಕೊಳ್ತಿರೋದು ಇನ್ನೊಂದು ಖುಷಿ ವಿಚಾರ. ಇದು ಕನ್ನಡದಲ್ಲಿ ಇನ್ನಷ್ಟು ಚಿತ್ರಗಳು ಸಿಗುತ್ತವೆ ಎಂಬ ನಿರೀಕ್ಷೆ ಹುಟ್ಟಿಸಿದೆ. -ಇಷಿತಾ ವ್ಯಾಸ್‌, ನಟಿ
* ಪದ್ಮಾ ಶಿವಮೊಗ್ಗ
↧
ದರ್ಶನ್ ಜತೆ ಇಷಿತಾ ರೆಟ್ರೋ ಡ್ಯುಯೆಟ್
↧