ಹ್ಯಾಮಿಲ್ಟನ್‌ಗೆ ಬ್ರೆಜಿಲ್‌ ಕಿರೀಟ

ಫಾರ್ಮುಲಾ ಒನ್‌ ಬ್ರೆಜಿಲಿಯನ ಗ್ರ್ಯಾನ್‌ ಪ್ರಿ ರೇಸ್‌ | ನಿಕೊ ರಾಸ್ಬರ್ಗ್‌ಗೆ ದ್ವಿತೀಯ ಸ್ಥಾನ

ಸಾವೊ ಪಾಲೊ: ಧಾರಾಕಾರ ಮಳೆ ನಡುವೆಯೂ ಅಮೋಘ ಚಾಲನಾ ಸಾಮರ್ಥ್ಯ‌ ಮೆರೆದ ಮರ್ಸಿಡೀಸ್‌ ತಂಡದ ಚಾಲಕ ಬ್ರಿಟನ್‌ನ ಲೂಯಿಸ್‌ ಹ್ಯಾಮಿಲ್ಟನ್‌, ಇಲ್ಲಿ ನಡೆದ ಫಾರ್ಮುಲಾ 1 ಬ್ರೆಜಿಲಿಯನ್‌ ಗ್ರ್ಯಾನ್‌ ಪ್ರಿ ರೇಸ್‌ನಲ್ಲಿ ಪ್ರಶಸ್ತಿ ಮುಡಿಗೇರಿಸಿಕೊಂಡರು.

ಹ್ಯಾಮಿಲ್ಟನ್‌ ಪ್ರಸಕ್ತ ಸಾಲಿನಲ್ಲಿ ಗೆದ್ದ 9ನೇ ಚಾಂಪಿಯನ್‌ಷಿಪ್‌ ಇದಾಗಿದ್ದು, ಈ ಮೂಲಕ ಒಟ್ಟಾರೆ 355 ಅಂಕಗಳೊಂದಿಗೆ ತಮ್ಮ 4ನೇ ವಿಶ್ವ ಚಾಂಪಿಯನ್‌ಷಿಪ್‌ ಗೆಲ್ಲುವತ್ತ ಮುಂದಾಗಿದ್ದಾರೆ. ವೃತ್ತಿ ಜೀವನದ 52ನೇ ಫಾರ್ಮುಲಾ ಒನ್‌ ರೇಸ್‌ ಗೆದ್ದ ಮೂರು ಬಾರಿಯ ವಿಶ್ವ ಚಾಂಪಿಯನ್‌ ಹ್ಯಾಮಿಲ್ಟನ್‌, ಬ್ರೆಜಿಲ್‌ ಅಂಗಣದಲ್ಲಿ ತಮ್ಮ ಚೊಚ್ಚಲ ಗೆಲುವು ದಾಖಲಿಸಿದರು. ಬ್ರೆಜಿಲ್‌ನಲ್ಲಿ ಈ ಹಿಂದಿನ 10 ಪ್ರಯತ್ನಗಳಲ್ಲಿ ಒಮ್ಮೆಯೂ ಹ್ಯಾಮಿಲ್ಟನ್‌ಗೆ ಜಯ ಪ್ರಾಪ್ತಿಯಾಗಿರಲಿಲ್ಲ.

ಮತ್ತೊಂದೆಡೆ ಬ್ರೆಜಿಲಿಯನ್‌ ಜಿಪಿಯಲ್ಲಿ ದ್ವಿತೀಯ ಸ್ಥಾನ ಪಡೆದು ಅಮೂಲ್ಯ 18 ಅಂಕಗಳನ್ನು ಸಂಪಾದಿಸಿರುವ ಮರ್ಸಿಡೀಸ್‌ನ ಮತ್ತೊಬ್ಬ ಚಾಲಕ ಜರ್ಮನಿಯ ನಿಕೊ ರಾಸ್ಬರ್ಗ್‌, ಒಟ್ಟಾರೆ 367 ಅಂಕಗಳೊಂದಿಗೆ ಚೊಚ್ಚಲ ವಿಶ್ವ ಚಾಂಪಿಯನ್‌ಷಿಪ್‌ ಗೆಲ್ಲುವ ಹೊಸ್ತಿಲಲ್ಲಿದ್ದಾರೆ. 2016ರ ಸಾಲಿನ ಕೊನೆಯ ರೇಸ್‌ ಅಬುಧಾಬಿಯಲ್ಲಿ ನವೆಂಬರ್‌ 27 ರಂದು ನಡೆಯಲಿದ್ದು, ವಿಶ್ವಚಾಂಪಿಯನ್‌ ಪಟ್ಟ ಯಾರು ಅಲಂಕರಿಸುತ್ತಾರೆಂಬುದು ಇಲ್ಲಿ ನಿರ್ಧಾರವಾಗಲಿದೆ. ರಾಸ್ಬರ್ಗ್‌ 2ನೇ ಅಥವಾ 3ನೇ ಸ್ಥಾನದಲ್ಲಿ ಅಬುಧಾಬಿ ರೇಸ್‌ ಪೂರೈಸಿದರೂ ನೂತನ ವಿಶ್ವ ಚಾಂಪಿಯನ್‌ ಆಗಿ ಹೊರಹೊಮ್ಮಲಿದ್ದಾರೆ.

ಇಲ್ಲಿನ ಆಟೊಡ್ರೋಮ್‌ ಜೋಸ್‌ ಕಾರ್ಲೊಸ್‌ ಪೇಸ್‌ ಸರ್ಕಿಟ್‌ನಲ್ಲಿ ಭಾನುವಾರ ನಡೆದ ರೇಸ್‌ನಲ್ಲಿ ಸರಾಸರಿ 163.17 ಕಿ.ಮೀ. ವೇಗದಲ್ಲಿ 3 ಗಂಟೆ, 01 ನಿಮಿಷ, 01.335 ಸೆಕೆಂಡ್‌ಗಳಲ್ಲಿ 72 ಲ್ಯಾಪ್‌ಗಳನ್ನು ಮೊದಲಿಗರಾಗಿ ಪೂರೈಸಿದ ಹ್ಯಾಮಿಲ್ಟನ್‌ ಪೋಡಿಯಂ ಮೆಟ್ಟಿಲೇರಿದರು. +11.455 ಸೆಕೆಂಡ್‌ಗಳ ಹಿನ್ನಡೆ ಕಂಡ ರಾಸ್ಬರ್ಗ್‌ ದ್ವಿತೀಯ ಸ್ಥಾನ ಪಡೆದರೆ, ರೆಡ್‌ಬುಲ್‌ ತಂಡದ ಯುವ ಚಾಲಕ ನೆದರ್ಲೆಂಡ್ಸ್‌ನ ಮ್ಯಾಕ್ಸ್‌ ವೆಸ್ಟಾರ್ಪನ್‌ (+21.481 ಸೆ.) ತೃತೀಯ ಸ್ಥಾನ ಪಡೆದರು.

ಫೋರ್ಸ್‌ ಇಂಡಿಯಾ 4ನೇ ಸ್ಥಾನ ಭದ್ರ

ಅಮೋಘ ಪ್ರದರ್ಶನ ನೀಡುತ್ತಿರುವ ಫೋರ್ಸ್‌ ಇಂಡಿಯಾ ತಂಡ ಪ್ರಸಕ್ತ ಸಾಲಿನ ಕಂಸ್ಟ್ರಕ್ಟರ್‌ ವಿಶ್ವ ಚಾಂಪಿಯನ್‌ಷಿಪ್‌ನಲ್ಲಿ 4ನೇ ಸ್ಥಾನವನ್ನು ಭದ್ರಪಡಿಸಿಕೊಂಡಿದೆ. ಬ್ರೆಜಿಲ್‌ ಅಂಗಣದಲ್ಲಿ ಮಳೆಯ ನಡುವೆ ಮಿಂಚಿದ ಫೋರ್ಸ್‌ ಇಂಡಿಯಾ ಚಾಲಕರು ಅತ್ಯಮೂಲ್ಯ 18 ಅಂಕಗಳನ್ನು ತಂದುಕೊಟ್ಟರು. ಮೆಕ್ಸಿಕೊದ ಚಾಲಕ ಸೆರ್ಗಿಯೊ ಪೆರೇಜ್‌, ಮಾಜಿ ಚಾಂಪಿಯನ್‌ ಫೆರಾರಿ ತಂಡದ ಚಾಲಕ ಸೆಬಾಸ್ಟಿಯನ್‌ ವೆಟಲ್‌ ಅವರನ್ನು ಹಿಂದಿಕ್ಕೆ 4ನೇ ಸ್ಥಾನದಲ್ಲಿ ರೇಸ್‌ ಪೂರೈಸುವ ಮೂಲಕ 12 ಅಂಕಗಳನ್ನು ಬಾಚಿಕೊಂಡರು. ಮತ್ತೊಂದೆಡೆ ಜರ್ಮನಿಯ ನಿಕೊ ಹಲ್ಕೇನ್‌ಬರ್ಗ್‌ 7ನೇ ಸ್ಥಾನದಲ್ಲಿ ಗುರಿ ಮುಟ್ಟಿ 6 ಅಂಕಗಳನ್ನು ತಂದುಕೊಟ್ಟರು.

ಈ ಭರ್ಜರಿ ಪ್ರದರ್ಶನದೊಂದಿಗೆ ಫೋರ್ಸ್‌ ಇಂಡಿಯಾ ತಂಡ ಒಟ್ಟಾರೆ 163 ಅಂಕಗಳನ್ನು ಪಡೆಯುವ ಮೂಲಕ ಸಮೀಪದ ಸ್ಪರ್ಧಿ ವಿಲಿಯಮ್ಸ್‌ ತಂಡಕ್ಕಿಂತಲೂ 23 ಅಂಕಗಳ ಮುನ್ನಡೆಯಲ್ಲಿ 4ನೇ ಸ್ಥಾನವನ್ನು ಭದ್ರ ಪಡಿಸಿಕೊಂಡಿದೆ. ಬ್ರೆಜಿಲಿಯನ್‌ ಜಿಪಿ ರೇಸ್‌ನಲ್ಲಿ ವಿಲಿಯಮ್ಸ್‌ ತಂಡ ಒಂದು ಅಂಕವನ್ನೂ ಗಳಿಸಲಿಲ್ಲ. ವಿಲಿಯಮ್ಸ್‌ ಚಾಲಕರಾದ ವಾಲ್ಟರಿ ಬೋಟಾಸ್‌ 11ನೇ ಸ್ಥಾನ ಪಡೆದರೆ, ಆರಂಭಿಕ ಹಂತದಲ್ಲಿಯೇ ಅನುಭವಿ ಫಿಲಿಪೇ ಮಾಸಾ ಅಪಘಾತದಿಂದಾಗಿ ಸ್ಪರ್ಧೆಯಿಂದ ಹೊರಬೀಳುವಂತಾಯಿತು. 2015ರ ಸಾಲಿನಲ್ಲಿ ಫೋರ್ಸ್‌ ಇಂಡಿಯಾ 136 ಅಂಕಗಳೊಂದಿಗೆ 5ನೇ ಸ್ಥಾನ ಪಡೆದಿತ್ತು. ಈಗಾಗಲೆ ನಿವೃತ್ತಿ ಘೋಷಿಸಿರುವ ಮಾಸಾ ತವರಿನಂಗಣದಲ್ಲಿ ತಮ್ಮ ಕೊನೆಯ ರೇಸ್‌ನಲ್ಲಿ ಗುರಿ ಮುಟ್ಟಲು ವಿಫಲರಾದ್ದರಿಂದ ಭಾವುಕರಾದರು.