ಯುಎಫ್‌ಸಿ ಮಿಕ್ಸೆಡ್‌ ಮಾರ್ಷಲಾರ್ಟ್ಸ್ ನ್ಯೂಯಾರ್ಕ್‌: ಮಿಕ್ಸೆಡ್‌ ಮಾರ್ಷಲಾರ್ಟ್ಸ್ನ ಸೂಪರ್‌ ಸ್ಟಾರ್‌ ಕಾನರ್‌ ಮೆಕ್‌ಗ್ರೆಗೊರ್‌, ಅಲ್ಟಿಮೇಟ್‌ ಫೈಟಿಂಗ್‌ ಚಾಂಪಿಯನ್‌ಷಿಪ್‌ನ (ಯುಎಫ್‌ಸಿ) ಎರಡು ವಿಭಾಗಗಳಲ್ಲಿ ವಿಶ್ವ ಚಾಂಪಿಯನ್‌ಷಿಪ್‌ ಗೆದ್ದ ಸಾಧನೆ ಮಾಡಿದ್ದಾರೆ. ಇಲ್ಲಿನ ಮ್ಯಾಡಿಸ್ಸನ್‌ ಸ್ಕ್ವೇರ್‌ ಗಾರ್ಡನ್‌ ಅಂಗಣದಲ್ಲಿ ಶನಿವಾರ ತಡರಾತ್ರಿ ನಡೆದ ಯುಎಫ್‌ಸಿ ಲೈಟ್‌ವೇಟ್‌ ಚಾಂಪಿಯನ್‌ಷಿಪ್‌ ಪಂದ್ಯದಲ್ಲಿ ಮಿಂಚಿದ ಐರ್ಲೆಂಡ್‌ನ ಫೈಟರ್‌ 28 ವರ್ಷದ ಮೆಕ್‌ಗ್ರೆಗೊರ್‌, ನಾಕ್‌ಔಟ್‌ ಮೂಲಕ ಎದುರಾಳಿ ಅಮೆರಿಕದ ಎಡ್ಡಿ ಅಲ್ವಾರೆಜ್‌ ಅವರನ್ನು ಬಗ್ಗುಬಡಿದು ವಿಶ್ವ ಚಾಂಪಿಯನ್‌ಷಿಪ್‌ ಗೆದ್ದುಕೊಂಡರು. ಕಳೆದ ವರ್ಷ ಡಿಸೆಂಬರ್‌ನಲ್ಲಿ ಯುಎಫ್‌ಸಿ ಫೆದರ್‌ವೇಟ್‌ ವಿಶ್ವ ಚಾಂಪಿಯನ್‌ಷಿಪ್‌ ಗೆದ್ದುಕೊಂಡಿದ್ದ ಮೆಕ್‌ಗ್ರೆಗೊರ್‌ ಇದೀಗ ಲೈಟ್‌ವೇಟ್‌ ಗೆಲುವಿನೊಂದಿಗೆ ಎರಡನೇ ಬಾರಿ ವಿಶ್ವ ಚಾಂಪಿಯನ್‌ ಪಟ್ಟ ಅಲಂಕರಿಸಿದ್ದಾರೆ. ಪಂದ್ಯದಲ್ಲಿ ತಮ್ಮ ಬಲಿಷ್ಠ ಪಂಚ್‌ಗಳ ಮೂಲಕ ಎದುರಾಳಿಯ ಎಡಗೈ ಭಾಗದ ಮೇಲೆ ಹೆಚ್ಚಿನ ದಾಳಿ ನಡೆಸಿದ ಕಾನರ್‌, 3 ನಿಮಿಷ 4 ಸೆಕೆಂಡ್‌ಗಳಲ್ಲಿ ಅಮೆರಿಕದ ಆಲ್ವರೆಜ್‌ ಅವರನ್ನು ಹೊಡೆದುರುಳಿಸಿದರು. ''ನನ್ನ ಎರಡನೇ ಬೆಲ್ಟ್‌ (ವಿಶ್ವಚಾಂಪಿಯನ್‌ಷಿಪ್‌ ಬೆಲ್ಟ್‌) ಎಲ್ಲಿ?,'' ಎಂದು ಪಂದ್ಯ ಮುಗಿಯುತ್ತಿದ್ದಂತೆಯೇ ಚೀರುವ ಮೂಲಕ ಮೆಕ್‌ಗ್ರೆಗೋರ್‌ ತಮ್ಮ ಸಂಭ್ರಮವನ್ನು ಮುಗಿಲು ಮುಟ್ಟಿಸಿದ್ದರು. ಮಿಕ್ಸೆಡ್‌ ಮಾರ್ಷಲಾರ್ಟ್ಸ್ನಲ್ಲಿ ಈವರೆಗೆ 24 ಪಂದ್ಯಗಳನ್ನಾಡಿರುವ ಕಾನರ್‌, 21-3ರ ಗೆಲುವಿನ ದಾಖಲೆ ಹೊಂದಿದ್ದಾರೆ. ಅಲ್ಲದೆ ಯುಎಫ್‌ಸಿಯಲ್ಲಿ 9-1ರ ದಾಖಲೆ ಅವರದ್ದಾಗಿದೆ. ಕಳೆದ ಏಪ್ರಿಲ್‌ನಲ್ಲಿ ಬ್ರೆಜಿಲ್‌ನ ರಾಫೆಲ್‌ ಡಾಸ್‌ ಆ್ಯಂಟೊಸ್‌ ಅವರನ್ನು ಮಣಿಸಿ ಯುಎಫ್‌ಸಿ ಲೈಟ್‌ವೇಟ್‌ ವಿಶ್ವ ಚಾಂಪಿಯನ್‌ಷಿಪ್‌ ಗೆದ್ದಿದ 32 ವರ್ಷದ ಅನುಭವಿ ಫೈಟರ್‌ ಆಲ್ವರೆಜ್‌, ಮೆಕ್‌ಗ್ರೆಗೊರ್‌ ಎದುರು ಕಿಂಚಿತ್ತೂ ಹೋರಾಟ ಪ್ರದರ್ಶಿಸಲಾಗದೆ ಸಂಪೂರ್ಣ ಹಿನ್ನಡೆ ಅನುಭವಿಸಿ ಸೋಲುಂಡರು. ಇದರೊಂದಿಗೆ ಯುಎಫ್‌ಸಿ ಚಾಂಪಿಯನ್‌ಷಿಪ್‌ನಲ್ಲಿ ಆಡಿದ 5ನೇ ಪಂದ್ಯದಲ್ಲಿ 2ನೇ ಸೋಲನುಭವಿಸಿದ್ದಾರೆ. ಒಟ್ಟಾರೆ ಮಿಕ್ಸೆಡ್‌ ಮಾರ್ಷಲಾರ್ಟ್ಸ್ನಲ್ಲಿ 28-5ರ ಗೆಲುವಿನ ದಾಖಲೆ ಹೊಂದಿದ್ದಾರೆ.
↧
ಕಾನರ್‌ಗೆ ಡಬಲ್‌ ಚಾಂಪಿಯನ್‌ ಪಟ್ಟ
↧