500/1000 ರೂ. ನೋಟಗಳ ಚಲಾವಣೆಯನ್ನು ರದ್ದುಪಡಿಸಿದ ಬಳಿಕ ಕಪ್ಪುಹಣವನ್ನು ಮರೆಮಾಚಲು ಭಾರಿ ಕುಳಗಳು ಚಿನ್ನ ಖರೀದಿಗೆ ಮುಂದಾಗಿರುವುದರಿಂದ ಕಳೆದೆರಡು ದಿನಗಳಿಂದ ಭರ್ಜರಿ ಚಿನ್ನ ಭಿಕರಿಯಾಗಿದೆ ಎನ್ನಲಾಗಿದೆ. ಈ ಸುಳಿವನ್ನು ಅರಿತಿರುವ ಆದಾಯ ತೆರಿಗೆ ಇಲಾಖೆಯು , ಕಳೆದೆರಡು ದಿನಗಳಿಂದ ಖರೀದಿಯಾಗಿರುವ ಚಿನ್ನದ ವಿವರ ನೀಡುವಂತೆ ಚಿನ್ನದ ವ್ಯಾಪಾರಿಗಳಿಂದ ಮಾಹಿತಿ ಕೇಳಿದೆ. ಅಲ್ಲದೇ ಹೀಗೆ ಅನೇಕ ಕಡೆ ಅಕ್ರಮ ಸಂಪಾದನೆ ರೂಪದಲ್ಲಿ ಚಿನ್ನ ಸಂಗ್ರಹದ ದಾಸ್ತಾನಿದ್ದು, ಅದನ್ನು ಪತ್ತೆ ಹಚ್ಚುವಂತೆ ತೆರಿಗೆ ಇಲಾಖೆಗೆ ಜಾರಿ ನಿರ್ದೇಶನಾಲಯ, ಡೈರಕ್ಟೋರೇಟ್‌ ಜನರಲ್‌ ಆಫ್‌ ಸೆಂಟ್ರಲ್‌ ಎಕ್ಸೈಜ್‌ ಇಂಟೆಲಜೆನ್ಸ್‌ ಕೈಜೋಡಿಸಿವೆ.
ಹೊಸದಿಲ್ಲಿ: ಆದಾಯ ತೆರಿಗೆ ಅಧಿಕಾರಿಗಳು ದೇಶದ ವಿವಿಧೆಡೆ ಚಿನ್ನಾಭರಣ ಮಳಿಗೆಗಳ ಮೇಲೆ ದಾಳಿ ನಡೆಸಿದ ಬೆನ್ನಿಗೇ 42 ಕೋಟಿ ರೂ. ಮೌಲ್ಯದ ಲೆಕ್ಕಕ್ಕೆ ಸಿಗದ ಚಿನ್ನ ಪತ್ತೆಯಾಗಿದೆ. 25 ನಗರಗಳಲ್ಲಿ 250ಕ್ಕೂ ಹೆಚ್ಚು ಚಿನ್ನಾಭರಣ ಮಳಿಗೆಗಳು ಹಾಗೂ ಗಟ್ಟಿ ಚಿನ್ನದ ಸಗಟು ವ್ಯಾಪಾರಿ ಕೇಂದ್ರಗಳ ಮೇಲೆ ದಾಳಿ ನಡೆಸಿದ ವೇಳೆ ಆದಾಯ ತೆರಿಗೆ ಲೆಕ್ಕಕ್ಕೆ ಸಿಗದ 42 ಕೋಟಿ ರೂ. ಮೊತ್ತದ ಅಕ್ರಮ ಚಿನ್ನ ಪತ್ತೆಯಾಗಿದ್ದು, ಅಧಿಕಾರಿಗಳು ಈ ಕುರಿತು ವ್ಯಾಪಾರಿಗಳಿಂದ ವಿವರಣೆ ಪಡೆಯುತ್ತಿದ್ದಾರೆ ಎಂದು ಮೂಲಗಳು ಹೇಳಿವೆ.