ಮನುಷ್ಯ ಆರೋಗ್ಯವಾಗಿರಲು ಶರೀರದಲ್ಲಿ ಉತ್ಪತ್ತಿಯಾಗುವ ಹಾರ್ಮೋನ್‌ ಕೂಡ ಒಂದು ಕಾರಣ. ಗರ್ಭಾಶಯದಲ್ಲಿ ಪಿಂಡವಾಗಿ ರಚನೆಯಾದಾಗಿನಿಂದ ಸಾಯುವಲ್ಲಿವರೆಗೂ ಶರೀರದಲ್ಲಿ ಹಾರ್ಮೋನ್‌ನ ಪ್ರಭಾವ ಇರುತ್ತದೆ.
ಶರೀರದಲ್ಲಿ ಒಂದು ಕಣದಿಂದ ಇನ್ನೊಂದು ಕಣಕ್ಕೆ ರಾಸಾಯನಿಕದ ಬಗ್ಗೆ ಸಂಕೇತವನ್ನು ತಿಳಿಸುವ ಕೆಮಿಕಲ್ಸ್‌ಗಳನ್ನು ಹಾರ್ಮೋನ್‌ ಎನ್ನುತ್ತಾರೆ. ಮಿದುಳಿನ ಭಾಗದಲ್ಲಿ ಹೈಪೋಡೆಲಾಮಸ ಮತ್ತು ಪಿಟ್ಯುಟರಿ ಗ್ರಂಥಿಗಳು ಹಾರ್ಮೋನ್‌ ಉತ್ಪಾದನೆ ಮಾಡುತ್ತದೆ. ಈ ಹಾರ್ಮೋನ್‌ಗಳು ಶರೀರದ ಉಷ್ಣತೆ, ಹಸಿವು, ಮಾನಸಿಕ ಸ್ಥಿತಿ, ನಿದ್ರೆ, ಬಾಯಾರಿಕೆ, ಕಾಮ, ಕ್ರೋಧವನ್ನು ನಿಯಂತ್ರಿಸುತ್ತದೆ. ಈ ಮಧ್ಯೆ ಹೈಪೋಥೈರಾಯ್ಡಿಸಂ, ಪಿಸಿಒಡಿ, ಬಂಜೆತನ ಹಾಗೂ ಮಧುಮೇಹಗಳಂತಹ ದೀರ್ಘಕಾಲಿಕ ರೋಗಗಳು ಹಾರ್ಮೋನ್‌ ಅಸಮತೋಲನೆಯಿಂದ ಬರುತ್ತವೆ.
ಹಾರ್ಮೋನ್‌ಗಳು ಪಾಲಿಪೆಪ್‌ಟೈಡ್‌ನಿಂದ ನಿರ್ಮಿತವಾದ ರಾಸಾಯನಿಕ ವಾಹಕಗಳು. ಇವು ಶರೀರದ ಒಂದು ಪ್ರಾಂತ್ಯದ ಅಂಗಾಂಶದಿಂದ ಉತ್ಪತ್ತಿಯಾಗಿ ಶರೀರದ ವಿವಿಧ ಭಾಗಗಳಿಗೆ ರಕ್ತದ ಮೂಲಕ ಹರಿದು ನಿರ್ದಿಷ್ಟ ಭಾಗಗಳ ಮೇಲೆ ಪ್ರಭಾವ ಬೀರಿ ಜೀವನ ಪ್ರಕ್ರಿಯೆಯನ್ನು ಸಮತೋಲನ ಮಾಡುತ್ತವೆ. ಈ ಹಾರ್ಮೋನ್‌ ಸಮತೋಲನ ಸರಿಯಾಗಿಲ್ಲದಲ್ಲಿ ದೀರ್ಘಕಾಲಿಕ ವ್ಯಾಧಿಗಳಿಂದ ಬಳಲುತ್ತಾರೆ.
ಈ ಹಾರ್ಮೋನ್‌ಗಳು ಎಂಡೊಕ್ರೈನ್‌, ಎಕ್ಸೋಕ್ರೈನ್‌ ಗ್ರಂಥಿಗಳಿಂದ ಉತ್ಪಾದನೆಯಾಗಿ ಶರೀರದಲ್ಲಿ ಇವುಗಳ ಪ್ರಭಾವ ಹೆಚ್ಚಾಗುತ್ತದೆ. ಇದರಿಂದ ಸಾಧಾರಣ ಜೀವನ ಕ್ರಿಯೆಗಳಾದ ಜೀರ್ಣಕ್ರಿಯೆ, ಶಾರೀರಿಕ, ಮಾನಸಿಕ ಸಮತೋಲನಗಳಿಗೆ ಸಹಾಯ ಮಾಡುತ್ತವೆ.
ಥೈರಾಯ್ಡ್‌ ಹಾರ್ಮೋನ್‌ಗಳು ಟಿ 3, ಟಿ 4 ಥೈರಾಯ್ಡ್‌ ಗ್ರಂಥಿಯಿಂದ ಉತ್ಪತ್ತಿಯಾಗುತ್ತದೆ. ಇವುಗಳ ಅಸಮತೋಲನದಿಂದ ಹೈಪರ್‌ಥೈರಾಯ್ಡಿಸಂ, ಹೈಪೋಥೈರಾಯ್ಡಿಸಂ ಹಾಗೂ ಗೊಯಟರ್‌ನಂತಹ ದೀರ್ಘಕಾಲಿಕ ರೋಗಗಳು ಬರುತ್ತವೆ.
ಸ್ತ್ರೀಯರಲ್ಲಿ ಹಾರ್ಮೋನ್‌ ಸಮಸ್ಯೆ
ಈಸ್ಟ್ರೋಜನ್‌, ಪ್ರೊಜೆಸ್ಟ್ರನ್‌, ಪ್ರೊಲ್ಯಾಕ್ಟಿನ್‌, ಆರ್ಸೆಟೋಸಿನ್‌ ಹಾರ್ಮೋನ್‌ಗಳು ್ತ ಸ್ತ್ರೀಯರಲ್ಲಿ ಸಂತಾನೋತ್ಪತ್ತಿ, ಪ್ರಸವದಲ್ಲಿ ಸಹಾಯ ಮಾಡುತ್ತವೆ. ಈ ಹಾರ್ಮೋನ್‌ ಅಸಮತೋಲನದಿಂದ ಸ್ತ್ರೀಯರಲ್ಲಿ ಋುತುಚಕ್ರ ಸಮಸ್ಯೆ, ಬಂಜೆತನ, ಅನಗತ್ಯ ಕೂದಲು ಉದುರುವಿಕೆ ಸಮಸ್ಯೆಗಳು ಬರುತ್ತವೆ. ಸ್ತ್ರೀಯರಲ್ಲಿ ಮೆನೊಪಾಸ್‌, ಋುತುಚಕ್ರ ಬರುವ ಸಮಯದಲ್ಲಿ ಹಾರ್ಮೋನ್‌ ಅಸಮತೋಲನೆಯಿಂದ ಅಶಾಂತಿ, ಕೀಲು ನೋವು, ಉದ್ವೇಗ, ಮಾನಸಿಕ ಏರಿಳಿತಗಳು ಕಾಣಿಸಿಕೊಳ್ಳುತ್ತವೆ.
ಪುರುಷರಲ್ಲಿ ಹಾರ್ಮೋನ್‌ ಸಮಸ್ಯೆ
ಗಂಡಸರಲ್ಲಿ ಮುಖ್ಯವಾಗಿ ಟೆಸ್ಟೊಸ್ಟಿರಾನ್‌ ಎನ್ನುವ ಹಾರ್ಮೋನ್‌ ಉತ್ಪತ್ತಿಯಿಂದ ಮೂಳೆ ಸಾಂದ್ರತೆ, ಸ್ನಾಯುಶಕ್ತಿ, ವೀರ್ಯಾಣುಗಳ ಉತ್ಪಾದನೆಗೆ ಸಹಾಯವಾಗುತ್ತದೆ. ಈ ಟೆಸ್ಟೊಸ್ಟಿರಾನ್‌ ಲೋಪದಿಂದ ಲೈಂಗಿಕ ಸಮಸ್ಯೆಗಳು, ಸ್ನಾಯುಶಕ್ತಿ, ಖಿನ್ನತೆ, ಟೈಪ್‌ 2 ಮಧುಮೇಹ ಅಷ್ಟೇ ಅಲ್ಲ ಎಲ್‌ಎಚ್‌ ಮತ್ತು ಎಫ್‌ಎಸ್‌ಎಚ್‌ ಹಾರ್ಮೋನ್‌ ಕೊರತೆಯಿಂದ ಹೈಪೋಗೊನೆಡಿಸಮ್‌ ಬರುವ ಸಾಧ್ಯತೆ ಇದೆ. ಟೆಸ್ಟೊಸ್ಟಿರಾನ್‌ ಹಾರ್ಮೋನ್‌ ಅಸಮತೋಲನದಿಂದ ಅಂಗಸ್ತಂಭನ, ಶೀಘ್ರ ಸಖ್ಖಲನ ಸಮಸ್ಯೆ, ವೀರ್ಯಾಣುಗಳ ಲೋಪ, ಬಂಜೆತನ ಸಮಸ್ಯೆಗಳು ಬರುತ್ತವೆ. ಮಕ್ಕಳಲ್ಲಿ ಬೆಳವಣಿಗೆ ಮತ್ತು ತೂಕದ ಸಮಸ್ಯೆಗಳು ಬರುತ್ತವೆ.
ಹೋಮಿಯೋಪಥಿ ಚಿಕಿತ್ಸೆ
ಹಾರ್ಮೋನ್‌ಗಳ ಪ್ರಭಾವ ಶರೀರದಲ್ಲಿ ಬಹಳಷ್ಟು ಇದೆ. ಥೈರಾಯ್ಡ್‌ ಸಮಸ್ಯೆಯಿಂದ ಬಳಲುವವರು ಜೀವನಪೂರ್ತಿ ಔಷಧಗಳನ್ನು ಸೇವಿಸಬೇಕೆಂದು ತಿಳಿದುಕೊಂಡಿರುತ್ತಾರೆ. ಅಷ್ಟೇ ಅಲ್ಲ ಔಷಧಗಳನ್ನು ನಿಲ್ಲಿಸಿದರೆ ಸಮಸ್ಯೆ ಹೆಚ್ಚಾಗುವ ಸಾಧ್ಯತೆ ಇದೆ ಎಂದುಕೊಳ್ಳುತ್ತಾರೆ. ಥೈರಾಯ್ಡ್‌ ಸಮಸ್ಯೆ ಅಲ್ಲದೆ ಇತರೆ ಹಾರ್ಮೋನ್‌ ಸಮಸ್ಯೆಗಳನ್ನು ಪರಿಹರಿಸಲು ಹೋಮಿಯೋಪಥಿಯಲ್ಲಿ ಒಳ್ಳೆಯ ಔಷಧ ಇದೆ.
ಹೋಮಿಯೋಪಥಿಯಲ್ಲಿ ರೋಗಿಯ ಮುಖ್ಯವಾಗಿ ಶಾರೀರಿಕ, ಮಾನಸಿಕ, ಅನುವಂಶಿಕ ಕಾರಣಗಳನ್ನು ತಿಳಿದುಕೊಂಡು ಚಿಕಿತ್ಸೆ ನೀಡಲಾಗುತ್ತದೆ. ಉದಾಹರಣೆಗೆ ಥೈರಾಯ್ಡ್‌, ಕ್ಯಾಲಕೇರಿಯ, ಕರಾಬ್‌, ಐಯೋಡಮ್‌, ಬ್ರೋಮಿಯಮ್‌ ಹೀಗೆ ಇತರೆ ಸಮಸ್ಯೆಗಳಿಗೆ ಹೋಮಿಯೋಪಥಿಯಲ್ಲಿ ಒಳ್ಳೆಯ ಔಷಧಗಳಿವೆ. ಇವುಗಳನ್ನು ನುರಿತ ವೈದ್ಯರ ಸಲಹೆ ಮೇರೆಗೆ ತೆಗೆದುಕೊಳ್ಳಬಹುದು.
ನನ್ನ ಮಗಳು ರಮ್ಯಾಗೆ (24 ವರ್ಷ) ಹಾರ್ಮೋನ್‌ ಏರುಪೇರಿನಿಂದ ಋುತುಚಕ್ರ ಸರಿಯಾಗಿ ಆಗುತ್ತಿಲ್ಲ ಎಂದು ವೈದ್ಯರು ಹೇಳಿದ್ದಾರೆ. ಇದರಿಂದ ಆಕೆಯ ದೇಹದ ತೂಕ ಹೆಚ್ಚಾಗುತ್ತಿದೆ. ಇದಕ್ಕೆ ಹೋಮಿಯೋಪಥಿಯಲ್ಲಿ ಚಿಕಿತ್ಸೆ ಇದೆಯೇ?