ಬೆಂಗಳೂರು: ಟಿಪ್ಪು ಸುಲ್ತಾನ್‌ ಜಯಂತಿ ಆಚರಣೆಯನ್ನು ಸರಕಾರದ ವತಿಯಿಂದ ನಡೆಸಲು ಅಡ್ಡಿಪಡಿಸುತ್ತಿರುವ ವಿಶ್ವ ಹಿಂದೂ ಪರಿಷತ್‌ ಮುಖಂಡ ಗೋಪಾಲ್‌ ವಿರುದ್ಧ ಕಾನೂನು ಕ್ರಮ ಜರುಗಿಸುವಂತೆ ಟಿಪ್ಪು ಸುಲ್ತಾನ್‌ ಸಂಯುಕ್ತ ರಂಗ ಆಗ್ರಹಿಸಿದೆ. ''ಜಾತ್ಯತೀತ ವ್ಯಕ್ತಿಯಾಗಿದ್ದ ಟಿಪ್ಪು ಸುಲ್ತಾನ್‌ ಯಾವುದೇ ಒಂದು ವರ್ಗಕ್ಕೆ ಸೀಮಿತರಾದವರಲ್ಲ. ಇದನ್ನು ಎಲ್ಲಾ ಧರ್ಮದವರೂ ಅರಿಯಬೇಕು. ಜನರ ನಡುವಿನ ಸೌಹಾರ್ದತೆಗೆ ಧಕ್ಕೆ ತರುವ ಹಾಗೂ ಸಮಾಜದಲ್ಲಿ ಶಾಂತಿ ಕದಡುವ ರೀತಿಯಲ್ಲಿ ಯಾರೂ ನಡೆದುಕೊಳ್ಳಬಾರದು. ಟಿಪ್ಪು ಕುರಿತಾಗಿ ಏನೇ ಟೀಕೆಗಳು ಬಂದರೂ, ಯಾರೇ ವಿರೋಧಿಸಿದರೂ ಜಯಂತಿ ಆಚರಣೆ ನಡೆದೇ ನಡೆಯುತ್ತದೆ,''ಎಂದು ಅಹಿಂದ ಮುಖಂಡ ಪ್ರೊ. ಎನ್‌.ವಿ. ನರಸಿಂಹಯ್ಯ ಪತ್ರಿಕಾಗೋಷ್ಠಿಯಲ್ಲಿ ಬುಧವಾರ ತಿಳಿಸಿದರು. ಹಿರಿಯ ನ್ಯಾಯವಾದಿ ಪಿ.ಎಸ್‌. ಶ್ರೀಧರಮೂರ್ತಿ ಮಾತನಾಡಿ, ''ಕೋಮುವಾದಿಗಳಿಗೆ ಇತಿಹಾಸ ತಿರುಚುವುದೇ ಒಂದು ಕಾಯಕವಾಗಿದೆ. ಜನರಲ್ಲಿ ಟಿಪ್ಪು ಹಿಂಸಾವಾದಿ, ಕೆಟ್ಟವನೆಂಬ ವಿಷ ಬೀಜ ಬಿತ್ತಲಾಗುತ್ತಿದೆ. ಇದು ಸರಿಯಲ್ಲ,''ಎಂದರು. ಟಿಪ್ಪು ಸುಲ್ತಾನ್‌ ಸಂಯುಕ್ತ ರಂಗದ ಕಾರ್ಯದರ್ಶಿ ದಾವೂದ್‌ ಇಕ್ಬಾಲ್‌ ಮಾತನಾಡಿ, ''ಟಿಪ್ಪುವನ್ನು ಮುಸ್ಲಿಮ್‌ ಎಂದು ನೋಡದೆ ದೊರೆಯಾಗಿ ಅವರು ಮಾಡಿರುವ ಒಳ್ಳೆಯ ಕಾರ್ಯಗಳನ್ನು ಪರಿಗಣಿಸಬೇಕು,'' ಎಂದು ಹೇಳಿದರು. ಗೋಷ್ಠಿಯಲ್ಲಿ ದಲಿತ ಕ್ರಿಶ್ಚಿಯನ್‌ ಫೆಡರೇಷನ್‌ ಸಂಚಾಲಕ ಡಾ.ರೆ. ಮನೋಹರ್‌ ಚಂದ್ರಪ್ರಸಾದ್‌, ರಾಜ್ಯ ಟಿಪ್ಪು ಸುಲ್ತಾನ್‌ ಸಂಯುಕ್ತ ರಂಗದ ಸರ್ದಾರ್‌ ಅಹ್ಮದ್‌ ಖುರೇಶಿ, ಕೆಎಸ್‌ಎಸ್‌ಡಿ ಮಹಿಳಾ ಮೋರ್ಚಾ ಅಧ್ಯಕ್ಷೆ ಕಮಲಮ್ಮ, ರಾಜ್ಯ ದಲಿತ ಮತ್ತು ಮೈನಾರಿಟಿ ಸೇನೆ ಅಧ್ಯಕ್ಷ ಜನಾಬ್‌ ಎ.ಜೆ. ಖಾನ್‌ ಮತ್ತಿತರರು ಉಪಸ್ಥಿತರಿದ್ದರು.
↧
ಟಿಪ್ಪು ಜಯಂತಿ ಆಚರಣೆಗೆ ಅಡ್ಡಿಪಡಿಸುವವರ ವಿರುದ್ಧ ಕ್ರಮಕ್ಕೆ ಆಗ್ರಹ
↧