ಚೀನಾ ಹಾಗೂ ಹಾಂಕಾಂಗ್‌ ಸೂಪರ್‌ ಸಿರೀಸ್‌ನಲ್ಲಿ ಪಾಲ್ಗೊಳ್ಳುವ ಕಾರಣ ಹೊಸದಿಲ್ಲಿ: ಚೀನಾ ಹಾಗೂ ಹಾಂಕಾಂಗ್‌ನಲ್ಲಿ ನಡೆಯಲಿರುವ ಸೂಪರ್‌ ಸಿರೀಸ್‌ ಬ್ಯಾಡ್ಮಿಂಟನ್‌ನಲ್ಲಿ ಪಾಲ್ಗೊಳ್ಳಬೇಕಾಗಿರುವುದರಿಂದ ಭಾರತದ ಬ್ಯಾಡ್ಮಿಂಟನ್‌ ತಾರೆ ಸೈನಾ ನೆಹ್ವಾಲ್‌ ಅಂತಾರಾಷ್ಟ್ರೀಯ ಒಲಿಂಪಿಕ್ಸ್‌ ಸಮಿತಿಯ ಅಥ್ಲೀಟ್‌ ಕಮಿಷನ್‌ನ ಸಭೆಯಲ್ಲಿ ಪಾಲ್ಗೊಳ್ಳುವುದಿಲ್ಲ. ಐಒಸಿ ಅಧ್ಯಕ್ಷ ಥಾಮಸ್‌ ಬ್ಯಾಷ್‌ ಕಳೆದ ತಿಂಗಳು ಸೈನಾ ಅವರನ್ನು ಐಒಸಿ ಅಥ್ಲೀಟ್‌ ಕಮಿಷನ್‌ಗೆ ಸೇರ್ಪಡೆಗೊಳಿಸಿದ್ದರು. ಮೊದಲ ಸಭೆಯಲ್ಲಿ ಪಾಲ್ಗೊಳ್ಳಲು ಸಾಧ್ಯವಾಗುತ್ತಿಲ್ಲ ಎಂಬುದನ್ನು ಸೈನಾ ಭಾರತೀಯ ಒಲಿಂಪಿಕ್ಸ್‌ ಸಮಿತಿಯ ಮೂಲಕ ಐಒಸಿಗೆ ಮನವಿ ಮಾಡಿಕೊಂಡಿದ್ದಾರೆ. ''ಲುಸಾನ್ನೆಯಲ್ಲಿ ನವೆಂಬರ್‌ 6 ರಿಂದ 11ರವರೆಗೆ ನಡೆಯಲಿರುವ ಐಒಸಿ ಅಥ್ಲೀಟ್‌ ಕಮಿಷನ್‌ನ ಚೊಚ್ಚಲ ಸಭೆಯಲ್ಲಿ ಪಾಲ್ಗೊಳ್ಳಲು ಆಹ್ವಾನ ಬಂದಿದೆ. ಆದರೆ ಈ ಸಭೆಯಲ್ಲಿ ಪಾಲ್ಗೊಳ್ಳಲು ಆಗುತ್ತಿಲ್ಲ. ಚೀನಾ ಹಾಗೂ ಹಾಂಕಾಂಗ್‌ ಸೂಪರ್‌ ಸಿರೀಸ್‌ನಲ್ಲಿ ಪಾಲ್ಗೊಳ್ಳುತ್ತಿರುವುದೇ ಇದಕ್ಕೆ ಕಾರಣ. ಈ ವಿಷಯವನ್ನು ಐಒಸಿಗೆ ತಿಳಿಸಬೇಕಾಗಿ ವಿನಂತಿಸುತ್ತೇನೆ, '' ಎಂದು ಭಾರತೀಯ ಒಲಿಂಪಿಕ್ಸ್‌ ಸಮಿತಿಯ ಕಾರ್ಯದರ್ಶಿ ರಾಜೀವ್‌ ಮೆಹ್ತಾಗೆ ಬರೆದ ಪತ್ರದಲ್ಲಿ ತಿಳಿಸಿದ್ದಾರೆ. ಚೀನಾ ಸೂಪರ್‌ ಸಿರೀಸ್‌ ಬ್ಯಾಡ್ಮಿಂಟನ್‌ ನವೆಂಬರ್‌ 15 ರಿಂದ 20 ಹಾಗೂ ಹಾಂಕಾಂಗ್‌ ಓಪನ್‌ ನವೆಂಬರ್‌ 22 ರಿಂದ 27ರವರೆಗೆ ನಡೆಯಲಿದೆ. 2012ರ ಲಂಡನ್‌ ಒಲಿಂಪಿಕ್ಸ್‌ನಲ್ಲಿ ಕಂಚಿನ ಪದಕ ಗೆದ್ದಿರುವ ಸೈನಾ, ಐಒಸಿ ಅಥ್ಲೀಟ್‌ ಕಮಿಷನ್‌ನಲ್ಲಿ ಸದಸ್ಯತದ ಗೌರವ ಸಿಕ್ಕಿರುವುದು ಹೆಮ್ಮೆಯ ಸಂಗತಿ ಸಂಗತಿ ಎಂದಿದ್ದಾರೆ. ಬೆಂಗಳೂರಿನಲ್ಲಿ ಮಂಗಳವಾರ ನಡೆದ ಕಾರ್ಯಕ್ರಮವೊಂದರಲ್ಲಿ ಒಲಿಂಪಿಯನ್‌ ಸೈನಾ ನೆಹ್ವಾಲ್‌ ಅವರನ್ನು ಸನ್ಮಾನಿಸಲಾಯಿತು.
↧
ಅಥ್ಲೀಟ್‌ ಕಮಿಷನ್‌ ಸಭೆಗೆ ಸೈನಾ ಗೈರು
↧