ಧೀರ ಯೋಧರಿಗೆ ಸಲಾಂ ಎಂದ ಅಮಿತಾಭ್

74ನೇ ವಸಂತಕ್ಕೆ ಕಾಲಿರಿಸಿದ ಬಿಗ್ ಬಿ

ಮುಂಬಯಿ: ಉಗ್ರ ದಾಳಿಗಳ ಹಿನ್ನೆಲೆಯಲ್ಲಿ ಸೈನಿಕರ ಆತ್ಮಸ್ಥೈರ್ಯ ಕುಂದಿಸುವ ಹೇಳಿಕೆಗಳನ್ನು ಉಗ್ರ ಮಾತುಗಳಲ್ಲಿ ಖಂಡಿಸೋಣ, ರಾಜಕೀಯ ಭಿನ್ನಮತಗಳು ಏನೇ ಇರಲಿ ಎಲ್ಲವನ್ನೂ ಮರೆತು ನಾವೆಲ್ಲರೂ ದೇಶದ ಗಡಿ ಕಾಯುವ ಯೋಧರ ಬೆಂಬಲಕ್ಕೆ ನಿಲ್ಲೋಣ.....

ಹೀಗೆಂದು ಬಾಲಿವುಡ್ ಬಿಗ್ ಬಿ ಅಮಿತಾಭ್ ಬಚ್ಚನ್ ತಮ್ಮ ಮನದ ಮಾತನ್ನು ಹೇಳಿದ್ದಾರೆ.

ಆದರೆ, ಪಾಕ್ ಕಲಾವಿದರಿಗೆ ಹೇರಲಾಗಿರುವ ನಿರ್ಬಂಧದ ಬಗ್ಗೆ ಪ್ರತಿಕ್ರಿಯೆ ನೀಡುವ ಸಮಯ ಇದಲ್ಲ ಎಂದವರು ತಿಳಿಸಿದ್ದಾರೆ.

74ನೇ ವಸಂತಕ್ಕೆ ಕಾಲಿಸಿರಿಸಿದ ಅಮಿತಾಭ್ ಅವರಿಗೆ ಜನ್ಮದಿನದ ನಿಮಿತ್ತ ದೇಶದೆಲ್ಲೆಡೆಯಿಂದ ಶುಭಾಶಯಗಳ ಮಹಾಪೂರವೇ ಹರಿದುಬಂದಿದೆ. ಜುಹುವಿನಲ್ಲಿರುವ ತಮ್ಮ ನಿವಾಸದ ಮುಂದೆ ಜಮಾಯಿಸಿದ್ದ ಅಭಿಮಾನಿಗಳಿಗೆ ಕೈ ಬೀಸಿದ ಅವರು ಸುದ್ದಿಗೋಷ್ಠಿಯಲ್ಲಿ ಮಾಧ್ಯಮಗಳಿಗೆ ಮುಖಾಮುಖಿಯಾದರು.

‘‘ನನ್ನ ಜನ್ಮದಿನ ಉತ್ಸವವಲ್ಲ. ಪ್ರತಿಬಾರಿಯೂ ಸರಳವಾಗಿ ಆಚರಿಸಿಕೊಳ್ಳಲು ಇಷ್ಟಪಡುತ್ತೇನೆ. ಆದರೆ ಕೆಲವೊಮ್ಮೆ ಅಭಿಮಾನಿಗಳ ಹಾಗೂ ಹಿತೈಷಿಗಳ ಒತ್ತಡಕ್ಕೆ ಮಣಿಯಬೇಕಾಗುತ್ತದೆ,’’ ಎನ್ನುತ್ತಾ ಅಭಿಮಾನಿಗಳ ಸಂಭ್ರಮಕ್ಕೆ ದನಿಯಾದರು.

ನಿಮ್ಮೊಂದಿಗಿದ್ದೇವೆ:

‘‘ಕಾಶ್ಮೀರದ ಉರಿ ಸೇನಾ ನೆಲೆ ಮೇಲೆ ಉಗ್ರರು ನಡೆಸಿದ ದಾಳಿಗೆ ಭಾರತ ಪಿಒಕೆಗೆ ನುಗ್ಗಿ ಸರ್ಜಿಕಲ್ ದಾಳಿ ನಡೆಸುವ ಮೂಲಕ ಸೇಡು ತೀರಿಸಿಕೊಂಡಿದೆ. ಇದೀಗ ನಾವು ನಿಮ್ಮೊಂದಿಗೆ ಇದ್ದೇವೆ. ತಮ್ಮ ಜೀವದ ಹಂಗು ತೊರೆದು ಗಡಿಯಲ್ಲಿ ಶತ್ರು ಪಾಳಯದ ವಿರುದ್ಧ ಹೋರಾಡುವ ನಮ್ಮ ಯೋಧರ ಆತ್ಮವಿಶ್ವಾಸ ಹೆಚ್ಚಿಸುವ ಕೆಲಸ ಮಾಡಬೇಕೇ ವಿನಾ ಇಲ್ಲ ಸಲ್ಲದ ಹೇಳಿಕೆಗಳನ್ನು ನೀಡಿ ಅವರ ಮನೋಬಲ ಕುಂದಿಸುವ ಕೆಲಸ ಮಾಡಬಾರದು. ರಾಜಕೀಯ ಭಿನ್ನಾಭಿಪ್ರಾಯಗಳು ಏನೇ ಇದ್ದರೂ, ಇಂತಹ ಸಂದರ್ಭದಲ್ಲಿ ಅವೆಲ್ಲವನ್ನೂ ಬದಿಗೊತ್ತಿ ನಾವು ಯೋಧರ ಧೀರ ಹೋರಾಟಕ್ಕೆ ಬೆಂಬಲ ಸೂಚಿಸಬೇಕು. ಅವರ ಜತೆಗೆ ನಿಲ್ಲಬೇಕು. ಅಂತಹ ಸಮಯ ಈಗ ಬಂದಿದೆ,’’ ಎಂದು ಹೇಳಿದರು.

ಎಲ್ಲ ಕಲಾವಿದರನ್ನೂ ಗೌರವಿಸುತ್ತೇನೆ: ಒಂದು ಹಂತದಲ್ಲಿ ಮಾಧ್ಯಮ ಮಿತ್ರರತ್ತ ಕೈಮುಗಿದ ಅವರು, ‘‘ಇದೊಂದು ಸಂತೋಷದ ಸಮಯ. ಪಾಕ್ ಕಲಾವಿದರ ನಿರ್ಬಂಧದ ಬಗ್ಗೆ ಪ್ರಶ್ನೆಗಳನ್ನು ಕೇಳಬೇಡಿ. ಅದಕ್ಕೆ ಪ್ರತಿಕ್ರಿಯೆ ನೀಡುವ ಸಮಯ ಇದಲ್ಲ. ಆದರೆ ಒಂದಂತೂ ಸ್ಪಷ್ಟಪಡಿಸುತ್ತೇನೆ. ನಾನು ಎಲ್ಲ ಕಲಾವಿದರನ್ನೂ ಗೌರವಿಸುತ್ತೇನೆ,’’ ಎಂದು ಹೇಳಿದರು.

ಶುಭಾಶಯಗಳ ಸುರಿಮಳೆ:

ಪ್ರಧಾನಿ ನರೇಂದ್ರ ಮೋದಿ, ಕೇಂದ್ರ ಸಚಿವರಾದ ರಾಜನಾಥ್ ಸಿಂಗ್, ವೆಂಕಯ್ಯ ನಾಯ್ಡು, ಕ್ರಿಕೆಟಿಗ ವೀರೇಂದ್ರ ಸೆಹ್ವಾಗ್, ನಿರ್ದೇಶಕ ರಾಮ್‌ಗೋಪಾಲ್ ವರ್ಮಾ, ನಟ ಅರ್ಜುನ್ ರಾಮ್‌ಪಾಲ್ ಸೇರಿದಂತೆ ಸೆಲೆಬ್ರಿಟಿಗಳ ದಂಡೇ ‘ಬಿಗ್ ಬಿ’ಗೆ ಶುಭಾಶಯ ಕೋರಿದೆ.

@ narendra modi

Dear @SrBachchan, wishing you a very happy birthday. Your versatility & humility has many admirers. Praying for your long & healthy life.

@rampalarjun

Happy birthday @SrBachchan thank you for being such an inspiration, for setting such high standards. Love you always #thelegend.