ಹೊಸದಿಲ್ಲಿ: ಪಾಕಿಸ್ತಾನ ಮೂಲದ ಮೂರು ಭಯೋತ್ಪಾದಕ ಸಂಘಟನೆಗಳಿಗೆ ಸೇರಿದ ಕನಿಷ್ಠ 250 ಉಗ್ರರು ಕಾಶ್ಮೀರ ಕಣಿವೆಯ ಸುತ್ತಮುತ್ತ ಸಕ್ರಿಯರಾಗಿದ್ದು, ಸರ್ಜಿಕಲ್ ದಾಳಿಗೆ ಸೇಡು ತೀರಿಸಿಕೊಳ್ಳಲು ಹೊಂಚು ಹಾಕುತ್ತಿದ್ದಾರೆ. ಈ ಉಗ್ರರು ಭಾರತದ ಭದ್ರತಾ ಪಡೆಗಳ ಮೇಲೆ ಎರಗುವ ಎಲ್ಲಾ ಸಾಧ್ಯತೆ ಇದೆ ಎಂಬ ಗುಪ್ತಚರ ಮಾಹಿತಿಯನ್ನು ಕೇಂದ್ರ ಸರಕಾರ ಮಂಗಳವಾರ ಹೊರಹಾಕಿದೆ.
ಲಷ್ಕರೆ ತೊಯ್ಯಿಬಾ, ಜೈಷೆ ಮೊಹಮ್ಮದ್ ಮತ್ತು ಹಿಜ್ಬುಲ್ ಮುಜಾಹಿದ್ದೀನ್ ಸಂಘಟನೆಗಳಿಗೆ ಸೇರಿದ ಸುಮಾರು 250 ಉಗ್ರರು, ಸರ್ಜಿಕಲ್ ದಾಳಿಗಿಂತ ಸಾಕಷ್ಟು ಮುಂಚಿತವಾಗಿಯೇ ಭಾರತದ ಗಡಿಯೊಳಗೆ ನುಸುಳಿದ್ದು, ಕಾಶ್ಮೀರ ಕಣಿವೆಯ ನಾನಾ ಕಡೆ ಅಡಗಿಕೊಂಡಿದ್ದಾರೆ ಎಂದು ಗುಪ್ತಚರ ಅಧಿಕಾರಿಗಳು ಸುಳಿವು ನೀಡಿದ್ದಾರೆ.
ಸರ್ಜಿಕಲ್ ದಾಳಿ ನಡೆಸಿರುವ ಭಾರತೀಯ ಸೇನಾಪಡೆಗಳ ಮೇಲೆ ಸೇಡು ತೀರಿಸಿಕೊಳ್ಳುವಂತೆ ಈ ಉಗ್ರರಿಗೆ ಸ್ಪಷ್ಟ ಸೂಚನೆ ನೀಡಲಾಗಿದೆ. ಪಾಕ್ ಮೂಲದ ಉಗ್ರ ಸಂಘಟನೆಗಳು ಈ ಸೂಚನೆ ನೀಡಿವೆ.
ಈ ನಿಟ್ಟಿನಲ್ಲಿ ಗರಿಷ್ಟ ಕಟ್ಟೆಚ್ಚರ ವಹಿಸುವಂತೆ ಕೇಂದ್ರ ಸರಕಾರವು ಜಮ್ಮು-ಕಾಶ್ಮೀರದ ಭದ್ರತಾ ಪಡೆಗಳಿಗೆ ತಿಳಿಸಲಾಗಿದೆ. ಯಾವುದೇ ರೀತಿಯ ಪ್ರತಿಕಾರಗಳಿಗೆ ಸರ್ವಸನ್ನದ್ಧವಾಗಿರುವಂತೆ ಹಾಗೂ ಎಲ್ಲಾ ಮುನ್ನಚ್ಚರಿಕೆ ಕ್ರಮಗಳನ್ನು ತೆಗೆದುಕೊಳ್ಳುವಂತೆ ಅದು ನಿರ್ದೇಶನ ನೀಡಿದೆ.
ಗಡಿ ನಿಯಂತ್ರಣ ರೇಖೆ ಮತ್ತು ಅಂತಾರಾಷ್ಟ್ರೀಯ ಗಡಿಯಲ್ಲಿ ಭಾರತೀಯ ಭದ್ರತಾ ಪಡೆಗಳು ತೀವ್ರ ನಿಗಾ ವಹಿಸಿದ್ದರೂ, ಕೆಲವು ದುರ್ಗಮ ಗಡಿ ಪ್ರದೇಶಗಳಲ್ಲಿ ಭದ್ರತೆಯ ಕೊರತೆ ಇದೆ. ಇಂತಹ ಸ್ಥಳಗಳಲ್ಲೂ ವ್ಯಾಪಕ ಭದ್ರತೆಗೆ ಕೇಂದ್ರ ಸೂಚನೆ ನೀಡಿದೆ.
ಉಗ್ರರು ಒಳನುಸುಳಿರುವ ಗುಪ್ತಚರ ಮಾಹಿತಿ ಆಧರಿಸಿ ಭಾರತೀಯ ಸೇನೆ, ಬಿಎಸ್ಸೆಫ್, ಸಿಆರ್‌ಪಿಎಫ್ ಮತ್ತು ಜಮ್ಮು-ಕಾಶ್ಮೀರ ಪೊಲೀಸರು ಈಗಾಗಲೇ ಉಗ್ರರಿಗಾಗಿ ಬಲೆ ಬೀಸಿದ್ದಾರೆ. ಶೋಧ ಕಾರ್ಯಾಚರಣೆ ಹೆಚ್ಚಿಸಿದ್ದಾರೆ.
ಇಷ್ಟೇ ಅಲ್ಲದೆ, ಸುಮಾರು 100 ಉಗ್ರರು ಭಾರತಕ್ಕೆ ಒಳನುಸುಳಲು ಗಡಿ ನಿಯಂತ್ರಣ ರೇಖೆಯಲ್ಲಿ ಕಾಯುತ್ತಾ ಕುಳಿತಿದ್ದಾರೆ ಎಂಬ ಆತಂಕಕಾರಿ ವಿಷಯ ಗುಪ್ತಚರ ಮಾಹಿತಿಯಿಂದ ಹೊರಬಿದ್ದಿದೆ.
ಉರಿ ಸೇನಾ ಶಿಬಿರದ ಮೇಲಿನ ಉಗ್ರರ ದಾಳಿಯ ನಂತರ ಭಾರತೀಯ ಭದ್ರತಾ ಪಡೆಗಳು ಕೇವಲ ಒಂದು ತಿಂಗಳಲ್ಲಿ 40ಕ್ಕಿಂತ ಅಧಿಕ ಭಯೋತ್ಪಾದಕರನ್ನು ಸೆದೆಬಡಿವೆ. ಬಾರಾಮುಲ್ಲಾ, ಪ್ಯಾಂಪೋರ್ ಮತ್ತು ಹಂದ್ವಾರಾ ಮೂಲಕ ಒಳನುಸುಳುವ ಉಗ್ರರ ಹಲವು ಯತ್ನಗಳನ್ನು ಸೇನಾಪಡೆ ವಿಫಲಗೊಳಿಸಿದೆ.
**
ಪ್ಯಾಂಪೋರ್‌ನಲ್ಲಿ 2ನೇ ದಿನದಲ್ಲಿ ಮುಂದುವರಿದ ಗುಂಡಿನ ದಾಳಿ
ಶ್ರೀನಗರ: ಶ್ರೀನಗರ-ಜಮ್ಮುವಿನ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಬರುವ ಪ್ಯಾಂಪೋರ್‌ನ ಸರಕಾರಿ ಕಟ್ಟಡದಲ್ಲಿ ಅಡಗಿರುವ ಉಗ್ರರನ್ನು ಸದೆಬಡಿಯಲು ಭದ್ರತಾ ಪಡೆ ನಡೆಸುತ್ತಿರುವ ಕಾರ್ಯಾಚರಣೆ ಮಂಗಳವಾರ ಎರಡನೇ ದಿನ ಮುಂದುವರಿದಿದೆ.
ಪ್ಯಾಂಪೋರ್‌ನ ಉದ್ಯಮಶೀಲತಾ ಅಭಿವೃದ್ಧಿ ಸಂಸ್ಥೆಯ ಕಟ್ಟಡ ಸಂಕೀರ್ಣದಲ್ಲಿ ಉಗ್ರರು ಅವಿತುಕೊಂಡಿದ್ದು, ಸೇನಾ ಪಡೆ ಯೋಧರು ಕಟ್ಟಡವನ್ನು ಸುತ್ತುವರಿದಿದ್ದು, ಗುಂಡಿನ ಚಕಮುಕಿ ಮುಂದುವರಿದಿದೆ.
ಸೋಮವಾರ ನಸುಕಿನ ವೇಳೆ 2-3 ಉಗ್ರರು ಕಟ್ಟಡ ಸಂಕೀರ್ಣಕ್ಕೆ ನುಗ್ಗಿ, ಅದರಲ್ಲಿ ಒಂದು ಕಟ್ಟಡವನ್ನು ಹಿಡಿತಕ್ಕೆ ತೆಗೆದುಕೊಂಡಿದ್ದರು. ಕಟ್ಟಡ ಹಿಂಬದಿಯಿಂದ ಉಗ್ರರು ಒಲಪ್ರವೇಶಿಸಿರಬಹುದು ಎನ್ನಲಾಗುತ್ತಿದೆ.
ಕಟ್ಟಡದ ಒಳನುಗ್ಗಿದ ಉಗ್ರರು, ಪೊಲೀಸರು ಮತ್ತು ಭದ್ರತಾ ಸಿಬ್ಬಂದಿಯ ಗಮನ ಸಳೆಯಲು ಅಲ್ಲಿನ ಹಾಸ್ಟೆಲ್ ಕೊಠಡಿಯಿಂದ ಒಂದು ಸುತ್ತು ಗುಂಡು ಹಾರಿಸಿದರು. ಕೂಡಲೇ ಪೊಲೀಸರು ಮತ್ತು ಭದ್ರತಾ ಸಿಬ್ಬಂದಿ ಸ್ಥಳಕ್ಕೆ ಆಗಮಿಸಿ, ಕಟ್ಟಡವನ್ನು ಸುತ್ತುವರಿದು, ಗುಂಡಿನ ದಾಳಿ ನಡೆಸಿದರು. ಗುಂಡಿನ ಚಕಮಕಿಯಲ್ಲಿ ಒಬ್ಬ ಯೋಧ ಗಾಯಗೊಂಡಿದ್ದಾರೆ ಎಂದು ಪೊಲೀಸ್ ಅಧಿಕಾರಿ ತಿಳಿಸಿದ್ದಾರೆ.
ಕಳೆದ ಫೆಬ್ರವರಿಯಲ್ಲೂ ಉಗ್ರರು ಇದೇ ಕಟ್ಟಡವನ್ನು ಗುರಿಯಾಗಿಸಿ, ನಡೆಸಿದ್ದ 48 ತಾಸುಗಳ ದಾಳಿಯಲ್ಲಿ ಸೇನೆಯ ಇಬ್ಬರು ಯುವ ಅಧಿಕಾರಿಗಳು ಸೇರಿ ಒಟ್ಟು ಐವರು ಭದ್ರತಾ ಸಿಬ್ಬದಿ ಮತ್ತು ಒಬ್ಬ ನಾಗರಿ ಮೃತಪಟ್ಟಿದ್ದರು. ಭದ್ರತಾ ಪಡೆ ಮೂವರು ಉಗ್ರರನ್ನು ಹತ್ಯೆ ಮಾಡಿತ್ತು.
**
ಶೋಪಿಯಾನ್‌ನಲ್ಲಿ ಗ್ರೆನೇಡ್ ದಾಳಿ: 9 ಮಂದಿಗೆ ಗಾಯ
ಶ್ರೀನಗರ: ದಕ್ಷಿಣ ಕಾಶ್ಮೀರದ ಶೋಪಿಯಾನ್ ಪಟ್ಟಣದಲ್ಲಿ ಉಗ್ರರು ಸಿಆರ್‌ಪಿಎಫ್ ಪಡೆಯ ಮೇಲೆ ನಡೆಸಿದ ಗ್ರೆನೇಡ್ ದಾಳಿಯಲ್ಲಿ ಇಬ್ಬರು ಭದ್ರತಾ ಪಡೆ ಸಿಬ್ಬಂದಿ ಸೇರಿದಂತೆ ಕನಿಷ್ಠ 9 ಮಂದಿ ಗಾಯಗೊಂಡಿದ್ದಾರೆ.
ಸಿಆರ್‌ಪಿಎಫ್ ಸಿಬ್ಬಂದಿ ಮೇಲೆ ಉಗ್ರರು ಮಂಗಳವಾರ ಬೆಳಗ್ಗೆ 11.40ರಲ್ಲಿ ಗ್ರೆನೇಡ್ ದಾಳಿ ನಡೆಸಿದಾಗ ಏಳು ನಾಗರಿಕರು ಹಾಗೂ ಇಬ್ಬರು ಭದ್ರತಾ ಸಿಬ್ಬಂದಿ ಗಾಯಗೊಂಡರು ಎಂದು ಪೊಲೀಸ್ ಅಧಿಕಾರಿ ದೃಢಪಡಿಸಿದ್ದಾರೆ.
ಶೋಪಿಯಾನ್ ಜಿಲ್ಲಾಸ್ಪತ್ರೆಯಲ್ಲಿ ಗಾಯಾಳುಗಳಿಗೆ ಚಿಕಿತ್ಸೆ ನೀಡಲಾಗಿದೆ.
ಭದ್ರತಾ ಪಡೆ ಸಿಬ್ಬಂದಿ ಉಗ್ರರ ವಿರುದ್ಧ ಶೋಧ ಕಾರ್ಯಾಚರಣೆ ನಡೆಸುತ್ತಿದ್ದಾರೆ.
ಸರ್ಜಿಕಲ್ ದಾಳಿಗೆ ಮುನ್ನವೇ ಒಳನುಸುಳಿದ್ದಾರೆ ಭಯೋತ್ಪಾದಕರು: ಗುಪ್ತಚರ ಮಾಹಿತಿ /ಭಾರತೀಯ ಸೇನಾಪಡೆಗಳ ಮೇಲೆ ದಾಳಿಗೆ ಈ ಉಗ್ರರ ಟಾರ್ಗೆಟ್