ಲಖನೌದ ಐತಿಹಾಸಿಕ ಅಶಿಭಾಗ್‌ನಲ್ಲಿ ದಸರಾ ಅಂಗವಾಗಿ ರಾಮಲೀಲಾ ಆಚರಣೆಯಲ್ಲಿ ಪಾಲ್ಗೊಂಡ ಮೋದಿ, ನೇರವಾಗಿ ಹೆಸರಿಸದೇ ಪಾಕಿಸ್ತಾನಕ್ಕೆ ಕಠಿಣ ಸಂದೇಶ ರವಾನಿಸಿದರು. ‘‘ಭಯೋತ್ಪಾದನೆ ವಿರುದ್ಧ ಮೊದಲು ಸಮರ ಸಾರಿದ್ದು ರಾಮಾಯಣ ಕಾಲದ ಜಟಾಯು. ಜಗತ್ತಿನೆಲ್ಲೆಡೆ ಭೀತಿ ಮೂಡಿಸಿದ್ದ ರಾವಣನೆಂಬ ದುಷ್ಟ ಅಸುರನ ಕೈಯಿಂದ ಅಸಹಾಯಕ ಸೀತಾ ಮಾತೆಯನ್ನು ರಕ್ಷಿಸಲು ಆತ ಹೋರಾಡಿ ಪ್ರಾಣ ತೆತ್ತಿದ್ದ. ನಾವು ರಾಮನಾಗದಿದ್ದರೂ ಪರವಾಗಿಲ್ಲ,ಕನಿಷ್ಠ ಜಟಾಯು ಆಗಬೇಕು. ಭಯೋತ್ಪಾದನೆ ಸಮಾಜಕ್ಕಂಟಿದ ವಿಷಕ್ರಿಮಿಯಿದ್ದಂತೆ ಅದರ ನಾಶಕ್ಕೆ ಪ್ರತಿಯೊಬ್ಬರೂ ಜಟಾಯುಗಳಾಗಬೇಕು,’’ ಎಂದರು.
ಬಡತನ, ಅನಕ್ಷರತೆ
‘‘ಬಡತನ, ಅನಕ್ಷರತೆ, ಭ್ರಷ್ಟಾಚಾರ ಮೊದಲಾದವು ರಾವಣನ ಇನ್ನೊಂದು ಸ್ವರೂಪವೇ ಆಗಿದೆ. ಅವುಗಳನ್ನು ದಹಿಸಿ ಸಮಾಜದಲ್ಲಿ ಸ್ವಾಸ್ಥ್ಯ ನೆಲಸುವಂತೆ ಮಾಡಬೇಕು. ನಾವು ವಿಜಯ ದಶಮಿ ಆಚರಿಸುತ್ತಿರುವಾಗಲೇ ಜಗತ್ತು ‘ಅಂತಾರಾಷ್ಟ್ರೀಯ ಬಾಲಕಿಯರ ದಿನ’ವನ್ನು ಆಚರಿಸುತ್ತಿದೆ. ಸಮಾಜದಲ್ಲಿ ಹೆಣ್ಣು ಮಕ್ಕಳನ್ನು ರಕ್ಷಿಸಿ, ಬೆಳೆಸುವ ಕೆಲಸ ಆಗಬೇಕಿದೆ. ಧರ್ಮ, ಜಾತಿ, ಪಂಗಡಗಳ ಭೇದ-ಭಾವ ಎಣಿಸದೇ ಮಹಿಳೆಯರನ್ನು ಗೌರವಿಸಿ, ಅವರ ಹಕ್ಕುಗಳನ್ನು ರಕ್ಷಿಸಬೇಕಾಗಿದೆ,’’ ಎಂದು ಪ್ರಧಾನಿ ತಿಳಿಸಿದರು.
ಲಖನೌ: ಭಯೋತ್ಪಾದನೆಯನ್ನು ಪೋಷಿಸುವವರಿಗೆ ಬುದ್ದಿ ಕಲಿಸಬೇಕಾಗಿದೆ. ಆ ಕೆಲಸ ಈಗಾಗಲೇ ಚಾಲ್ತಿಯಲ್ಲಿದೆ. ಭಾರತ ಯುದ್ಧಕ್ಕಿಂತ ಬುದ್ಧನೆಡೆಗೆ ಹೋಗಲು ಬಯಸುತ್ತದೆಯಾದರೂ, ಮಾನವೀಯತೆ ಉಳಿವಿಗೆ ಅನಿವಾರ‌್ಯವಾದರೆ ಯುದ್ಧ ಮಾಡಲೂ ಸಿದ್ಧವಿದೆ ಎಂದು ಪ್ರಧಾನಿ ನರೇಂದ್ರ ಮೋದಿ ಹೇಳಿದ್ದಾರೆ.